Lu 13 - Sơ̆p Hlabơar Nơ̆r 'Bok Kei-Dei

Tơpŭ kơ Samsơn

¹ Kon pơlei Isơrael pơm kơnê̆ 'bơ̆t anăp Kră Yang dơ̆ng; yua kơ thoi noh na Kră Yang pơjao lu sư lăm tơpang ti lu bơngai Philistin lăm puăn-jĭt sơnăm.

² Đei minh 'nu bơngai pơlei Sôra đơ̆ng lăm adrĕch adrung Đan, anăn sư Manôa. Akăn sư bơngai hơwŏng, ưh kơ đei kon.

³ Linh jang 'lơ̆ng Kră Yang jur năm 'bơ̆t bơngai drŏ-kăn 'noh na khan: Ih bơngai hơwŏng ưh kơ đei kon, mă-lei ih gô anăp păng gô tơpŭ minh 'nu kon drŏ-nglo.

⁴ Ih athei kơchăng, 'nĕ kơ huch sik đak hơmu dah tơmam kiơ suai păng kư̆m 'nĕ kơ sa tơmam kiơ mă ưh kơ rơgoh,

⁵ yua kơ ih gô anăp păng tơpŭ kơ minh 'nu kon drŏ-nglo. Săng kep dah săng hơkôih ưh kơ gơh 'bơm kơ̆l sư, yua kơ bơngai 'lơ̆p âu sư gô jing bơngai Nasirita wă 'măn kơ Kră Yang 'Bok Kei-Dei iŏk đơ̆ng năr tơpŭ kơ sư truh kơ lôch. Ning-mônh sư gô pơtơm dŏng pơklaih bơngai Isơrael đơ̆ng lăm tơpang ti Philistin.

⁶ Bơngai drŏ-kăn noh năm roi kơ klo sư: Đei minh 'nu bơngai đơ̆ng Kră Yang 'Bok Kei-Dei năm tơ'bơ̆p inh, muh măt sư nhen akâu linh jang 'lơ̆ng Kră Yang 'Bok Kei-Dei trŏ kơ hli krưp tơpă. Inh ưh kơ pơ̆n jet sư đơ̆ng yơ; sư kư̆m ưh kơ tơbăt kơ inh anăn sư,

⁷ Mă-lei sư đei khan kơ inh: 'Nâu ih gô anăp păng tơpŭ kơ minh 'nu kon drŏ-nglo; thoi noh na ih 'nĕ kơ huch sik đak hơmu, dah tơmam kiơ suai păng 'nĕ kơ sa tơmam kiơ mă ưh kơ rơgoh, yua kơ bơngai 'lơ̆p âu iŏk đơ̆ng năr tơpŭ kơ sư truh tơ sư lôch sư gô jing bơngai Nasarit ăn kơ Kră Yang 'Bok Kei-Dei.

⁸ Manôa sư krao khan apinh Kră Yang: Ơ Kră Yang, inh apinh Ih ăn bơngai bu mă Ih wơh 'noh ki, năm dơ̆ng tơ lu nhôn wă kơ bơtho lu nhôn dôm tơdrong wă pơm liơ kơ kon wă tơpŭ tơ anăp âu kơnh.

⁹ Kră Yang 'Bok Kei-Dei kơtơ̆ng nơ̆r krao khan đơ̆ng Manôa lei na linh jang 'lơ̆ng Kră Yang 'Bok Kei-Dei năm tơ'bơ̆p dơ̆ng bơngai drŏ-kăn noh kơplah sư oei tơ mir; kơplah 'noh Manôa klo sư ưh kơ đei 'bôh hơdai hăm sư tơ noh.

¹⁰ Sư kơdâu năm roi hloi kơ klo sư: Ih lăng to, bơngai mă jur tơ inh minh năr 'noh ki sư 'nao jur tơ'bơ̆p inh dơ̆ng.

¹¹ Manôa iung, năm kiơ̆ akăn sư. Lăp truh wă jê̆ bơngai 'noh, sư khan hloi: Ih hăm trŏ kơ bơngai mă pơma dơnuh boih hăm akăn inh? Sư tơl khan: Trŏ boih inh.

¹² Manôa khan dơ̆ng: “Mưh nơ̆r Ih pơma trŏ 'blep thoi noh, lei tơdrong juăt kơ bơngai hơ'lơ̆p âu chă arih sa, jang sa liơ?”

¹³ Linh jang 'lơ̆ng Kră Yang tơl tơwih kơ Manôa: “Bơngai drŏ-kăn âu athei kơchăng lăm dôm tơdrong mă đơ̆ng inh đei pơkă boih.

¹⁴ Sư ưh kơ gơh kơ sa tơmam kiơ đơ̆ng lăm pơgar hơmu, kư̆m 'nĕ kơ huch sik đak hơmu dah tơmam kiơ suai; kư̆m athei 'nĕ kơ sa tơmam kiơ mă ưh kơ rơgoh; sư athei răk dôm tơdrong mă inh pơkă kơ sư boih.”

¹⁵ Manôa apinh dơ̆ng linh jang 'lơ̆ng Kră Yang: Nhôn apinh gơ̆t ih oei 'bơ̆t âu wă kơ lu nhôn hơmet tơmam sa 'buh sa kon bơbe hăm ih.

¹⁶ Linh jang 'lơ̆ng đơ̆ng Kră Yang tơl Manôa. Mă đơ̆ng ih wă gơ̆t inh 'bơ̆t âu ră mă-lei inh kư̆m ưh kơ gơh sa tơmam ih mơ̆n. Mă-lei tơdah ih wă pơyơ̆r tơmam soi 'buh ih, athei pơyơ̆r ăn kơ Kră Yang. Manôa ưh kơ băt 'noh linh jang 'lơ̆ng Kră Yang.

¹⁷ Manôa jet apinh jang 'lơ̆ng Kră Yang: Anăn Ih bu, wă kơ lu nhôn pơyom mưh nơ̆r ih khan âu trŏ 'blep?

¹⁸ Linh jang 'lơ̆ng Kră Yang khan: Liơ mă ih jet anăn inh, anăn inh jing hlĭch dêh.

¹⁹ Thoi noh Manôa rôp kon bơbe hăm tơpŭng na pơyơ̆r ăn kơ Kră Yang tơ kơpal tơmo. Kră Yang pơm tơ'bôh minh tơdrong hlĭch chrơp đei Manôa păng akăn sư oei tơ noh.

²⁰ Kơplah 'bơ̆t pla ŭnh đơ̆ng chơnang soi dơng tŏk tơ plĕnh, linh jang 'lơ̆ng Kră Yang kư̆m tŏk hơdai hăm pla ŭnh 'noh; 'bôh thoi noh Manôa păng akăn sư kŭp kơ̆l bon tơ teh.

²¹ Wă linh jang 'lơ̆ng Kră Yang ưh pă đei jur đơ̆ng tơ Manôa hăm akăn sư na Manôa sư băt kơnăl 'noh linh jang 'lơ̆ng đơ̆ng Kră Yang.

²² Sư pơma dơnuh hloi hăm akăn sư: Tơpă, băt ba gô lôch yua kơ ba 'bôh boih Kră Yang 'Bok Kei-Dei!

²³ Mă-lei akăn sư tơl: Tơdah Kră Yang wă pơlôch ba, lei Sư ưh kơ iŏk tơmam soi 'buh păng tơmam soi tơpŭng ba pơyơ̆r đơ̆ng tơpang ti ba, lei thoi kư̆m ưh kơ tơbăt kơ ba dôm tơdrong noh ôh, Sư ba đei kơtơ̆ng năr âu.

²⁴ Bơngai drŏ-kăn noh tơpŭ kơ minh 'nu kon drŏ-nglo, sư krao anăn Samsơn. Bơngai 'lơ̆p 'noh wơ̆ 'lŏ, Kră Yang ăn tơdrong pŭn hiôk kơ sư.

²⁵ Yang bơhngol 'lơ̆ng Kră Yang pơih ăn kơ jơhngơ̆m sư pran kơplah sư oei tơ lăm tơring Mahaneh Đan sơlam pơlei Sôra păng Êstaôl.