Lu 10 - Sơ̆p Hlabơar Nơ̆r 'Bok Kei-Dei

Tôla păng Jair

¹ Đơ̆ng rŏng kơ Abimêlek lôch, Tôla kon drŏ-nglo Pua sâu Đôđô, sư bơngai Isakar, iung dŏng pơklaih lu bơngai Isơrael. Sư oei tơ pơlei Samir lăm kông Êphraim.

² Sư pơm 'bok sek tơlang kơ lu bơngai Isơrael lăm 'bar-jĭt pêng sơnăm; đơ̆ng noh sư lôch păng đe 'bŭ sư tơ pơlei Samir.

³ Đơ̆ng rŏng kơ sư lôch đei Jair, bơngai Gileat, iung pơm 'bok sek tơlang lu bơngai Isơrael lăm 'bar-jĭt 'bar sơnăm.

⁴ Sư đei pêng-jĭt 'nu kon drŏ-nglo hao pêng-jĭt tŏ aseh iĕ păng pơgơ̆r pêng-jĭt tŏ pơlei tơ lăm dêh Gileat. Lu pơlei âu đe anăn tơ tơring Hawôt Jar truh tơ dang ei.

⁵ Lăp Jair lôch na đe 'bŭ sư tơ pơlei Kamôn.

⁶ Đơ̆ng rŏng kơ noh lu bơngai Isơrael pơm dơ̆ng tơdrong kơnê̆ 'bơ̆t anăp Kră Yang lu sư kơkuh kơ lu yang Baal lu yang Astarôt, lu yang bơngai Aram, lu yang bơngai Siđôn, lu yang bơngai Môap, lu yang bơngai Ammôn păng lu yang kon pơlei Philistin. Lu sư achăng lê̆ Kră Yang păng ưh kơ chu kiơ̆ Sư.

⁷ Kră Yang hil mĭl kơ lu bơngai Isơrael; na Kră Yang jao lu sư kơ lu bơngai Philistin păng lu bơngai Ammôn pơgơ̆r lu sư.

⁸ Iŏk đơ̆ng sơnăm noh, 'bar khŭl adrĕch 'nâu pơgŏ pơđep pơjuă bơhlơ̆r lu sư lăm mơjĭt-tơhngam sơnăm. Lu sư pơjuă pơđep kon pơlei Isơrael oei tơ gah hơlĕch kơ đak Krong Jôrđăn lăm char Gileat tơ tơring sơ̆ char bơngai Amôrit

⁹ Kon pơlei Ammôn kư̆m tŏk kơ đak Krong Jôrđăn, năm blah lu bơngai Juđa, lu bơngai Bênjamin păng lu bơngai Êphraim; lu bơngai Isơrael đei tơdrong pơmat-tat tih tơpă.

¹⁰ 'Nâu lu bơngai Isơrael krao apinh Kră Yang, na khan: Lu nhôn đei pơm yoch hăm Ih lu nhôn achăng lê̆ Kră Yang 'Bok Kei-Dei lu nhôn păng kơkuh kơ lu yang Baal.

¹¹ Kră Yang khan kơ lu bơngai Isơrael: Hăm trŏ Inh dŏng pơklaih lu iĕm hlôi boih đơ̆ng dêh Êyiptơ, klaih đơ̆ng kon pơlei Amôrit, klaih đơ̆ng kon pơlei Ammôn păng klaih đơ̆ng kon pơlei Philistin leh ưh?

¹² Kŭm pơklaih iĕm đơ̆ng lu kon pơlei Siđôn, kon pơlei Amalek păng kon pơlei Maôn pơjuă pơđep lu iĕm. Na lu iĕm krao ôr apinh Inh, na Inh hăm dŏng pơklaih lu iĕm boih đơ̆ng ti lu sư?

¹³ Mă-lei lu iĕm oei achăng lê̆ Inh, kơkuh kơ lu yang nai yua kơ noh na Inh ưh pă wă dŏng pơklaih lu iĕm dơ̆ng.

¹⁴ Năm krao chă bĕ lu yang mă iĕm rơih iŏk boih; lê̆ lu sư dŏng pơklaih lu iĕm mưh lu iĕm đei gleh pơmat-tat?

¹⁵ Kon pơlei Isơrael khan kơ Kră Yang: Lu nhôn pơm yoch boih. Apinh ih pơm bĕ kơ lu nhôn kiơ̆ Ih lăng trŏ, na apinh Ih dŏng pơklaih lu nhôn năr 'nâu!

¹⁶ Lu sư hŭt lê̆ đĭ lu yang nai đêl lu sư kơkuh păng awih awăn chu kiơ̆ Kră Yang. Kră Yang Sư sơ'ngon dêh 'bôh lu bơngai Isơrael pơmat-tat.

¹⁷ Lu kon pơlei Ammôn akŭm băl pơm kơđông tơ dêh Gileat. Kon pơlei Isơrael kư̆m pơpôi băl, pơm kơđông tơ Mispa.

¹⁸ Lu 'bok pơgơ̆r dêh Gileat tơpinh dih băl: Bơngai bu mă blŭng-a năm blah kon pơlei Ammôn, bơngai 'noh sư gô pơm yŏng tih hloh lăm dêh char Gileat.