Lu 14 - Sơ̆p Hlabơar Nơ̆r 'Bok Kei-Dei

Samsơn oei akăn

¹ Samsơn jur năm truh tơ pơlei Timna. Tơ noh sư 'bôh minh 'nu adruh bơngai Philistin.

² Sư wih brŏk roi kơ mĕ 'bă sư: Kon đei 'bôh minh 'nu adruh bơngai Philistin lăm pơlei Timna; dang ei apinh iĕm rôp ăn adruh 'noh pơm akăn kon.

³ Mĕ 'bă sư tơl: Liơ ưh kơ đei ôh hă minh 'nu adruh lăm kon pơlei pơla bơ̆n, lăm adrĕch adrung bơ̆n, na mă kon khan wă chă akăn đơ̆ng kon pơlei bơngai Philistin lu sư ưh kơ đei kăt tơdra akar ôh. Samsơn khan kơ 'bă sư: Apinh 'bă rôp ăn kơ inh bĕ adruh 'noh, yua kơ inh lăp hưch kơ sư boih.

⁴ Mĕ 'bă sư ưh kơ băt ôh tơdrong 'noh lĕch đơ̆ng Kră Yang; wă chă tơdrong trŏ wă kơ sư pơm kơ kon pơlei Philistin, yua kơ kơplah 'noh lu bơngai Philistin oei pơgơ̆r lu bơngai Isơrael.

⁵ Samsơn jur năm tơ pơlei Timna hơdai hăm mĕ 'bă sư. Lăp lu sư truh 'bơ̆t pơgar hơmu pơlei Timna 'bôh đei minh pơm kon dăm-brang grĕnh bruh châu Samsơn.

⁶ Yang bơhngol 'lơ̆ng Kră Yang jur oei hơdai sư hăm tơdrong pran. Sư rôp hek hơđah kon dăm-brang nhen thoi hek kon bơbe hăm ti sư; mă-lei sư ưh kơ đei roi kơ mĕ 'bă sư băt ôh tơdrong sư đei pơm.

⁷ Đơ̆ng noh sư jur năm pơma dơnuh hăm adruh; sư hưch kơ adruh ei tơpă.

⁸ Đơ̆ng rŏng kơ 'noh đunh 'biơ̆, sư wơ̆t năm dơ̆ng wă iŏk oei kơ bơngai adruh 'noh; sư weh lăng đơ̆ng tơ dăm-brang lôch, 'bôh lăm kơting klak dăm-brang 'noh đei sal sut oei đei đak sut.

⁹ Sư iŏk đak sut 'noh chĕp sa rah rok trong. Sư kư̆m ăn kơ mĕ 'bă sư sa. Mă-lei sư ưh kơ đei roi ăn kơ mĕ 'bă sư ôh sư iŏk đak sut 'noh đơ̆ng lăm kơting klak dăm-brang lôch.

¹⁰ 'Bă sư năm tơ hnam adruh 'noh, Samsơn hơmet tơmam sŏng sa, pơm rok thoi lu bơngai tơdăm oei akăn juăt kơ pơm.

¹¹ Lăp kon pơlei pơla 'bôh Samsơn, đe krao hloi pêng-jĭt 'nu bơngai tơdăm wă kơ pơgơ̆p pơm buăl juăt hăm sư.

¹² Samsơn khan kơ lu sư: Inh gô pơpơn lu iĕm minh tơdrong; lăm tơpơh năr đe pơm giĕng et sa pơkong tih, tơdah lu iĕm tơlang trŏ inh gô apah lu iĕm pêng-jĭt blah che brai se păng pêng-jĭt blah ao tai đe hrŭk pơguăng.

¹³ Tơdah lu iĕm ưh kơ gơh tơblang lei lu iĕm gô ăn kơ inh thoi tơ kơpal 'noh mơ̆n, lu sư tơl: Ih pơpơn bĕ ăn kơ lu nhôn mơ̆ng.

¹⁴ Samsơn pơpơn. Đơ̆ng tơmam gơh sa lĕch tơmam sa; Đơ̆ng tơmam kơtang lĕch tơmam 'băt 'ngam. Lăm pêng năr chơtăng lu sư ưh kơ gơh kơ tơlang ôh.

¹⁵ Truh năr mă puăn lu sư khan hăm akăn Samsơn: Ih athei pơlung klo ih athei sư roi ăn kơ bơ̆n tơlang nơ̆r pơpơn 'noh; tơdah ưh lu nhôn gô soh tŭt ih hăm hnam 'bă ih; hăm trŏ kơ ih krao pơtơm lu nhôn năm tơ âu wă tơpơ̆k lu nhôn 'bă?

¹⁶ Akăn Samsơn nhơ̆m 'bơ̆t sư, khan: Ih areh kơ inh, ih ưh kơ đei 'mêm kơ inh ôh. Ih pơpơn kon pơlei pơla inh athei ăn, mă ih ưh kơ đei roi tơlang kơ inh tơlang liơ, Samsơn tơl: 'Nhŏ kơ mĕ 'bă inh, inh kư̆m ưh kơ roi 'mơ̆i lei liơ inh athei roi kơ ih?

¹⁷ Lăm tơpơh năr et sa noh adruh 'noh nhơ̆m ling-lang 'bơ̆t sư; hlôi kơ tơpơh năr boih sư pă kĕ ĕnh sư tơlang ăn kơ akăn sư, yua kơ akăn sư nŏng lung sư. Na akăn sư roi ăn kơ lu kon pơlei pơla sư tơlang tơdrong pơpơn noh.

¹⁸ Truh đĭ tơpơh năr boih adrol kơ 'năr wă mơ̆t, lu bơngai tơdăm lăm kon pơlei năm khan kơ Samsơn na roi tơblang tơdrong pơpơn noh: Đei kiơ mă 'ngam hloh kơ đah sut? Đei kiơ mă pran hloh kơ dăm-brang? Samsơn tơl khan: Tơdah lu iĕm ưh kơ choh rơuơ hăm rơmo adruh inh, lei lu iĕm ưh kơ gơh ôh tơlang nơ̆r inh pơpơn.

¹⁹ Kơplah 'noh yang bơhngol Kră Yang jur năm jur oei hăm sư lăm tơdrong pran. Sư jur năm tơ pơlei Askalon pơlôch pêng-jĭt 'nu bơngai pơlei noh na plôh iŏk pêng-jĭt blah ao lu sư na, apah ăn kơ lu bơngai tơlang trŏ nơ̆r pơpơn 'noh hei. Đơ̆ng noh lăm jơhngơ̆m sư blĕk dêh nhen thoi ŭnh, sư wih brŏk tơ hnam 'bă sư.

²⁰ Akăn Samsơn rôp oei kơ minh 'nu tơdăm, bơngai mă đe rơih pơm buăl juăt hăm sư năr sư oei.