Lu 18 - Sơ̆p Hlabơar Nơ̆r 'Bok Kei-Dei

¹ Kơplah 'noh ưh kơ đei pơtao lăm dêh Isơrael, ưh kơ đei pơtao lu adrĕch Đan oei năm chă teh, anih oei jang sa, yua kơ đơ̆ng sơ̆ truh dang ei, lăm dôm lu adrĕch Isơrael, bơngai Đan âu ưh tam mă đei teh, anih jang sa 'bơ̆t yơ.

² Thoi noh bơngai Đan rơih pơđăm 'nu lu bơngai nuih kơtang, năm đơ̆ng pơlei Sôra păng Êstaôl wơh chop lăng dêh 'noh. Lu bơngai âu tang măt ăn kơ lăm đĭ-đăng adrĕch lu sư. Bơngai Đan pơkă kơ lu sư: “Athei năm chop lăng dêh.” Lu sư năm truh tơ tơring groi kông Êphraim, năm tơ hnam Mika păng tep tơ noh.

³ Wă lu sư năm jê̆ tơ hnam Mika, kơtơ̆ng nơ̆r bơngai tơdăm Lêwi noh pơma, lu sư năm truh tơ noh jet: Bu chông ba ih năm tơ âu? Ih oei tơ âu pơm kiơ? Yua kơ kiơ ih oei tơ âu?

⁴ Bơngai Lêwi roi: Mika pơk inh jang, Mika apah inh, pơm 'bok soi ăn kơ sư.

⁵ Lu sư khan: Apinh ih krao khan bĕ Kră Yang 'Bok Kei-Dei, lu nhôn chă năm âu băt hăm đei ưh.

⁶ 'Bok soi ei tơl: Năm bĕ hiôk-hian, Kră Yang gô wei-lăng trong lu iĕm yak năm.

⁷ Pơđăm 'nu noh sư yak năm truh tơ pơlei Lais, lu sư 'bôh kon pơlei pơla tơ noh oei sa rơnŭk rơnua thoi lu kon pơlei Siđôn, oei hơđơ̆ng hiôk-hian păng oei jơnap lăm teh đak ưh kơ đei tơmam kiơ khăi? Lu sư oei ataih đơ̆ng pơlei Siđôn, kư̆m ưh kơ đei tơdrong kiơ hăm bơngai nai.

⁸ Lăp lu pơđăm 'nu ei wơ̆t brŏk tơ pơlei Sôra păng pơlei Êstaôl; 'nhŏng oh lu sư apinh lu sư: “Lu iĕm chop lăng 'bôh liơ?”

⁹ Lu sư tơl: “Bơ̆n athei năm blah lu sư, yua kơ lu nhôn 'bôh boih dêh char 'noh teh 'lơ̆ng. Ô! Lu iĕm năm truh tơ noh ưh kơ đei pơm kiơ hloi hă? Bơ̆n 'nĕ kơ hiơ̆, 'nĕ kơ hli bơ̆n dah blah iŏk teh 'noh.

¹⁰ Mưh lu iĕm năm truh tơ dêh noh lu iĕm gô 'bôh kon pơlei oei hơđơ̆ng rơnŭk rơnua. Dêh 'noh să păng sĭt Kră Yang 'Bok Kei-Dei gô pơjao lăm ti bơ̆n, teh đak ưh kơ đei khăi minh tơmam kiơ.”

¹¹ Thoi noh đei tơdrâu-hrĕng 'nu bơngai Đan chĕp tơmam tơblah, khêl, đao, năm đơ̆ng pơlei Sôra păng Êstaôl.

¹² Lu sư tŏk pơm kơđông tơ pơlei Kiriat Jêrim lăm char Juđa. Yua kơ thoi noh na đe anăn anih noh pơlei Mahaneh Đan truh tơ dang ei.

¹³ Đơ̆ng noh lu sư năm rok truh tơ groi kông Êphraim păng năm truh hloi tơ hnam Mika.

¹⁴ Pơđăm 'nu chop lăng dêh khan kơ lu 'nhŏng oh sư: “Lu iĕm hăm băt lăm hnam noh đei minh blah ao êphot, dôm tŏ rup Yang păng rup Yang man păng minh pơm rup yang đe hling? Dang ei lu iĕm băt boih bơ̆n wă pơm kiơ.”

¹⁵ Na lu sư năm tơ noh mơ̆t lăm hnam bơngai Lêwi 'noh oei lăm hnam Mika na apinh hăm kơkuh kơ sư.

¹⁶ Đei tơdrâu-hrĕng 'nu lu bơngai Đan chĕp tơmam tơblah khêl đao dơ̆ng 'bơ̆t 'nguaih kơ 'măng jang.

¹⁷ Lu pơđăm 'nu mă đêl năm chop lăng dêh 'noh lu sư mơ̆t lăm hnam tơtông iŏk rup man, ao êphot, lu rup yang nai păng rup yang đe hling đe tuh; kơplah noh 'bok soi oei dơ̆ng 'bơ̆t 'măng hơdai hăm lu tơdrâu-hrĕng 'nu chĕp tơmam tơblah khêl đao.

¹⁸ Kơplah lu pơđăm 'nu mơ̆t lăm hnam Mika tơtông iŏk rup man, ao êphot, lu rup yang păng rup yang đe hling đe tuh, 'bok soi apinh lu sư: Lu iĕm pơm kiơ?

¹⁹ Lu sư khan: Thĕng bĕ 'nĕ kơ pơma, iŏk ti đơ̆p 'bơ̆r ih păng năm hăm lu nhôn, pơm 'bă pơm 'bok soi lu bơ̆n, ih pơm 'bok soi ăn kơ minh pơm hnam dơnŏ dah pơm 'bok soi ăn kơ minh adrĕch adrung lu bơngai Isơrael, ayơ mă 'lơ̆ng hloh?

²⁰ 'Bok soi 'noh hiôk lăm jơhngơ̆m iŏk hloi ao êphot, rup yang păng rup man ei kiơ̆ hloi hăm khŭl noh.

²¹ Lu sư lê̆ lu hơ'lơ̆p, sem dơrong păng tơmam năm adrol na lu sư năm wơ̆t tơ rŏng brŏk hloi.

²² Lăp lu sư năm ataih 'biơ̆ đơ̆ng hnam Mika đei lu bơngai đơ̆ng hnam Mika păng lu rông 'bôt sư lu sư akŭm dih băl druh 'moi tam lu bơngai Đan.

²³ Lu sư jreo ôr kiơ̆ đơ̆ng rŏng; lu bơngai Đan hue tơ rŏng jet Mika: Ih đei tơdrong kiơ ih mah chông ba lu bơngai lơ thoi noh?

²⁴ Mika tơl: Lu iĕm tơtông iŏk ba đĭ rup yang inh pơm păng chông anhăk hloi 'bok soi inh? Liơ mă iĕm oei apinh khan, Ih đei tơdrong kiơ?

²⁵ Bơngai Đan tơl Mika: 'Nĕ pă ăn nhôn kơtơ̆ng nơ̆r ih dơ̆ng, hli kơ đei bơngai blĕk ơh blah iŏk rôp ih pơlôch tơhiong tơdrong arih ih, hăm tơdrong arih hnam dơnŏ ih.

²⁶ Lu bơngai Đan kư̆ kơ yak năm tơ anăp; Mika 'bôh lu sư pran hloh, na sư wih tơ rŏng wơ̆t brŏk tơ hnam.

²⁷ Đơ̆ng noh bơngai Đan chĕp ba đĭ tơmam kiơ ma Mika đei pơm boih păng chông ba 'bok soi sư, lu bơngai Đan năm tơ pơlei Lais, minh adrĕch kon pơlei âu oei hiôk-hian, iŏk đao gưm pơlôch kon pơlei păng iŏk ŭnh soh hloi pơlei.

²⁸ Ưh kơ đei bu dŏng pơklaih pơlei Lais, yua kơ lu sư oei ataih đơ̆ng pơlei Siđôn, păng lu sư kư̆m ưh kơ đei mơ̆t lĕch hăm đe bu nai: Pơlei noh oei lăm thŭng jê̆ Bet Rêhôp. Bơngai Đan pơjing tơiung dơ̆ng pơlei Lais păng oei tơ noh hloi:

²⁹ Lu sư krao anăn pơlei noh Đan, kiơ̆ anăn 'bok sư, Đan kon drŏ-nglo Isơrael; đe krao pơlei 'noh sơ̆ Lais.

³⁰ Tơ noh bơngai Đan lu sư chă tơiung ming rup Yang păng iŏk Jônathan kon drŏ-nglo Gersôm sâu Môis lu kon sâu sư pơtrơp pơm 'bok soi kơ adrĕch Đan truh tơ năr đe blah iŏk dêh noh.

³¹ Lu sư oei kơkuh kơ rup yang đơ̆ng Mika man. Kơplah lăm chăl hnam akŭm Kră Yang 'Bok Kei-Dei oei tơ Silô.