Lu 8 - Sơ̆p Hlabơar Nơ̆r 'Bok Kei-Dei

Sêba păng Salmuna

¹ Bơngai Êphraim khan kơ Giđêôn: Yua kơ kiơ ih pơm kơ lu nhôn thoi noh? Liơ ih năm tơblah hăm bơngai Miđian mă ưh kơ krao nhôn? Lu sư chrih hil dêh kơ Giđêôn.

² Mă-lei Giđêôn khan kơ lu sư: Dôm tơdrong jang inh pơm hăm wă gơh pơting inh hăm lu iĕm? Thoi mă plei hơmu lu bơngai Êphraim chă dônh hăm hloh kơ bơyan phĕ plei hơmu lu bơngai Abiêse?

³ Kră Yang 'Bok Kei-Dei jao boih Ôrep păng Sêep 'bar 'nu yŏng pơgơ̆r Miđian, lăm ti lu iĕm; lei dôm tơdrong inh pơm boih hăm gơh pơting hăm lu iĕm? Wă kơtơ̆ng sư pơma thoi noh na tơdrong blĕk lu sư rai ngach.

⁴ Giđêôn hăm pêng-hrĕng 'nu bơngai kiơ̆ sư oei druh bơngai Miđian truh tơ đak Krong Jôrđăn păng tŏk tơ gah to kơ Krong Jôrđăn, lu sư mă gleh lap dêh ră.

⁵ Giđêôn khan kơ bơngai pơlei Sukôt: Inh apinh iĕm asong bĕ 'bĕng hơya tŏ sĕt ăn kơ lu kon pơlei kiơ̆ inh; yua kơ lu sư gleh lap dêh; inh oei druh 'moi Sêba păng Salmuna, 'bar 'nu pơtao Miđian.

⁶ Mă-lei lu 'bok pơgơ̆r pơlei Sukôt khan, ih tam đei rôp bre Sêba păng Salmuna ưh, na mă wă kơ lu nhôn asong ăn kơ lu linh ih 'bĕng sa.

⁷ Giđêôn khan: Thoi noh dah Kră Yang pơjao Sêba păng Salmuna lăm ti inh, inh gô iŏk 'long jơla lăm char glă na raih hek lê̆ sĕch akar lu iĕm.

⁸ Đơ̆ng noh sư năm tơ pơlei Pênuêl kư̆m apinh lu sư. Kon pơlei Pênuêl tơl sư lei-lăi thoi bơngai pơlei Sukôt đei khan.

⁹ Thoi noh sư khan kơ kon pơlei Pênuêl: Dah inh brŏk blah jei, inh gô pơrăm đĭ hnam thôt 'nâu.

¹⁰ Sêba păng Salmuna oei tơ pơlei Karkơr hơdai hăm linh lu sư, dang mơjĭt-pơđăm rơbâu 'nu bơngai; noh đĭ-đăng lu bơngai mă oei arih lăm khŭl lu linh bơngai gah hơlĕch; yua kơ minh-hrĕng 'bar-jĭt rơbâu 'nu bơngai chĕp đao gưm đe pơlôch đĭ boih.

¹¹ Giđêôn tŏk 'moi kiơ̆ trong lu kon pơlei chă oei pơm bơsŭn pơdơh tơ gah hơlĕch kơ pơlei Nôba păng Jôbêha păng chă blah lu linh mă ưh kơ kơchăng.

¹² Sêba păng Salmuna kơdâu ôn ră mă-lei Giđêôn rôp bre sư pơtao Miđian, lu linh sư kư̆m kơdâu đĭ.

¹³ Giđêôn kon drŏ-nglo Jôas brŏk đơ̆ng anih tơblah rok trong kuĕl kông Hêres.

¹⁴ Sư đei rôp minh 'nu tơdăm kon pơlei Sukôt, na jet. Na bơngai tơdăm noh chih roi ăn anăn lu 'bok pơgơ̆r păng lu kră wei-lăng pơlei Sukôt, đei tơpơh-jĭt tơpơh 'nu bơngai.

¹⁵ Đơ̆ng rŏng kơ noh Giđêôn năm tơ kon pơlei Sukôt na khan: 'Nâu boih Sêba păng Salmuna; yua kơ lu sư na mă lu iĕm pơjăm chrih kơ inh, khan: Ti ih tam rôp pơlôch Sêba păng Salmuna na wă kơ lu nhôn ăn kơ linh kiơ̆ ih gleh lap sa 'bĕng?

¹⁶ Thoi noh sư rôp teh pơmat lu kră lăm pơlei Sukôt hăm 'long jơla đơ̆ng char glă păng tơlei jơla.

¹⁷ Sư kư̆m pơrăm hnam thôt pơlei Pênuêl păng pơlôch lu bơngai drŏ-nglo lăm pơlei noh.

¹⁸ Đơ̆ng noh sư apinh Sêba păng Salmuna: Măr iĕm pơlôch bơngai kiơ tơ Tabôr? Bre sư tơl; lu sư kư̆m hơbŏ thoi ih; rim 'nu lu sư kư̆m nhen thoi minh 'nu kon tơdăm pơtao.

¹⁹ Na Giđêôn khan dơ̆ng: Lu sư 'nhŏng oh inh, kon tơdăm mĕ inh; tơpă, Kră Yang arih, tơdah măr iĕm lê̆ lu sư oei arih, lei inh ưh kơ pơlôch măr iĕm ôh!

²⁰ Đơ̆ng noh Giđêôn khan kơ Jêther, kon kơdră sư, iung pơlôch lê̆ bĕ măr sư. Mă-lei bơngai tơdăm noh ưh kơ toh đao gưm sư yua kơ sư hli; sư bơngai oei mơlôh.

²¹ Sêba păng Salmuna khan: Iung bĕ; ih kơdih pơlôch nhi yua kơ bơngai liơ đei jơhngơ̆m pran thoi noh. Giđêôn sư iung hloi, pơlôch Sêba păng Salmuna; na iŏk tơmam bre sư tơ'băk kơ ako aseh lăk-đa.

²² Na bơngai Isơrael khan kơ Giđêôn: Apinh ih kon drŏ-nglo ih păng lu sâu ih pơgơ̆r lu nhôn, yua kơ ih dŏng pơklaih lu nhôn đơ̆ng bơngai Miđian.

²³ Giđêôn tơl lu sư; Inh ưh kơ pơgơ̆r lu iĕm kon drŏ-nglo inh kư̆m ưh kơ pơgơ̆r lu iĕm mơ̆n; Kră Yang gô pơgơ̆r lu iĕm.

²⁴ Giđêôn khan đơ̆ng kơ lu sư: “Inh wă apinh lu iĕm. Rim 'nu kơ lu iĕm athei ăn kơ inh dôm lu gŏp maih mă đêl lu iĕm blah iŏk.”a

²⁵ Lu sư tơl: Lu nhôn hiôk gô ăn kơ ih lu tơmam noh. Lu sư lơ̆k ao, na đĭ-đăng lu bơngai drŏ-nglo dan gŏp maih đêl lu sư blah iŏk.

²⁶ Lu gŏp maih mă Giđêôn apinh noh kŏng lăng trăp đei mơjĭt-tơsĭn kĭ minh puăt maih, ưh kơ jơ̆ tơmam gĭt nai thoi rơbưn mă lu pơtao Miđian pơhrơp păng lu hơbĕn ao che 'brê hơhĭm juăt kơ hrŭk păng kư̆m ưh kơ jô̆ ôh maih tơmam 'măn lu sư tơ'băk tơ hơko aseh lăk-đa.

²⁷ Giđêôn iŏk maih noh pơm ao tai êphot tah 'măn lê̆ lăm pơlei sư tơ Ophra. Đĭ-đăng bơngai Isơrael kơkuh kơ tơmam sư pơm noh; tơmam noh jing hơđong hơ'năk kơ Giđêôn păng hnam dơnŏ sư.

²⁸ Lu bơngai Isơrael pơgŏ pơđep lu bơngai Miđian na lu sư ưh pă pơ̆n ngơk. Lăm chăl Giđêôn, dêh char sư pơdơh tơblah rơngei hiôk-hian lăm puăn-jĭt sơnăm.

²⁹ Jêrup Baal kon drŏ-nglo Jôas, wih brŏk oei tơ hnam sư kơdih.

³⁰ Giđêôn đei pơjing tơpơh-jĭt 'nu kon drŏ-nglo yua kơ sư đei akăn lơ.

³¹ Akăn kơnhŏng sư oei tơ pơlei Sichem, kư̆m đei tơpŭ kơ sư minh 'nu kon drŏ-nglo, anăn sư Abimêlek.

³² Giđêôn, kon drŏ-nglo Jôas sơnăm đê̆ kră krŭng sư lôch đe 'bŭ sư lăm bơsat 'bă sư Jôas, tơ pơlei Ôphra, noh bơngai Abierit.

³³ Lăp đơ̆ng rŏng kơ Giđêôn lôch, lu bơngai Isơrael wơ̆t pơm kơnê̆ dơ̆ng kơkuh kơ yang Baal; lu sư kơkuh kơ yang Baal Bêrit pơm yang lu sư.

³⁴ Lu bơngai Isơrael ưh pă 'blŏk boih kơ Kră Yang 'Bok Kei-Dei lu sư, Tơ'ngla mă dŏng pơklaih lu sư đơ̆ng ti lu bơngai ayăt jum dăr kơ lu sư.

³⁵ Lu sư kư̆m ưh kơ đei jơhngơ̆m 'lơ̆ng tŏ sĕt hăm hnam Jêrup Baal noh Giđêôn, wă 'mong kơ dôm tơdrong hiôk 'lơ̆ng mă sư đei pơm boih kơ bơngai Isơrael.