Lêwi 5 - Sơ̆p Hlabơar Nơ̆r 'Bok Kei-Dei

Tơmam soi huai đơ̆ng yoch hơch 'bơm dah pơrơ̆ng

¹ Tơdah bơngai bu pơm kơdranh mă đei pơkăm pơkă bơih. Păng pơm glăi yua kơ ưh pơdah kơ đe tơdrong sư đêl 'bôh, dah đêl băt lei bơngai noh pŭ yoch sư kơdih bơih.

² Tơdah bơngai bu ưh kơ băt ôh hơtŭt 'bơm minh pôm tơmam 'mê̆-'mach đêl akâu sem bri lôch ưh kơ rơgoh dah akâu sem dơrong ưh kơ rơgoh, dah akâu 'bih kơep lep-ler ưh kơ rơgoh, mă khan kơdih sư ưh kơ băt ră, lei bơngai noh ưh kơ rơgoh mơ̆n păng kư̆m yoch bơih.

³ Tơdah bơngai bu băt ră dah ưh kơ băt na hơtŭt 'bơm tơdrong kơnê̆ 'mê̆-'mach kon bơngai, mă dôm tơdrong kơnê̆ 'mê̆-'mach ayơ pơm kơ sư 'mê̆-'mach boih, tơdah đe tơbăt kơ sư bơngai noh kư̆m yoch.

⁴ Tơdah bơngai bu pơkă 'bơm glăi wă pơm tơdrong kơnê̆ dah tơdrong 'lơ̆ng mă tơdrong kiơ hăt kơ pơkă pơkăm na sư ưh kơ băt, na đơ̆ng rŏng sư băt mơn kơdih, lei bơngai noh gô đei tơdrong yoch lăm tơdrong âu dah tơdrong to.

⁵ Kơplah bu mă đei pơm yoch minh lăm tơdrong âu, sư athei roi tơdrong yoch sư mă pơm boih.

⁶ Đơ̆ng noh sư athei chĕp ba tơmam soi pơyơ̆r yua kơ pơm yoch, hăm tơdrong juăt Kră Yang minh pôm kon triu dah bơbe akăn pơm tơmam soi huai iŏk yua kơ yoch, na 'bok soi gô soi sơmah kơ sư wă kơ sư rơgoh đơ̆ng yoch.

⁷ Tơdah sư chă ưh kơ kĕ đei minh pôm kon triu akăn dah bơbe akăn, yua kơ yoch sư đei pơm bơih, na sư athei anhăk ba kơ Kră Yang minh hơgrop sem pơgâm dah kơtơp kon, minh pôm wă yua lăm tơmam sư huai đơ̆ng yoch, minh pôm wă yua lăm tơmam soi 'buh.

⁸ Sư gô chĕp ba minh hơgrop sem noh ăn kơ 'bok soi. 'Bok soi gô pơyơ̆r minh pôm adrol pơm tơmam soi huai đơ̆ng yoch wĕch kơ̆l sem noh 'bơ̆t hơko mă-lei ưh kơ ăn kơtĕch.

⁹ Đơ̆ng noh sư tơtraih pham tơmam soi yua kơ yoch tơ cheng kơ chơnang soi, pham mă oei rơkah hling tơ ala jơ̆ng chơnang soi, noh bơih tơmam soi huai đơ̆ng yoch.

¹⁰ Sư gô pơyơ̆r mă 'bar, noh jing tơmam soi 'buh kiơ̆ kơ tơdrong juăt 'bok soi gô sơmah wă kơ rơgoh, đơ̆ng yoch bơngai noh mă pơm boih, na tơdrong yoch bơngai noh gơh mơnat ăn.

¹¹ Tơdah sư ưh kơ kĕ đei wă pơyơ̆r minh hơgrop sem pơgâm dah sem kơtơp kon ôh. Na yua kơ tơdrong yoch sư đei pơm sư athei pơyơ̆r minh lăm mơjĭt êphaa tơpŭng rơgoh 'lơ̆ng wă pơm tơmam soi huai đơ̆ng yoch, 'nĕ kơ tuh đak rơmă ôliwơ păng đak rơmă 'bâu phu kơpal yua kơ 'nâu jơ̆ tơmam soi huai đơ̆ng yoch.

¹² Sư gô chĕp ba tơpŭng noh tơ 'bok soi, 'bok soi gô chup minh kơđôp wă kơ 'blŏk hơdơ̆r păng 'buh pơyơ̆r tơ chơnang soi tơ kơpal tơmam soi ăn ŭnh sa pơyơ̆r kơ Kră Yang, noh jơ̆ minh tơmam soi huai đơ̆ng yoch.

¹³ Thoi noh 'bok soi gô soi sơmah wă huai đơ̆ng yoch yua kơ sư pơm yoch boih iŏk minh lăm tơmam 'nâu, bơngai noh gơh đei mơnat ăn; tơpŭng mă oei rơkah noh gô lê̆ kơ 'bok soi kư̆m thoi tơmam soi pơyơ̆r phe 'ba mơ̆n.

¹⁴ Kră Yang khan kơ Môis:

¹⁵ Layơ bơngai bu mă hơch 'bơm kơ pơm yoch lăm minh tơmam rơgoh Kră Yang. Na bơngai noh yua kơ tơdrong yoch sư kơdih, sư athei chĕp ba tơ Kră Yang minh pôm kon triu tơno ưh kơ đei Jĭ kiơ, athei rôp đơ̆ng lăm khŭl sư, ih jô̆ tinh kon triu noh gĭt sư hơgăt kiơ̆ kơ jên hu seikơl đơ̆ng hnam akŭm rơgoh, noh jơ̆ minh tơmam soi huai đơ̆ng yoch pơm glăi kơ khôi juăt.

¹⁶ Bơngai noh athei hơmet ming yua kơ tơdrong noh ưh kơ rơgoh păng thim minh lăm pơđăm, na jao tơmam noh kơ 'bok soi, na 'bok soi gô iŏk pơm sut rơgoh tơdrong yoch hăm kon triu tơno jing tơmam soi sơmah ăn yua kơ tơdrong pơm yoch na sư gơh đei mơnat ăn.

¹⁷ Tơdah bu mă pơm glăi minh tơdrong lăm dôm lu nơ̆r tơtă Kră Yang khă kuă ăn kơ pơm, mă khan sư ưh kơ băt ôh kơ tơdrong noh, lei bơngai noh kư̆m yoch bơih păng gô pŭ iŏk tơdrong yoch sư.

¹⁸ Yua kơ tơdrong yoch sư kơdih bơngai noh athei chĕp ba tơ 'bok soi minh pôm kon triu tơno ưh kơ đei jĭ kiơ. Ih jô̆ sư gĭt thoi tơmam soi pơyơ̆r yua kơ đơ̆ng yoch glăi kơ khôi juăt, na 'bok soi gô soi sơmah ăn kơ bơngai mă glăi 'bơm pơm yoch, na tơdrong yoch bơngai noh gô mơnat ăn.

¹⁹ Noh jơ̆ tơmam soi sơmah huai đơ̆ng yoch yua kơ sư đei pơm yoch hăm khôi juăt, sư pơm yoch boih 'bơ̆t anăp Kră Yang.