Lu 15 - Sơ̆p Hlabơar Nơ̆r 'Bok Kei-Dei

Samsơn pơm 'mong kon pơlei Philistin

¹ Đunh 'biơ̆ dơ̆ng 'noh, kơplah lăm bơyan yuă 'ba mi, Samsơn năm apong kơ akăn sư, chĕp ba minh pơm kon bơbe. Sư khan: Apinh ih ăn kơ inh mơ̆t tơ'bơ̆p akăn inh lăm anih sư tep. Mă-lei 'bă drŏ-kăn noh ưh kơ ăn sư mơ̆t.

² 'Bă drŏ-kăn khan: Inh ngeh kơ ih areh ưh kơ wă kơ sư boih, na inh pơgơ̆p ăn kơ sư oei kơ buăl ih. Ih lăng oh drŏ-kăn sư hăm trŏ kơ 'lơ̆ng hloh kơ mŏ sư dah kiơ? Thoi noh ih jah iŏk oh sư đĕch tơplih kơ mŏ sư.

³ Na Samsơn sư tơl lu sư: Tơdah inh đei pơrăm lu bơngai Philistin, pă minh 'măng âu inh ưh pă đei yoch boih.

⁴ Thoi noh Samsơn năm rôp pêng-hrĕng tŏ mơja sư iŏk hơchô̆ hơpaih 'long ŭnh lơ. Sư chô̆ kiĕng 'bar tŏ mơja grôi hơbĭ na chô̆ minh hơchô̆ hơpaih 'long ŭnh sơlam 'bar tŏ kiĕng mơja grôi.

⁵ Sư soh hơchô̆ 'long ŭnh na achăng lu mơja 'noh mơ̆t lăm mir 'ba mi kon pơlei Philistin; thoi noh ŭnh sa 'ba lu sư chô̆ boih păng sa hloi 'ba mi tam mă yuă, soh sa pơđĭ hloi pơgar 'long ôliwơ păng pơgar hơmu.

⁶ Kon pơlei Philistin khan: Bu pơm tơdrong 'nâu? Đei khan: 'Noh đơ̆ng Samsơn ŏng bơngai pơlei Timna, yua kơ bơngai Timna rôp akăn sư ăn lê̆ kơ buăl sư oei pơm akăn. Na kon pơlei Philistin năm hloi truh tơ noh, soh pơlôch lê̆ bơngai drŏ-kăn ei hăm 'bă sư hloi.

⁷ Samsơn khan kơ lu sư: Đơ̆ng lu iĕm pơm thoi noh na inh kư̆m wă iung kơting pơm 'mong đơ̆ng kơ iĕm, mă keh 'mơ̆i na inh mă lê̆.

⁸ Sư iung bruh păng teh pơlôch đei lơ bơngai, na Samsơn jur oei tơ lăm hơgơp tơmo lăm pơlei Êtam.

⁹ Kon pơlei Philistin tŏk năm pơm kơđông tơ lăm char Juđa păng năm jơ̆p-jang truh tơ tơring Lêhi.

¹⁰ Lu bơngai Juđa jet lu sư: “Yua kơ kiơ lu iĕm tŏk blah lu nhôn?” Lu sư tơl: “Lu nhôn tŏk tơ âu wă rôp Samsơn. Lu nhôn wă pơm kơ sư thoi sư pơm boih kơ lu nhôn!”

¹¹ Na đei pêng-rơbâu 'nu lu bơngai Juđa jur tơ lăm hơgơp tơmo tơ pơlei Êtam khan kơ Samasơn: Ih ưh kơ băt hă kon pơlei Philistin boih pơgơ̆r lu bơ̆n? Liơ mă ih pơm kơ lu nhôn thoi noh? Sư tơl: Inh pơm 'mong tơwih kơ lu sư thoi lu sư đei pơm kơ inh boih.

¹² Lu sư khan dơ̆ng: Lu nhôn jur tơ âu wă rôp chô̆ ih, wă ba ih tơ lu bơngai Philistin. Samsơn tơl: Apinh iĕm pơkă pơkăm hăm inh 'mơ̆i, iĕm ưh kơ pơlôch inh.

¹³ Lu sư tơl: Ưh ôh, lu nhôn lăp chô̆ ih, năm ba ih tơ lu sư đĕch, nhôn ưh kơ wă pơlôch ih ôh. Thoi noh lu sư chô̆ Samsơn hăm tơlei giĕn 'nao kŭi 'bar dăng păng dui hơtŏk sư đơ̆ng lăm hơgơp tơmo.

¹⁴ Lăp lu sư truh tơ tơring Lêhi, kon pơlei Philistin lĕch tơ 'nguaih lu sư jreo ôr wă sơng iŏk Samsơn, na đei yang bơhngol Kră Yang jur oei hơdai sư hăm pơm kơ sư pran na tơlei giĕn đêl đe chô̆ ti sư 'noh nhen thoi brai ŭnh sa kơtĕch đĭ, hloi đơ̆ng ti sư.

¹⁵ Sư 'bôh kơting kang aseh iĕ bri 'nao lôch; sư dônh chĕp kơting kang aseh noh teh pơlôch minh-rơbâu 'nu bơngai Philistin.

¹⁶ Đang kơ 'noh Samsơn sư khan: Hăm minh pôm kơting kang aseh iĕ bri đĕch inh teh bơngai lôch lơ rơkhŭl rơkhăl măl; hăm minh pơm kơting kang aseh iĕ bri đĕch inh đei pơlôch boih minh-rơbâu 'nu bơngai.

¹⁷ Lăp đang kơ sư pơma thoi noh, sư klơ̆m hŭt hloi kơting kang aseh iĕ bri 'noh; đe krao hloi anăn anih 'noh Ramat Lêhi.a

¹⁸ Yua kơ sư rơhing 'maih nhă đak dêh na sư krao apinh Kră Yang khan: “Ih ăn boih kơ đĭch đam ih tơdrong jơnei tih dêh âu, na dang ei inh wă lôch ngôi rơhing đak, na kư̆m wă huŏng 'bônh lăm ti lu bơngai ưh kơ chu kăt tơdra akar hă?”

¹⁹ Kră Yang 'Bok Kei-Dei ăn tơmo hơđang tơ lăm tơring Lêhi, na đei đak lĕch ro hloi: Samsơn đang kơ sư nhă lăm jơhngơ̆m sư 'brưk đei jơhngơ̆m pran dơ̆ng. Yua kơ 'noh na đe krao anăn đak mơlĕch âu Ên Hakor, truh tơ dang ei đak mơlĕch 'noh tơ tơring Lêhi.

²⁰ Samsơn kơplah lăm chăl kon pơlei Philistin pơgơ̆r. Samsơn pơm 'bok sek tơlang kơ bơngai Isơrael lăm 'bar-jĭt sơnăm.