Lu 17 - Sơ̆p Hlabơar Nơ̆r 'Bok Kei-Dei

¹ Lăm groi kông Êphraim đei minh 'nu bơngai drŏ-nglo anăn sư Mika.

² Sư khan kơ mĕ sư: Minh-rơbâu minh-hrĕng tơpei hu đe tơtông đơ̆ng ih; ih hiap bơngai bu iŏk jên liơ kư̆m bưh inh gô mơ̆ng; jên noh dang ei lăm ti inh, inh iŏk jên noh. Mĕ sư khan: Apinh Kră Yang tuh ăn tơdrong pŭn hiôk kơ kon dăm inh!

³ Wă Mika pơdrâu kơ mĕ sư minh-rơbâu minh-hrĕng tơpei hu 'noh; mĕ sư khan: Hu 'nâu mĕ pơkă wă 'măn pha pơyơ̆r kơ Kră Yang hăm anăn kon man rup Yang păng tuh rup yang. Thoi noh mĕ pơdrâu ăn kơ kon hu 'noh dang ei.

⁴ Mika pơdrâu hu noh kơ mĕ sư; mĕ sư iŏk hloi 'bar-hrĕng hlak hu ăn kơ bơngai hling pơm rup yang na sư hling hloi rup yang; đe 'măn lê̆ lăm hnam Mika.

⁵ Mika kư̆m pơm hnam kơkuh kơ yang; sư pơm minh blah ao êphot păng dôm tŏ yang; sư pơk ăn kơ kon drŏ-nglo sư pơm 'bok soi.

⁶ Kơplah 'noh ưh kơ đei bu pơm pơtao lăm Isơrael. Rim 'nu kư̆ kơ pơm kiơ̆ kơdih wă khan trŏ.

⁷ Đei minh 'nu tơdăm đơ̆ng pơlei Betlehem lăm dêh Juđa. Tơdăm âu tơpŭ kơ sư wơ̆ 'lŏ hăm kon pơlei Juđa.

⁸ Mă-lei sư lê̆ pơlei Betlehem lăm dêh char Juđa na năm chă jang sa tơ nai. Kơplah sư năm rok trong sư năm truh tơ groi kông Êphraim, weh ngôi tơ hnam Mika.

⁹ Mika apinh sư: Ih đơ̆ng yơ? Bơngai ei tơl: Inh bơngai Lêwi đơ̆ng pơlei Betlehem dêh Juđa, năm tơ âu wă chă anih oei jang sa.

¹⁰ Mika khan: Thoi ei Ih oei hăm inh, pơm 'bă păng 'bok soi inh. Na inh gô apah ih minh sơnăm mơjĭt tơpei hu, hơbĕn ao hrŭk, păng tơmam sa inh gô ăn kơ ih tơm mah.

¹¹ Na bơngai Lêwi sư lăp đon oei hơdai hăm Mika. Mika sư lăng bơngai 'lơ̆p 'noh nhen thoi kon drŏ-nglo sư kơdih.

¹² Na Mika pơk ăn kơ bơngai Lêwi noh pơm 'bok soi sư păng sư oei hloi lăm hnam Mika.

¹³ Mika khan: Dang ei inh băt boih kơ Kră Yang gô tơgŭm inh đei tơdrong pŭn hiôk, yua kơ bơngai Lêwi pơm 'bok soi inh boih.