Lêwi 4 - Sơ̆p Hlabơar Nơ̆r 'Bok Kei-Dei

Tơmam soi huai yoch đơ̆ng hơch 'bơm

¹ Kră Yang khan dơ̆ng kơ Môis thoi âu:

² Khan bĕ kơ kon pơlei Isơrael: Tơdah bu mă hơch 'bơm kơ pơm yoch glăi minh tơdrong lăm nơ̆r Kră Yang tơtă ưh kơ ăn pơm.

³ Tơdah 'bok soi mă đei tuh đak rơmă boih na pơm yoch, noh pơm ăn kơ kon pơlei yoch kiơ̆, 'bok soi noh sư athei pơyơ̆r kơ Kră Yang minh pôm rơmo dăm ưh kơ đei jĭ kiơ, yua kơ yoch sư pơm noh.

⁴ Sư athei dui ba rơmo dăm; noh 'bơ̆t 'măng Bơsŭn Anih Akŭm tơ anăp Kră Yang dan ti sư tơ kơ̆l rơmo dăm đơ̆ng noh 'bet pơlôch hloi 'bơ̆t anăp Kră Yang.

⁵ 'Bok soi mă chu tuh đak rơmă bơih gô iŏk pham rơmo noh chĕp ba mơ̆t lăm Bơsŭn Anih Akŭm.

⁶ 'Bok soi tôt hơnglâu ti sư lăm pham tơdjoh tơpơh wơ̆t 'bơ̆t anăp Kră Yang 'bơ̆t jê̆ che pĕng găn anih 'lơ̆ng rơgoh.

⁷ 'Bok soi gô pik pham tơ kơpal lu ake chơnang soi tơmam 'bâu phu lăm Bơsŭn Anih Akŭm 'bơ̆t anăp Kră Yang păng tuh đĭ pham rơmo tơ jơ̆ng chơnang soi tơmam soi 'buh, dan tơ anăp 'măng mơ̆t tơ Bơsŭn Anih Akŭm.

⁸ Sư gô pleh lê̆ đĭ rơmă rơmo dăm mă pơyơ̆r pơm tơmam soi huai iŏk yoch, lu rơmă mơ'nhao păng rơmă lom klak.

⁹ 'Bar tŏ boh-lăn păng rơmă klep tơ 'bar tŏ boh-lăn jê̆ kơiĕng mơ'nhao hơtăng lom klơm, sư iŏk rơmă noh hăm boh-lăn.

¹⁰ Thoi pleh iŏk đĭ rơmă đơ̆ng lăm rơmo dăm pơm tơmam soi pơyơ̆r 'blŏk bơnê, đơ̆ng noh 'bok soi gô 'buh tơmam noh tơ chơnang soi pơm tơmam soi 'buh hăm ŭnh.

¹¹ Mă-lei lu akar rơmo dăm đĭ-đăng sĕch sư, kơ̆l, tơkong păng ĭch sư.

¹² Đĭ-đăng akâu rơmo noh sư athei chĕp ba lĕch tơ 'nguaih kơ anih kơđông, năm tơ minh anih 'lơ̆ng rơgoh, anih mă lu sư tuh tơnuh, đơ̆ng noh dan hơtŏk tơ kơpal 'long ŭnh păng 'buh hăm ŭnh, đe gô 'buh đĭ-đăng 'bơ̆t anih đe tuh tơnuh noh.

¹³ Tơdah đĭ-đăng lu bơngai Isơrael yua kơ hơch 'bơm pơm yoch boih, mă-lei lu bơngai tơpôl akŭm tam mă băt păng lu sư pơm yoch minh tơdrong lăm lu nơ̆r Kră Yang tơtă khă ưh kơ ăn pơm, yua kơ tơdrong noh sư jing yoch boih.

¹⁴ Tơdah tơdrong yoch lu sư noh pơdah 'bôh tơ 'nguaih, đĭ-đăng lu bơngai tơpôl athei pơyơ̆r minh pôm rơmo dăm iĕ wă pơm tơmam soi huai iŏk yoch sư, dui ba kon rơmo noh 'bơ̆t 'măng Bơsŭn Anih Akŭm.

¹⁵ Lu kră bơngai Isơrael athei dan ti lu sư 'bơ̆t kơ̆l rơmo dăm đơ̆ng noh pơlôch hloi 'bơ̆t anăp Kră Yang.

¹⁶ 'Bok soi mă đe tuh đak rơmă bơih, gô chĕp ba pham kon rơmo dăm, mơ̆t tơ lăm Bơsŭn Anih Akŭm.

¹⁷ 'Bok soi gô tôt hơnglâu ti sư tơ lăm pham tơdjoh tơpơh wơ̆t 'bơ̆t anăp Kră Yang, tơ anăp che pĕng.

¹⁸ Đơ̆ng noh sư gô pik pham tơ lu ake chơnang soi lăm Bơsŭn Anih Akŭm 'bơ̆t anăp Kră Yang, đơ̆ng noh lu pham oei đei tuh đĭ tơ jơ̆ng chơnang soi tơmam soi pơyơ̆r 'buh dan tơ 'măng Bơsŭn Anih Akŭm.

¹⁹ Sư kư̆m pleh lê̆ đĭ lu rơmă 'măn 'buh tơ chơnang soi.

²⁰ 'Nâu tơdrong sư pơyơ̆r rơmo dăm, kư̆m thoi sư pơyơ̆r rơmo pơm tơmam soi huai đơ̆ng yoch, sư gô pơm thoi noh mơ̆n kơ tơmam âu. 'Bok soi gô pơm tơdrong sut rơgoh tơdrong yoch lu sư na lu sư gô đei tơdrong mơnat ăn,

²¹ đơ̆ng noh lu sư anhăk ba rơmo dăm noh lĕch tơ 'nguaih kơđông, na 'buh pơyơ̆r thoi sư 'buh pơyơ̆r rơmo dăm adrol ki mơ̆n, noh Jơ̆ tơmam soi huai đơ̆ng yoch kơ lu khŭl akŭm.

²² Tơdah đei yŏng pơgơ̆r ayơ mă yua kơ hơch 'bơm pơm yoch minh tơdrong lăm nơ̆r tơtă Kră Yang 'Bok Kei-Dei Sư khă ưh kơ ăn pơm, mă đei pơm yoch boih.

²³ Layơ tơdrong yoch sư pơm đe tơ'bôh ăn kơ sư boih, sư athei chĕp ba tơmam soi sư minh pôm bơbe tơno ưh kơ đei jĭ kiơ.

²⁴ Na dan ti sư tơ kơ̆l bơbe tơno noh, đơ̆ng noh pơlôch hloi 'bơ̆t anăp Kră Yang, pơm tơmam soi 'buh wă huai tơdrong yoch.

²⁵ 'Bok soi gô iŏk pham sem dơrong pơm tơmam soi huai đơ̆ng yoch na tôt hơnglâu ti sư na pik tơ ake chơnang soi gah tơmam soi 'buh păng tuh pham mă oei đei tơ jơ̆ng chơnang soi 'buh.

²⁶ Đĭ rơmă sư gô 'buh tơ kơpal chơnang soi, thoi rơmă tơmam soi 'blŏk bơnê mơ̆n, noh na 'bok soi gô pơm tơdrong sut rơgoh yoch sư, na sư gơh đei tơdrong mơnat ăn.

²⁷ Tơdah minh 'nu bơngai lăm lu kon pơlei hơch 'bơm pơm yoch, minh tơdrong lăm nơ̆r tơtă Kră Yang păng pơm tơdrong Sư khă ưh kơ ăn pơm noh na jing yoch boih.

²⁸ Tơdah tơdrong sư pơm yoch đe tơ'bôh boih kơ sư. Sư athei chĕp ba tơmam soi minh pôm bơbe akăn ưh kơ đei jĭ kiơ wă pơm tơmam soi yua kơ tơdrong yoch sư pơm boih.

²⁹ Sư athei dan ti sư tơ kơ̆l sem dơrong pơm tơmam soi noh, klaih kơ noh pơlôch hloi tơ anih đe juăt kơ pơyơ̆r tơmam soi 'buh.

³⁰ 'Bok soi gô tôt hơnglâu ti sư tơ lăm pham pik tơ lu ake chơnang soi tơmam soi 'buh păng tuh đĭ pham mă oei đei noh tơ jơ̆ng chơnang soi.

³¹ Đơ̆ng noh sư gô pleh lê̆ đĭ rơmă thoi pleh lu rơmă tơmam soi 'blŏk bơnê mơ̆n. 'Bok soi chĕp ba 'buh tơ chơnang soi jing tơmam soi pơyơ̆r 'bâu phu kơ Kră Yang, noh bơih 'bok soi gô pơm tơdrong sut rơgoh yoch sư, na bơngai noh Kră Yang gô mơnat ăn.

³² Tơdah tơmam soi huai đơ̆ng yoch, athei pơyơ̆r triu akăn ưh kơ đei jĭ kiơ.

³³ Dan ti sư tơ kơpal kơ̆l sem dơrong pơm tơmam soi huai yoch noh, na pơlôch hloi, sư jing tơmam soi huai đơ̆ng yoch 'bơ̆t anih đe juăt kơ pơlôch sem dơrong pơm tơmam soi 'buh

³⁴ Đơ̆ng noh 'bok soi gô iŏk pham tơmam soi yua kơ tơdrong yoch, tôt hơnglâu ti sư lăm pham, pik tơ ake chơnang soi 'buh, pham mă oei đei noh tuh đĭ tơ jơ̆ng chơnang soi.

³⁵ Sư pleh đĭ rơmă thoi đei pleh rơmă triu kon pơm tơmam soi 'blŏk bơnê, 'bok soi gô chĕp ba 'buh tơ chơnang soi tơ kơpal tơmam soi 'buh hăm ŭnh pơyơ̆r kơ Kră Yang, thoi noh bơih 'bok soi gô pơm tơdrong sut rơgoh yoch bơngai mă pơm yoch na tơdrong yoch sư gơh mơnat ăn.