Lêwi 8 - Sơ̆p Hlabơar Nơ̆r 'Bok Kei-Dei

Môis pôk ăn Arôn păng lu kon drŏ-nglo sư pơm 'bok soi

¹ Kră Yang khan kơ Môis thoi âu:

² Chông ba bĕ Arôn păng lu kon drŏ-nglo sư, chĕp ba ao tai, đak rơmă pơgang 'bâu phu, rơmo dăm mơlôh, pơm tơmam soi pơyơ̆r huai đơ̆ng yoch, 'bar tŏ bơbe tơno păng 'bar tŏ 'bĕng ưh kơ đei 'buih.

³ Đơ̆ng noh akŭm đĭ-đăng kon pơlei, 'bơ̆t anăp Bơsŭn Anih Akŭm.

⁴ Môis pơm kiơ̆ hloi thoi nơ̆r Kră Yang pơkă. Kon pơlei akŭm hơdai tơ 'măng Bơsŭn Anih Akŭm.

⁵ Môis pơma hăm lu bơngai akŭm: 'Nâu tơdrong Kră Yang pơkă boih athei pơm.

⁶ Môis chông ba Arôn păng lu kon drŏ-nglo sư năm jê̆ păng iŏk đak pơ'nhao ăn kơ lu sư.

⁷ Sư pơhrŭk ăn ao hơ'bơ̆l, tơ̆n ăn tơlei tơ̆n, sư pơhrŭk ăn ao tai êphot păng tơ̆n tơlei tơ̆n êphot đe tanh wê̆; wă kơ êphot huay kơ tơpleh.

⁸ Sư atol bơnal tơ kơtơh păng pơklep Urim păng Thumim.

⁹ Sư yơ̆l mu tơ kơ̆l sư, tơ anăp mu sư pơklep plăk maih, wă khan môk pơtao 'lơ̆ng rơgoh kiơ̆ kơ nơ̆r Kră Yang tơtă kơ Môis.

¹⁰ Đơ̆ng noh, Môis iŏk pơgang 'bâu phu păng sư pik tơ Bơsŭn Anih Akŭm păng dôm tơmam lăm noh păng 'măn lê̆ pha jing tơmam rơgoh wă pơyơ̆r.

¹¹ Sư tơdjoh pơgang 'bâu phu tơpơh wơ̆t tơ kơpal chơnang soi păng tơdjoh tơ lu tơmam wă yua lăm chơnang soi noh kơthŭng păng jơ̆ng sư 'măn lê̆ pha jing rơgoh wă pơyơ̆r.

¹² Sư kư̆m tuh pơgang 'bâu phu noh kơpal kơ̆l Arôn wă kơ sư jing rơgoh.

¹³ Đơ̆ng noh Môis krao lu kon drŏ-nglo Arôn năm jê̆ sư, pơhrŭk ăn ao tai, chô̆ tơlei tơ̆n, pơyơ̆l ăn môk kiơ̆ kơ Kră Yang đei pơtă kơ sư.

¹⁴ Sư dui ba rơmo dăm mơlôh, wă pơm tơmam soi huai đơ̆ng yoch. Arôn păng lu kon drŏ-nglo sư dan ti lu sư kơpal kơ̆l kon rơmo noh.

¹⁵ Môis pơlôch rơmo păng iŏk pham, yua hơnglâu ti sư pik pham noh tơ jum dăr ake chơnang soi wă kơ pơm kơ chơnang rơgoh; đơ̆ng noh tuh pham noh tơ jơ̆ng chơnang soi, thoi noh 'măn lê̆ chơnang soi rơgoh wă soi sơmah huai đơ̆ng yoch tơ noh.

¹⁶ Sư iŏk lu rơmă lom klak, mơ'nhao lom klơm, 'bar tŏ boh-lăn păng rơmă sư, đơ̆ng noh Môis chĕp 'buh tơ kơpal chơnang soi.

¹⁷ Oei pă lu akar, sĕch sư, ĭch sư, chĕp ba soh lê̆ tơ 'nguaih kơđông, kiơ̆ thoi nơ̆r Kră Yang 'Bok Kei-Dei đei pơkă kơ Môis.

¹⁸ Môis sư kư̆m athei chĕp ba triu tơno wă yua pơm tơmam soi 'buh, Arôn păng lu kon drŏ-nglo sư dan ti tơ kơpal kơ̆l kon sem noh.

¹⁹ Đơ̆ng noh Môis 'bet pơlôch păng tơtraih pham jum dăr chơnang soi.

²⁰ Đe kăt 'nhĕm bơbe noh kăt lơ kơnăt păng 'buh kơ̆l, hăm kơnăt păng lu rơmă noh.

²¹ Đang kơ đe iŏk đak ôp klak mot, lu tơkong, đơ̆ng noh Môis iŏk đĭ akâu kon bơbe tơno 'buh pơyơ̆r tơ kơpal chơnang soi, noh pơm tơmam soi 'buh đei 'bâu phu yua 'buh hăm ŭnh wă pơyơ̆r kơ Kră Yang kiơ̆ thoi đei tơtă kơ Môis boih.

²² Đơ̆ng noh Môis anhăk ba triu tơno nai dơ̆ng wă yua pơm tơmam soi pôk tơdrong jang, Arôn păng lu kon drŏ-nglo sư dan ti sư tơ kơpal kơ̆l triu tơno noh.

²³ Môis pơlôch kon triu, iŏk pham pik tơ hla đon gah 'ma Arôn păng pik tơ hơnglâu yŏng ti 'ma, tơ hơnglâu yŏng jơ̆ng 'ma Arôn.

²⁴ Môis kư̆m athei kon drŏ-nglo Arôn năm jê̆ păng kư̆m pik pham tơ hla đon gah 'ma lu sư, pik tơ hơnglâu yŏng ti 'ma lu sư pik tơ hơnglâu jơ̆ng 'ma lu sư; đơ̆ng noh Môis săi pham tăp dăr kơ chơnang soi.

²⁵ 'Blă đơ̆ng noh sư iŏk rơmă, rơmă kiĕng, đĭ-đăng lu rơmă lu mơ'nhao dom tơ klơm, 'bar tŏ boh-lăn hăm rơmă đơ̆ng 'bar tŏ boh-lăn păng blu gah 'ma.

²⁶ Sư iŏk dơ̆ng đơ̆ng lăm bai 'bĕng ưh kơ đei 'buih pông mă dan 'bơ̆t anăp Kră Yang boih, minh tŏ 'bĕng iĕ ưh kơ đei 'buih pông, minh tơpei 'bĕng đei jrâu đak rơmă păng minh hlak 'bĕng klang, dan lu 'bĕng noh tơ kơpal lu rơmă păng blu gah 'ma.

²⁷ Sư dan đĭ-đăng tơmam noh lăm ti Arôn păng lăm ti lu kon drŏ-nglo sư. Sư pơyơ̆r chro 'ma 'ngiĕo 'bơ̆t anăp Kră Yang.

²⁸ Môis iŏk hĭ tơmam noh đơ̆ng ti lu sư, chĕp ba 'buh pơyơ̆r tơ kơpal chơnang soi dan hơdai kơpal tơmam soi 'buh, noh jing tơmam soi pôk tơdrong jang đei 'bâu phu 'lơ̆ng tơmam ăn ŭnh sa pơyơ̆r kơ Kră Yang.

²⁹ Môis iŏk sĕch kơtơh kon triu tơno kiơ̆ kơ tơdrong pơyơ̆r chro 'ma 'ngiĕo 'bơ̆t anăp Kră Yang noh 'nhĕm ăn kơ Môis kiơ̆ thoi Kră Yang pơkă kơ sư.

³⁰ Đơ̆ng noh Môis iŏk đak rơmă pơgang 'bâu phu păng pham đơ̆ng kơpal chơnang soi, na prôi tơ Arôn păng hơbĕn ao sư păng kư̆m prôi tơ lu kon drŏ-nglo sư, tơ hơbĕn ao lu sư mơ̆n. Thoi noh Môis 'măn lê̆ kơ Arôn hăm lu hơbĕn ao sư păng lu kon drŏ-nglo sư, hăm hơbĕn ao lu sư.

³¹ Môis khan kơ Arôn păng lu kon drŏ-nglo sư: Lu iĕm athei pai sa 'nhĕm tơ anăp 'măng Bơsŭn Anih Akŭm păng sa hloi tơ noh, sa hăm 'bĕng lăm bai gah tơmam soi pôk tơdrong jang, thoi inh đei pơkă bơih kơ Arôn păng lu kon drŏ-nglo sư gô sa 'nhĕm noh.

³² Mă-lei lu iĕm athei soh lê̆ lu 'bĕng mă oei rơkah noh tơ lăm ŭnh.

³³ Lăm tơpơh năr lu iĕm ưh kơ gơh lĕch ôh đơ̆ng 'măng Bơsŭn Anih Akŭm, dĭng truh tơ dang yơ mă năr pôk tơdrong jang iĕm keh đang, yua kơ tơdrong pôk tơdrong jang iĕm noh keh tơpơh năr.

³⁴ Thoi đei pơm boih năr âu Kră Yang pơkă bơih, wă pơm kơ lu iĕm rơgoh đơ̆ng tơdrong yoch.

³⁵ Thoi noh iĕm athei oei kơtă tơ 'măng Bơsŭn Anih Akŭm măng păng 'năr, kơtĕch lăm tơpơh năr, pơm thoi Kră Yang đei pơkă boih kơnh hli kơ lu iĕm lôch, yua kơ Sư đei tơtă kơ inh thoi noh.

³⁶ Arôn păng lu kon drŏ-nglo sư pơm dôm tơdrong noh kiơ̆ thoi Kră Yang yua Môis tơtă ăn.