Lu 5 - Sơ̆p Hlabơar Nơ̆r 'Bok Kei-Dei

Nơ̆r hơri Đêbôra

¹ Lăm năr ei, Đêbôra hăm Barak, kon drŏ-nglo Abinôam hơri nơ̆r âu:

² Kơplah lu 'bok pơgơ̆r wei-lăng lăm bơngai Isơrael, Păng kơplah kon pơlei pơla pơyơ̆r akâu lu sư hăm jơhngơ̆m hiôk! Kơkuh hơri ư-ang Kră Yang.

³ Ơ lu pơtao, mơ̆ng bĕ! Ơ lu 'bok pơgơ̆r, pơđêng bĕ đon! Inh gô hơri ăn kơ Kră Yang, minh bai. Inh gô hơri bơnê kơ Kră Yang, 'Bok Kei-Dei Isơrael.

⁴ Ơ Kră Yang kơplah Ih lĕch đơ̆ng dêh Sêir, kơplah Ih yak rok char Eđôm, Na teh tơdrŏ, plĕnh tơjur đak 'mi. Hơmơ̆l tơjur đak 'mi.

⁵ 'Bơ̆t anăp Kră Yang, đĭ-đăng kông pơpơ̆, Kông Sinai pơpơ̆ 'bơ̆t anăp Kră Yang 'Bok Kei-Dei Isơrael.

⁶ Lăm chăl Samgar kon drŏ-nglo Anat, Lăm chăl Jăl, rim trong tih ưh pă đei bu rok, Lu bơngai tơmoi chă yak rok kiơ̆ trong đŏng đĕo;

⁷ Tơdrong arih kon pơlei lăm lu pơlei iĕ oei dơ̆ng. Inh Đêbôra iung Thoi minh 'nu mĕ lăm bơngai Isơrael.

⁸ Đe rơih iŏk boih lu yang 'nao; Na lu bơngai ayăt mơ̆t tơblah truh tơ 'măng dur pơlei. Lăm lu puăn-jĭt rơbâu 'nu lu bơngai Isơrael ưh kơ đei bu đei khêl kư̆m ưh kơ đei bu đei hơlă.

⁹ Jơhngơ̆m inh 'mêm kơ lu yŏng pơgơ̆r linh Isơrael, Lu sư pơyơ̆r akâu sư kơdih hăm jơhngơ̆m hiôk; tơgŭm teh đak, tơgŭm kon pơlei hơri ư-ang kơ Kră Yang!

¹⁰ Ơ lu bơngai hao aseh iĕ kok, Ơ lu bơngai hơ-oei an 'lơ̆ng kơpal kơdŭ aseh, Lu bơngai tơmoi yak rok trong tih, roi bĕ tơdrong noh.

¹¹ Roi bĕ kơ lu bơngai reh brŏ oei reh tơ kơdrơ̆m đak, Wă kơ lu sư gô hơri pơlơ̆k dơ̆ng pơlơ̆k dơ̆ng tơdrong kĕ jei Kră Yang. Tơdrong kĕ jei kon pơlei Isơrael! Ơ kon pơlei Kră Yang jur năm bĕ tơ 'măng jang pơlei.

¹² Ơ Đêbôra, Hơđơ̆r bĕ, hơđơ̆r bĕ! Hơđơ̆r bĕ, hơđơ̆r bĕ, hơri bĕ minh bai hơri! Ơ Barak, iung bĕ! Chông ba lu bơnă ih, Ơ kon drŏ-nglo Abinôam,

¹³ Ơ lu bơngai mă lăm lu adrĕch tih mơng năm jur bĕ. Lu kon pơlei Kră Yang jur năm tơ inh, hơdai hăm lu nuih kơtang!

¹⁴ Đơ̆ng adrĕch Êphraim lu bơngai jơnơ̆na đơ̆ng dêh Amalek; Kiơ̆ rong đei adrĕch Bênjamin, 'nhŏng oh sư. Lu 'bok pơgơ̆r linh truh đơ̆ng Makir păng kư̆m đei lu bơngai yŏng linh chĕp 'long jra truh đơ̆ng Sebulun.

¹⁵ Lu yŏng pơgơ̆r tơm Isakar kư̆m năm kiơ̆ Đêbôra, Bơngai Isaka păng Barak măr sư minh pơm 'bơ̆r đon, Lu sư jur tơ lăm thŭng. Gah lu adrĕch Rubên, Đe hrăn tơchĕng lăm jơhngơ̆m

¹⁶ Yua kơ kiơ iĕm gô lăm hơdrong triu, na mơ̆ng đe krao triu hă? Lăm adrĕch Rubên, đe hrăn tơchĕng lăm jơhngơ̆m!

¹⁷ Adrĕch Gileat lu sư oei oei tơ pah to đak Krong Jôrđăn; Bĕ Đan liơ ih oei bơsuơ̆t tơ lăm lu duk? Aser ngôi mơng 'bơ̆t cheng đak dơsĭ, oei pơdơh lăm anih duk pơdơh.

¹⁸ Bơngai Sebulun ưh kơ hli kơ lôch pơyơ̆r akâu mă lôch kư̆m bưh; Bơngai Naptali kư̆m lei-lăi jao akâu lu sư lôch tơ anih tơblah.

¹⁹ Lu 'bok pơtao năm truh tơblah hloi Lu sư blah lu pơtao Kanaan. Tơ Tanak, jê̆ thong đak Mêgiđô; lu sư ưh kơ đei blah iŏk kiơ, jên dah tơmam!

²⁰ Lu sơnglŏng tơ plĕnh kư̆m tơblah; Kiơ̆ kơ trong lu sư, na năm blah Sisêra.

²¹ Tơ đak krong Kisôn lu sư hoch đĭ, Đak krong Kisôn ro lơ̆p pơhoch lê̆ đĭ lu sư. Ơ bơhngol inh, mă nuih pran kơtang bĕ năm tơ anăp!

²² Re jơwa kơchôp aseh, mơdrâp mơdrăp, Lu aseh hrơ̆t kơdâu hăt hot tơ jơ̆p-jang anih.

²³ Linh jang Kră Yang khan: Hiap bĕ kon pơlei Mêrơs; Hiap bĕ lu kon pơlei sư mă kơnê̆. Yua kơ lu sư ưh kơ wă tơgŭm Kră Yang, Lu sư ưh kơ đei tơgŭm Kră Yang blah lu bơngai mă pơm kơnê̆ dêh!

²⁴ Pŭn hiôk dêh kơ Jăl, akăn Hêber, bơngai Kênit. Noh mă bơngai drŏ-kăn đei tơdrong pŭn hiôk hloh lăm lu bơngai drŏ-kăn mă oei lăm bơsŭn!

²⁵ Sisêra apinh đak, yă ei ăn kơ sư đak toh rơmo; Sư iŏk pơnhan bơngai mơdrŏng na hling rơmă đak toh.

²⁶ Minh pah ti sư chĕp 'long hơdrơ̆ng pơm bơsŭn. Na minh pah ti 'ma sư chĕp mut lu bơngai jang, Sư pơ̆ng Sisêra, 'bơ̆t tơ'ngăp kơ̆l pơchah hloi, sư pơ̆ng 'bơ̆t tơ'ngăp klĕch hloi.

²⁷ Siseka pơ̆k, 'bĭch hloi 'bơ̆t jơ̆ng yă ei ưh pă đei pơpơ̆ sư pơ̆k sư 'bĭch hloi 'bơ̆t jơ̆ng yă ei; 'Bơ̆t anih sư pơ̆k noh, sư lôch arăng hơron hloi.

²⁸ Mĕ Sisêra ngôi 'bơ̆t 'măng-'mŏk chang lăng, yă ei lăng 'bơ̆t che đe pĕng 'măng-'mŏk ei ưh kơ 'bôh, na khan: Yua kơ kiơ gre aseh kon inh hiơ̆ kơ jah brŏk? Yua kơ kiơ ưh đei kơtơ̆ng re jơ̆ng gre aseh kon inh.

²⁹ Lu bơngai drŏ-kăn đei đon hơgei đei nơ̆r tơl. Kŭm mĕ sư pơma tơ tinh kơdih akâu khan:

³⁰ ‘Băt lu sư chă đei iŏk tơmam kiơ na dang ei lu sư oei chă klah asong dih băl tơmam noh kơlĕ? Minh 'bar 'nu drŏ-kăn chă ăn kơ rim 'nu bơngai linh drŏ-nglo, minh blah che jơk lu tơmam tơgar iŏk, Lu tơmam tơgar iŏk đei che tong đak jơk 'măn kơ Sisêra. Lu che đei reng păng tong đak 'lơ̆ng, hăm trŏ đei 'bar blah reng păng tong đak 'lơ̆ng gô pơm che 'băk tơ hơko ăn kơ inh.’

³¹ Ơ Kră Yang, Ăn đĭ kơ lu ayăt kơ Ih lôch hiong răm thoi noh! Apinh Ih ăn kơ lu bơngai mă 'mêm kơ Ih gơh thoi măt 'năr, Lĕch hơdah hơdong! Đơ̆ng noh, dêh char noh đei hiôk-hian lăm puăn-jĭt sơnăm.