Lêwi 6 - Sơ̆p Hlabơar Nơ̆r 'Bok Kei-Dei

Tơmam soi huai đơ̆ng yoch glăi

¹ Kră Yang khan dơ̆ng kơ Môis thoi âu:

² Tơdah bu đei pơm yoch hăm Kră Yang, đơ̆ng sư pơma hơlĕnh hăm lu bơngai rông 'bôt sư gah tơmam sư pơjao, dah wei-lăng ăn; dah tơtông iŏk, dah pơgŏ sa đơ̆ng rông 'bôt sư kơdih.

³ Dah mă đei dônh tơmam đe hiong mă-lei sơngah pơkă pơkăm hơlĕnh dơ̆ng păng pơm minh lăm lu tơdrong mă đe juăt kơ pơm, noh yoch bơih.

⁴ Layơ mă đei glăi, pơm yoch boih, na sư athei pơdrâu tơmam đêl sư tơtông, dah đêl sư tơgar iŏk, dah đe jao kơ sư, dah tơmam đe hiong đêl sư dônh.

⁵ Dah tơmam đêl sư pơkăm pơkă hơlĕnh, sư athei pơdrâu mă tôm 'blep. Đơ̆ng noh sư athei 'mong dơ̆ng minh lăm pơđăm, kiơ̆ kơ tơdrong gĭt sư, ăn kơ tơ'ngla tơmam noh lăm năr mă sư pơyơ̆r tơmam soi huai đơ̆ng yoch sư pơm.

⁶ Kiơ̆ kơ ih khan hơgăt kơ sư, bơngai noh athei rôp triu tơno ưh kơ đei jĭ kiơ, na năm ba kơ 'bok soi pơyơ̆r kơ Kră Yang wă pơm tơmam soi huai đơ̆ng tơdrong sư pơm glăi kơ tơdrong juăt.

⁷ 'Bok soi gô soi sơmah huai đơ̆ng yoch bơngai noh 'bơ̆t anăp Kră Yang, na tơdrong yoch bơngai noh gơh mơnat ăn mă dôm tơdrong yoch kiơ sư đei pơm glăi.

Lu tơdrong juăt gah tơmam soi pơyơ̆r 'buh

⁸ Kră Yang khan kơ Môis thoi âu:

⁹ Tơtă bĕ kơ Arôn hăm lu kon drŏ-nglo sư: 'Nâu Jơ̆ tơdrong juăt gah tơmam soi 'buh, tơmam soi 'buh athei dan kơpal ŭnh tơ chơnang soi prăt măng dĭng truh tơ pơgê. Ŭnh kơpal chơnang soi athei wei khơ̆ng hơnơ̆ng.

¹⁰ 'Bok soi gô hrŭk ao che 'bui hơdrông păng hơbĕn che 'bui sư, na chup tơnuh đêl ŭnh sa tơ kơpal chơnang soi tuh lê̆ tơ cheng jê̆ chơnang soi.

¹¹ Đơ̆ng noh sư plôh lê̆ hơbĕn, na iŏk hrŭk hơbĕn ao nai chĕp ba tơnuh noh tơ 'nguaih tuh tơ minh anih rơgoh.

¹² Ŭnh kơpal chơnang soi athei khơ̆ng ling-lang, ưh kơ gơh păt ôh. Rim pơgê 'bok soi dan 'long ŭnh kơpal chơnang soi, dan tơmam soi 'buh kơpal 'long ŭnh păng 'buh rơmă tơmam soi 'blŏk bơnê tơ noh.

¹³ Ŭnh athei khơ̆ng hơnơ̆ng tơ kơpal chơnang soi 'nĕ kơ ăn păt ôh.

Tơdrong juăt gah tơmam pơyơ̆r phe 'ba

¹⁴ 'Nâu jơ̆ tơdrong juăt tơmam pơyơ̆r phe 'ba, lu kon drŏ-nglo Arôn athei pơyơ̆r tơmam soi âu tơ anăp chơnang soi 'bơ̆t anăp Kră Yang.

¹⁵ Sư gô chup minh kơđôp tơpŭng lăm tơmam soi pơyơ̆r hrâu hăm đak rơmă ôliwơ păng đĭ-đăng tơmam 'bâu phu chĕp ba soh pơyơ̆r tơ chơnang soi wă kơ 'blŏk hơdơ̆r gah tơmam soi đei 'bâu phu ăn kơ Kră Yang.

¹⁶ Lu tơmam mă oei oei Arôn păng lu kon drŏ-nglo sư gô sa tơmam noh, ưh kơ đei 'buih pông, tơ lăm minh anih rơgoh, wă khan sa tơ cham Bơsŭn Anih Akŭm.

¹⁷ Ưh kơ gơh pai tơpŭng noh hăm 'buih ôh, Inh ăn kơ sư minh pah tơmam pơyơ̆r yua soh hăm ŭnh, Noh jing tơmam rơgoh hloh. Thoi tơmam pơyơ̆r huai đơ̆ng yoch păng tơmam huai đơ̆ng tơdrong hơch 'bơm kơ pơm yoch.

¹⁸ Rim 'nu kon drŏ-nglo Arôn gơh iŏk sa noh, jơ̆ tơdrong juăt pơtă ăn ling-lang kơ adrĕch adrung lu iĕm, đơ̆ng tơmam pơyơ̆r soh hăm ŭnh pơyơ̆r ăn kơ Kră Yang; bu hơtŭt 'bơm tơmam noh gô jing rơgoh.

¹⁹ Kră Yang khan kơ Môis:

²⁰ 'Nâu jơ̆ tơmam pơyơ̆r Arôn păng lu kon drŏ-nglo sư, gô pơyơ̆r ăn kơ Kră Yang lăm năr đe tuh đak rơmă tơ lu sư minh lăm mơjĭt êpha tơpŭng, pơm tơmam pơyơ̆r hăm tơpŭng đe juăt kơ pơyơ̆r hơnơ̆ng, minh puăt pơyơ̆r til pơgê, minh puăt pơyơ̆r til kơsơ̆,

²¹ Tơmam soi noh đe gô hơdrĕng hơmet lê̆ tơ gŏ gang hrâu hăm đak rơmă ôliwơ. Sĭn bơih ih athei chĕp ba kăt hơmet, na pơyơ̆r đei 'bâu phu 'lơ̆ng ăn kơ Kră Yang.

²² 'Bok soi lăm lu kon drŏ-nglo Arôn, bơngai ayơ mă đe tuh đak rơmă wă tơplih sư pơm 'bok soi kư̆m athei pơyơ̆r tơmam soi 'nâu kiơ̆ thoi tơdrong juăt pơkă ling-lang 'bơ̆t anăp Kră Yang đe gô soh pơyơ̆r đĭ tơmam noh.

²³ Dôm rim tơmam soi hăm phe 'ba đơ̆ng 'bok soi athei soh lê̆ đĭ ưh kơ gơh sa.

Tơdrong juăt gah tơmam soi huai đơ̆ng yoch

²⁴ Kră Yang khan kơ Môis.

²⁵ Roi bĕ kơ Arôn păng lu kon drŏ-nglo sư: 'Nâu boih tơdrong juăt gah tơmam soi huai đơ̆ng yoch athei pơlôch bĕ kon sem wă soi huai đơ̆ng yoch 'bơ̆t anăp Kră Yang. Tơ anih mă đe juăt kơ pơlôch kon sem wă pơyơ̆r tơmam soi 'buh noh jơ̆ tơmam rơgoh hloh.

²⁶ 'Bok soi pơyơ̆r tơmam soi huai đơ̆ng yoch noh gô sa tơmam noh, đe gô sa lăm minh anih tơ cham Bơsŭn Anih Akŭm.

²⁷ Bu mă hơtŭt 'bơm 'nhĕm soi gô jing rơgoh păng tơdah pham sư tơprah tơ ao athei pih ao ih noh tơ lăm minh anih 'lơ̆ng rơgoh.

²⁸ Gŏ teh mă đêl pai boih 'nhĕm noh, athei teh pơchah lê̆; Tơdah đe pai noh hăm gŏ kong athei hơkôih păng ôp hăm đak mă rơgoh.

²⁹ Rim 'nu bơngai drŏ-nglo lăm lu 'bok soi gơh sa 'nhĕm noh; noh jing tơmam rơgoh hloh.

³⁰ Mă-lei tơdah tơmam soi wă huai dơ̆ng yoch đe chĕp ba tơ Bơsŭn Anih Akŭm wă soi sơmah huai đơ̆ng yoch lăm anih 'lơ̆ng rơgoh; athei soh lê̆ bĕ.