Lu 3 - Sơ̆p Hlabơar Nơ̆r 'Bok Kei-Dei

¹ 'Nâu boih lu adrĕch adrung mă Kră Yang lê̆ oei đei, yua kơ wă pơlong lăng lu bơngai Isơrael tam mă đei layơ 'bôh tơdrong tơblah tơ dêh char Kanaan.

² Sư wă pơlong lăng lu bơngai Isơrael, wă pơhrăm pơjuăt lu sư tơdrong tơblah, mă loi lu bơngai tam đei 'bôh tơdrong tơblah sơ̆:

³ Đei pơđăm 'nu pơm yŏng pơgơ̆r kon pơlei Philistin, đĭ-đăng lu kon pơlei Kanaan kon pơlei Siđôn păng kon pơlei Hêwit oei tơ lăm lu kông Liban, đơ̆ng kông Baal Hermôn truh tơ pơlei Lêbơ Hamat.

⁴ Kră Yang yua lu adrĕch adrung 'nâu wă pơlong lăng lu bơngai Isơrael, wă lăng lăng lu bơngai Isơrael hăm chu kiơ̆ tơdrong juăt mă Kră Yang chih ăn kơ Môis bơtho kơ lu adrĕch adrung lu sư.

⁵ Thoi noh kon pơlei Isơrael oei hơdai hăm kon pơlei Kanaan, kon pơlei Hêtit, kon pơlei Amôrit, kon pơlei Phêrisit, kon pơlei Hêwit păng kon pơlei Jêbus,

⁶ lu sư iŏk kon adruh đe noh pơm akăn păng ăn kon drŏ-kăn lu sư oei kơ kon tơdăm đe noh păng kơkuh kiơ̆ kơ yang đe noh. Chih roi gah lu 'bok sek tơlang

Ôtniêl

⁷ Kon pơlei Isơrael pơm tơdrong kơnê̆ 'bơ̆t anăp Kră Yang, hiơt kơ Kră Yang 'Bok Kei-Dei lu sư, bơ̆jang kơkuh kơ rup yang Baal păng yang Asêrôt.

⁸ Yua kơ thoi noh, Kră Yang hil blĕk kơ lu bơngai Isơrael, Kră Yang pơjao lu sư lăm ti Kusan Risathaim, pơtao teh đak Mesôpôtami. Kusan Risathaim pơgŏ pơđep kon pơlei Isơrael lăm tơhngam sơnăm.

⁹ Mă-lei mưh lu kon pơlei Isơrael krao ôr apinh Kră Yang na Kră Yang rơih ăn kơ lu sư minh 'nu bơngai dŏng pơklaih, noh anăn sư Ôtniêl, kon drŏ-nglo Kênas, oh tơtil Kalep; bơngai ei dŏng pơklaih lu sư.

¹⁰ Yang bơhngol 'lơ̆ng Kră Yang jur tơ Ôtniêl na sư jing bơngai sek tơlang Isơrael lĕch năm tơblah. Na Kră Yang pơjao Kusan Risathaim, pơtao Aram lăm ti sư na sư blah Kusan Risathaim jei sư.

¹¹ Dêh char bơngai Isơrael đei rơngei hơđơ̆ng lăm puăn-jĭt sơnăm; truh tơ Ôtniêl, kon drŏ-nglo Kênas lôch.

¹² Kon pơlei Isơrael pơm kơnê̆ dơ̆ng 'bơ̆t anăp Kră Yang, na Kră Yang ăn kơ Eglôn, pơtao Môap jing pran năm wang blah Isơrael yua kơ lu sư pơm yoch kơnê̆ 'bơ̆t anăp Kră Yang.

¹³ Thoi noh Eglôn akŭm hơdai hăm kon pơlei Ammôn păng kon pơlei Amalek năm blah kon pơlei Isơrael jei lu sư; păng đei blah iŏk pơgơ̆r pơlei 'Long gol. a

¹⁴ Eglôn pơtao char Môap pơjuă pơđep kon pơlei Isơrael lăm mơjĭt-tơhngam sơnăm.

¹⁵ Mă-lei mưh kon pơlei Isơrael krao ôr apinh Kră Yang, Kră Yang rơih ăn kơ lu sư minh 'nu 'bok dŏng pơklaih, anăn sư Êhut, kon drŏ-nglo Gêra, sư adrĕch Bênjamin. 'Noh bơngai juăt kơ yua ti gah 'ngiĕo. Kon pơlei Isơrael wơh sư chĕp ba tơmam ra ăn kơ Eglôn, pơtao Môap.

¹⁶ Êhut pơm kơdih sư minh hlak đao gưm 'bar pah măt, kơjung minh (hơgăt) păng tơ̆n đao gưm tơ kơiĕng gah 'ma, tah tơ lăm kơ ao sư.

¹⁷ Thoi noh sư chĕp ba, tơmam đe ra ăn kơ Eglôn, pơtao Môap. Eglôn sư bơngai tih bek dêh.

¹⁸ Đang kơ noh, na Êhut ăn kơ lu bơngai chĕp tơmam ra noh brŏk.

¹⁹ Mă-lei sư kơdih wih tơ rŏng tơ sơlŭng đe iŏk tơmo jê̆ tơ Gilgal, na wơ̆t brŏk khan: Ơ pơtao, inh đei minh nơ̆r hlơp wă roi kơ ih. Na pơtao athei: Thĕng bĕ! Na đĭ-đăng kơ lu bơngai bơ̆jang kơ pơtao lĕch tơ 'nguaih.

²⁰ Kơplah pơtao oei ngôi minh drô̆ tơ anih kơpal rơngơp, Êhut năm jê̆ na khan. Inh đei minh nơ̆r đơ̆ng Kră Yang 'Bok Kei-Dei wă roi ăn kơ ih. Na Eglôn iung hloi đơ̆ng tang-dŏ sư.

²¹ Êhut yơ̆r ti 'ngiĕo sư toh iŏk đao đơ̆ng kơiĕng sư, na 'bet hloi 'bơ̆t klak.

²² Gơ̆r đao kư̆m han mơ̆t kiơ̆ măt đao Êhut sư ưh kơ gơh toh đao sư. Yua kơ Eglôn bek dêh rơmă klak sư klơp lê̆ đao.

²³ Đơ̆ng noh, Êhut lĕch đơ̆ng anih 'nei trong kơdeng păng tang khuă chơkăl lê̆ 'măng anih noh gah rŏng sư.

²⁴ Đơ̆ng rong kơ Êhut lĕch boih đơ̆ng hnam, lu đĭch đam pơtao năm lăng; 'bôh 'măng hnam tơ kơpal noh tang chơkăl ngăl boih, na pơma dih băl khan: Băt dah pơtao oei pơdơh tơ hnam kơpal kơlĕ.

²⁵ Lu sư gô đunh dêh, dĭng mah pă băt pơm liơ; yua kơ ưh 'bôh pơtao pơih 'măng hnam, na lu sư iŏk khuă păng pơih 'măng anih noh, 'bôh yŏng lu sư lôch boih, 'bơ̆t hơnă hnam.

²⁶ Kơplah lu sư oei gô, Êhut kơdâu klĕnh hlôi trong cheng rok sơlŭng đe iŏk kơ tơmo kơdâu truh tơ pơlei Sêira.

²⁷ Lăp sư truh tơ noh sư hlôm keng tơ lăm groi kông Êphraim; na kon pơlei Isơrael jur hơdai hăm sư đơ̆ng kơpal kông păng sư pơm yŏng chông ba lu sư.

²⁸ Êhut khan kơ lu sư: Kiơ̆ inh bĕ, yua kơ Kră Yang jao boih kon pơlei Môap lăm ti lu iĕm, bơngai mă ayăt kơ lu iĕm. Đĭ lu sư jur kiơ̆ sư, năm blah iŏk anih đơ̆ng đak Krong Jôrđăn, noh trong lu bơngai Môap juăt kơ tŏk găn đak krong trong noh ưh kơ đei ăn bu năm.

²⁹ Lăm kơplah noh kon pơlei Isơrael đei pơlôch dang mơjĭt-rơbâu 'nu bơngai Môap, đĭ lu sư noh bơngai kơtang nuih ưh kơ đei minh 'nu klaih.

³⁰ Lăm năr noh, bơngai Isơrael pơgŏ pơđep kon pơlei Môap; dêh char sư hơđơ̆ng rơngei hiôk lăm tơhngam-jĭt sơnăm.

³¹ Đơ̆ng rŏng kơ Êhut đei Samgar, kon drŏ-nglo Anat, sư yua minh tŏ 'long sơnguĕt suĕng đe puh rơmo na teh pơlôch tơdrâu-hrĕng 'nu bơngai Philistin na sư dŏng pơklaih lu bơngai Isơrael.