Lu 11 - Sơ̆p Hlabơar Nơ̆r 'Bok Kei-Dei

Jeptha pơm 'bok sek tơlang

¹ Jeptha, bơngai Gileat, sư bơngai nuih kơtang. Sư kon drŏ-nglo bơngai drŏ-kăn đi; 'bă sư bơngai Gileat.

² Akăn bơngai Gileat kư̆m tơpŭ kơ dôm 'nu kon drŏ-nglo nai. Truh tơ lu kon drŏ-nglo sư 'lŏ ngăl boih, lu sư puh tơweh lê̆ Jeptha jăk tơ nai, khan: Ih ưh kơ gơh iŏk tơmam đơ̆ng hnam dơnŏ bơ̆n âu ôh, yua kơ ih kon drŏ-nglo đơ̆ng drŏ-kăn nai.

³ Đơ̆ng noh Jeptha kơdâu jăk ataih đơ̆ng lu 'nhŏng oh sư, sư oei lăm tơring Tôp; tơ noh đei lu bơngai pơm kơchu, lu sư pơm jơhngơ̆m đon păng Jeptha;

⁴ Đơ̆ng rŏng kơ 'noh kon pơlei Ammôn tơblah hăm lu bơngai Isơrael.

⁵ Lu kră pơgơ̆r bơngai Isơrael đơ̆ng char Gileat năm tơ tơring Tôp năm iŏk Jeptha brŏk năm tơblah kon pơlei Ammôn.

⁶ Lu sư khan kơ Jeptha: Ih wih brŏk bĕ pơm yŏng pơgơ̆r lu nhôn, wă kơ lu bơ̆n năm blah hăm kon pơlei Ammôn.

⁷ Jeptha khan kơ lu kră Gileat: Hăm trŏ kơ iĕm areh kơ inh puh tơweh lê̆ inh đơ̆ng hnam 'bă inh na dang ei wă lu iĕm đei tơdrong gleh pơmat truh, lu iĕm năm tơ inh?

⁸ Lu bơngai kră char Gileat khan kơ Jeptha: Lê̆ pă jơ̆ tơdrong so wă kơ apinh ih năm hơdai hăm lu nhôn blah kon pơlei Ammôn, na wă kơ ih pơm yŏng kơ đĭ-đăng kơ lu bơngai mă oei lăm dêh Gileat.

⁹ Jeptha khan dơ̆ng: Tơdah lu iĕm krao inh brŏk năm blah lu kon pơlei Ammôn, na mưh Kră Yang pơjao lu sư lăm ti inh boih, lei na inh gô pơm yŏng pơgơ̆r lu iĕm.

¹⁰ Lu kră lăm char Gileat khan kơ Jeptha dơ̆ng: Lu nhôn gô pơm kiơ̆ thoi nơ̆r ih pơma; apinh Kră Yang pơm kơdranh kơ lu bơ̆n.

¹¹ Thoi noh Jeptha năm hơdai hăm lu kră char Gileat. Kon pơlei pơk sư pơm yŏng linh păng wei-lăng pơgơ̆r lu sư. Jeptha pơma dơ̆ng dôm nơ̆r sư pơkă pơkăm noh 'bơ̆t anăp Kră Yang tơ pơlei Mispa.

¹² Na Jeptha wơh bơngai năm truh tơ pơtao kon pơlei Ammôn khan: Nhôn hăm ih đei tơdrong kiơ na ih mah năm wang tơblah iŏk char nhôn.

¹³ Pơtao kon pơlei Ammôn tơl lu bơngai mă đơ̆ng Jeptha wơh: 'Noh yua kơ đơ̆ng lu bơngai Isơrael lĕch đơ̆ng dêh char Êyiptơ sơ̆, lu sư blah tơgar iŏk dêh char inh iŏk đơ̆ng đak Krong Arnôn truh tơ đak Krong Jabôk păng truh tơ đak Krong Jôrđăn; thoi noh dang ei pơdrâu kơ nhôn dêh char 'noh mă 'lơ̆ng bĕ.

¹⁴ Jeptha sư wơh dơ̆ng bơngai năm tơ pơtao Ammôn khan:

¹⁵ Jeptha khan thoi âu: Lu bơngai Isơrael ưh kơ đei tơgar iŏk teh char Môap ôh, kư̆m ưh kơ đei tơgar iŏk dêh char Ammôn,

¹⁶ Đơ̆ng rŏng kơ lu bơngai Isơrael lĕch đơ̆ng dêh char Êyiptơ, lu sư năm rok trong tơmăn glă truh tơ đak dơsĭ 'Brê, đang kơ noh năm truh tơ pơlei Kades.

¹⁷ Kơplah noh sơ̆ bơngai Isơrael sư kư̆m wơh lu bơngai năm tơ pơtao Eđôm, lu sư khan: Asong lu nhôn năm rok trong dêh char ih, mă-lei pơtao Eđôm ưh kơ đei ăn ôh. Lu sư kư̆m wơh bơngai năm tơ pơtao Môap, sư kư̆m ưh kơ ăn năm. Thoi noh na lu bơngai Isơrael kư̆ kơ oei 'bơ̆t pơlei Kades.

¹⁸ Đơ̆ng noh lu sư wơ̆t năm rok trong tơmăn glă, dăr kơ dêh Eđôm păng dêh Môap; đơ̆ng noh lu sư năm truh tơ gah hơlĕch kơ dêh char Môap, lu sư pơm anih oei pơdơh tơ gah to kơ đak Krong Arnôn. Lu sư ưh kơ mơ̆t ôh tơ lăm char Môap, yua kơ đak Krong Arnôn noh sư hơdral dêh char Môap.

¹⁹ Pơ̆ng 'noh bơngai Isơrael wơh lu bơngai năm tơ Sihôn, pơtao bơngai Amôrit, oei tơ pơlei Hesbôn khan kơ sư: Nhôn apinh ih asong lu nhôn năm rok trong lăm dêh char ih wă năm mơ̆t tơ dêh char lu nhôn.

²⁰ Mă-lei pơtao Sihôn ưh kơ lui ngeh kơ lu bơngai Isơrael, na sư ưh kơ ăn lu bơngai Isơrael năm rok trong dêh char sư. Lei boih ră pơtao kư̆m oei krao akŭm đĭ-đăng linh sư, năm pơm kơđông tơ pơlei Jahas tơblah hăm lu bơngai Isơrael.

²¹ Na Kră Yang 'Bok Kei-Dei lu bơngai Isơrael pơjao, Sihôn păng đĭ-đăng lu linh sư lăm ti bơngai Isơrael; tơblah jei lu bơngai Isơrael, thoi noh na lu sư iŏk đĭ-đăng dêh char Amôrit hăm lu bơngai mă oei lăm char noh.

²² Iŏk đĭ dêh char kon pơlei Amôrit iŏk đơ̆ng đak Krong Arnôn truh tơ đak krong Jabôk, hăm đơ̆ng tơmăn glă dĭng truh tơ đak Krong Jôrđăn.

²³ Thoi noh Kră Yang 'Bok Kei-Dei lu bơngai Isơrael puh tơweh boih kon pơlei Amôrit 'bơ̆t anăp lu bơngai Isơrael kon pơlei pơla Sư; na liơ ih wă gơh pơdrâu iŏk dêh char noh đơ̆ng?

²⁴ Hăm trŏ kơ ih đei iŏk kiơ mă đơ̆ng Kêmôs yang ih ăn kơ ih? Kŭm thoi, lu nhôn kư̆m iŏk wei đĭ-đăng char mă đơ̆ng Kră Yang 'Bok Kei-Dei nhôn ăn kơ nhôn.

²⁵ Ih hăm trŏ hơgei hloh kơ Balak kon drŏ-nglo Siôr pơtao Môap ưh? Sư hăm đei nuih pơm năr ayơ pơjah pơjăng dah tơhil tơblah hăm lu bơngai Isơrael ưh?

²⁶ Lăm pêng-hrĕng sơnăm mă lu bơngai Isơrael blah iŏk oei tơ pơlei Hesbôn păng lăm lu pơlei iĕ pơlei Arôe hăm lu pơlei iĕ sư păng đĭ-đăng pơlei oei tơter đak Krong Arnôn; liơ mă ih ưh kơ blah iŏk teh noh kơplah noh?

²⁷ Inh ưh kơ đei pơm yoch hăm ih, mă-lei ih pơm glăi hăm inh, wă tơblah hăm inh. Apinh Kră Yang, tơ'ngla sek tơlang, sek tơlang ăn kơ lu bơngai Isơrael păng kon pơlei Ammôn!

²⁸ Mă-lei pơtao Ammôn ưh kơ wă mơ̆ng nơ̆r lu bơngai mă đơ̆ng Jeptha wơh năm tơ sư.

²⁹ Kơplah noh Yang bơhngol 'lơ̆ng Kră Yang jur oei hăm Jeptha; sư năm hlôi kơ char Gileat păng char Manase, năm truh hloi tơ pơlei Mispa lăm char Gileat; đơ̆ng noh sư năm blah kon pơlei Ammôn.

³⁰ Jeptha krao apinh pơkă hăm Kră Yang, khan: Tơdah Ih pơjao lu kon pơlei Ammôn lăm tơpang ti inh,

³¹ mưh inh brŏk đơ̆ng tơblah hăm kon pơlei Ammôn jei inh, bơngai bu mă lĕch đơ̆ng 'măng hnam inh, sơng inh. Bơngai 'noh gah Kră Yang, inh gô pơyơ̆r sư pơm tơmam soi 'buh ăn kơ Ih.

³² Đang kơ 'noh Jeptha năm truh tơ kon pơlei Ammôn tơblah hăm lu sư; Kră Yang pơjao lu kon pơlei Ammôn lăm tơpang ti sư.

³³ Đơ̆ng noh Jeptha blah iŏk 'bar-jĭt tŏ pơlei, đơ̆ng pơlei Arôe truh tơ wă jê̆ pơlei Minit păng truh hloi tơ pơlei Abel Kêramim. Lăm tơdrong tơblah 'nâu lu kon pơlei Ammôn thuơ tih tơpă. Thoi noh kon pơlei pơla Ammôn chu mơ̆t kiơ̆ tơm tơdrong lu bơngai Isơrael.

³⁴ Wă Jeptha brŏk tơ hnam sư tơ pơlei Mispa na đei kon adruh sư lĕch năm sơng sư, chĕp hơgơ̆r iĕ tap suang hloi. Năm sơng sư kon adruh 'noh kon pơm sư; 'nguaih kơ kon adruh sư noh sư ưh kơ đei kon drŏ-nglo dah kon drŏ-kăn nai dơ̆ng.

³⁵ Lăp sư 'bôh kon drŏ-kăn sư, sư hek hloi ao păng khan: Ơ, ơ mŏ adruh, ih pơm kơ 'bă hơ'ngon dêh tơpă, kon pơm kơ jơhngơ̆m 'bă rŭng răng! Yua kơ 'bă đei krao khan pơkă pơkăm hăm Kră Yang boih ưh kơ gơh wă tơplih nơ̆r âu boih.

³⁶ Kon drŏ-kăn sư tơl, “Ơ 'bă, tơdah ih đei krao khan pơkă pơkăm boih hăm Kră Yang, apinh ih pơm bĕ kơ kon kiơ̆ thoi đơ̆ng nơ̆r ih pơkă pơkăm noh, yua kơ Kră Yang đei iung kơting ăn kơ lu bơngai ayăt kơ ih 'noh kon pơlei Ammôn.”

³⁷ Kon drŏ-kăn sư khan kơ 'bă sư: Apinh 'bă drơ̆ng iŏk nơ̆r kon pơma âu: Wă kơ kon rơhơi jơhngơ̆m lăm 'bar khei, kon gô tŏk oei tơ kơpal kông hăm lu mŏ oh, buôl buăl kon nhơ̆m hmoi kơ kon oei adruh hơlai hơnĭl layơ gơh iŏk klo.

³⁸ Jeptha tơl: Kon năm bĕ. Thoi noh sư lê̆ kon sư năm lăm 'bar khei hơdai hăm lu mŏ oh, buôl buăl sư. Chă ngôi tơ kông hăm lu mŏ oh Sư nhơ̆m hmoi kơ sư wă oei adruh hơlai.

³⁹ Truh đĭ 'bar khei, sư wih wơ̆t brŏk tơ 'bă sư; đơ̆ng noh 'bă sư pơm kơ kon sư kiơ̆ kơ nơ̆r sư đei pơkă pơkăm boih. Kon adruh sư oei hơlai hơnĭl ưh tam băt kơ drŏ-nglo ôh. Yua kơ đơ̆ng noh lu bơngai Isơrael sư đei tơdrong juăt:

⁴⁰ Rim sơnăm rim 'nu kon drŏ-kăn Isơrael năm nhơ̆m hmoi kơ kon drŏ-kăn Jeptha, bơngai Gileat lăm puăn năr.