Lu 21 - Sơ̆p Hlabơar Nơ̆r 'Bok Kei-Dei

Tơiung dơ̆ng adrĕch Bênjamin

¹ Tơ lăm pơlei Mispa, lu kon pơlei Isơrael đei pơkă pơkăm băl: Lăm lu bơ̆n ưh kơ gơh ăn kon drŏ-kăn bơ̆n iŏk klo đơ̆ng bơngai Bênjamin.

² Đơ̆ng noh lu kon pơlei năm tơ pơlei Bethel hơ-oei tơ noh 'bơ̆t anăp Kră Yang 'Bok Kei-Dei Kră Yang truh tơ kơsơ̆ măng, nhơ̆m hmoi ôr hơdrĭ dêh.

³ Lu sư krao khan: Ơ Kră Yang, 'Bok Kei-Dei Isơrael, yua kơ kiơ dang ei lăm adrĕch Isơrael ưh pă tơm boih, lu nhôn hiong boih minh adrĕch.

⁴ Pơgê năr đơ̆ng rong lu kon pơlei pơla iung đơ̆ng hrôih pơm minh pơm chơnang soi păng pơyơ̆r tơmam soi 'buh păng pơyơ̆r tơmam soi 'blŏk bơnê.

⁵ Na lu kon pơlei Isơrael khan: Lăm lu adrĕch bơngai Isơrael bu mă ưh kơ đei akŭm hơdai bơ̆n 'bơ̆t anăp Kră Yang tơ âu? Lu sư khan thoi noh yua kơ lu bơngai Isơrael đei pơkă pơkăm boih: Bơngai bu mă ưh kơ năm truh akŭm tơ Mispa 'bơ̆t anăp Kră Yang, bơngai 'noh đe gô pơlôch sư!

⁶ Na lu bơngai Isơrael đĭ-đăng băt kơ hmach sơ'ngon kơ dôm tơdrong mă truh kơ lu bơngai Bênjamin, 'nhŏng oh lu sư, na lu sư khan: Năr 'nâu minh adrĕch hiong boih đơ̆ng adrĕch Isơrael.

⁷ Lu bơ̆n wă pơm liơ kơ lu kon drŏ-nglo Bênjamin mă oei arih, yua kơ lu bơ̆n pơkă pơkăm hăm anăn Kră Yang boih ưh kơ ăn kon drŏ-kăn lu bơ̆n oei kơ lu sư?

⁸ Đơ̆ng noh lu sư khan? Lăm dôm lu bơngai Isơrael bơngai bu ưh kơ đei năm dơ̆ng 'bơ̆t anăp Kră Yang tơ Mispa? Đơ̆ng pơlei Jabes tơ Gileat ưh kơ đei bu năm akŭm hơdai lăm năr noh.

⁹ Yua kơ kơplah đe jơ̆ đĭ-đăng pơlei ưh kơ đei 'bôh bơngai bu đơ̆ng pơlei Jabes tơ Gileat.

¹⁰ Na đơ̆ng khŭl akŭm wơh mơjĭt-'bar rơbâu 'nu lu bơngai nuih kơtang hloh năm tơ pơlei Gileat păng pơkă kơ lu sư: Năm bĕ, pơlôch đĭ kon pơlei Jabes tơ Gileat, hăm đao gưm pơlôch đĭ lu bơngai drŏ-kăn păng lu 'lơ̆p;

¹¹ 'Nâu tơdrong ăn kơ lu iĕm athei pơm: Pơlôch pơgoh đĭ dôm lu bơngai drŏ-nglo păng lu bơngai drŏ-kăn, mă ngôi hăm bơngai drŏ-nglo boih.

¹² Lu sư chă 'bôh bơih lăm pơlei Jabes tơ Gileat đei puăn-hrĕng 'nu drŏ-kăn oei hơdruh hle hơnĭl tam mă đei juăt hăm bơngai drŏ-nglo, na chông ba lu sư mơ̆t lăm kơđông tơ Silô lăm dêh Kanaan.

¹³ Đơ̆ng noh kon pơlei bơngai akŭm wơh bơngai năm tơ'bơ̆p bơngai Bênjamin, mă oei ôn lăm hơgơp tơmo Rimôn, wă pơma dơnuh pơhiôk hăm lu sư.

¹⁴ Lu bơngai Bênjamin wih brŏk lu bơngai Isơrael rôp ăn kơ lu sư dôm lu bơngai drŏ-kăn mă lu sư mơnat ăn oei arih đơ̆ng pơlei Jabes tơ Gileat, mă-lei ưh kơ đei tôm kơ lu sư ôh.

¹⁵ Kon pơlei pơla Isơrael hmach dêh kơ tơdrong mă lu sư đei pơm kơ lu bơngai Bênjamin, yua kơ Kră Yang tơhiong đơ̆ng lăm adrĕch Isơrael.

¹⁶ Lu bơngai kră pơgơ̆r kon pơlei sư khan: Yua kơ đĭ-đăng lu bơngai drŏ-kăn lăm adrĕch Bênjamin đê̆ pơlôch đĭ boih, na lu bơ̆n wă pơm liơ gơh chă akăn ăn kơ lu bơngai mă oei arih?

¹⁷ Lu sư tơl dơ̆ng: Lu bơngai Bênjamin mă oei arih dang ei lu sư gơh đei iŏk mŭk tơmam đei adrĕch adrung wă kơ huay pă hiong boih đơ̆ng lăm bơngai Isơrael.

¹⁸ Lu bơ̆n ưh kơ gơh ăn kon drŏ-kăn bơ̆n pơm akăn lu sư ôh yua kơ kon pơlei Isơrael pơkă pơkăm boih: Hiap pơtê̆ bĕ kơ bơngai bu mă rôp kon drŏ-kăn sư ăn kơ bơngai Bênjamin pơm akăn!

¹⁹ Na lu sư khan: Iĕm lăng rim sơnăm bơ̆n đei pơm giĕng 'blŏk hơdơ̆r kơ Kră Yang tơ anih Silô, oei gah yă-nơ̆m kơ pơlei Bethel, gah hơlĕch kơ trong năm đơ̆ng pơlei Bethel truh tơ pơlei Sichem, gah gơal kơ pơlei Lêbơna;

²⁰ Lu sư khan kơ bơngai Bênjamin: Năm răp bĕ lăm lu pơgar hơmu;

²¹ Păng lăng mưh 'bôh lu drŏ-kăn đơ̆ng Silô lĕch hơri suang na lu iĕm athei lĕch hloi đơ̆ng pơgar hơmu 'noh, đơ̆ng noh rim 'nu lu iĕm athei rôp iŏk minh 'nu adruh đơ̆ng pơlei Silô 'noh pơm akăn, păng wih brŏk tơ char Bênjamin.

²² Mưh 'bă dah 'nhŏng oh lu sư kêng lu iĕm tơ lu nhôn, na lu nhôn gơh tơl sư: Apinh iĕm mơnat asong kơ lu sư rôp pơm akăn, yua kơ lăm kơplah tơblah ki lu nhôn ưh kơ gơh ăn kơ lu sư chă akăn lăm rim 'nu lu sư 'noh, Lu iĕm kư̆m ưh kơ gơh rôp ăn kơ lu sư chă akăn; yua kơ noh lu iĕm kư̆m ưh kơ đei pơm yoch hăm nơ̆r bơ̆n pơkăm.

²³ Lu bơngai Bênjamin pơm hloi thoi noh rôp iŏk kơdih minh 'nu drŏ-kăn noh pơm akăn: Na lu sư wih brŏk tơ dêh Bênjamin; lu sư man tơiung pơjing anih pơlei dơ̆ng păng lu sư oei tơ noh hloi.

²⁴ Lu bơngai Isơrael weh đơ̆ng noh wih brŏk tơ adrĕch adrung sư kơdih rim 'nu wih brŏk tơ dêh char sư kơdih.

²⁵ Lăm kơplah 'noh ưh kơ đei pơtao ôh lăm bơngai Isơrael, na rim 'nu chă pơm kiơ̆ tơdrong tơchĕng kơdih khan trŏ.