Lêwi 27 - Sơ̆p Hlabơar Nơ̆r 'Bok Kei-Dei

Khôi juăt gah tơdrong pơyơ̆r pơkăm pơkă

¹ Kră Yang khan kơ Môis:

² Roi bĕ kơ kon pơlei Isơrael: Tơdah đei bu mă pơkăm pơkă wă pơyơ̆r kơ Kră Yang athei ăn jên kiơ̆ kơ tơdrong gĭt bơngai.

³ Tơdah hơgăt tơdrong gĭt kơ bơngai drŏ-nglo đơ̆ng 'bar-jĭt sơnăm truh tơ tơdrâu-jĭt sơnăm tơdrong gĭt sư dang pơđăm-jĭt seikơla jên hu, kiơ̆ kơ seikơl lăm anih 'lơ̆ng rơgoh.

⁴ Tơdah minh 'nu bơngai drŏ-kăn athei jô̆ tơdrong gĭt sư pêng-jĭt seikơl jên hu.

⁵ Tơdah minh 'nu bơngai 'lơ̆p đơ̆ng pơđăm sơnăm truh tơ 'bar-jĭt sơnăm athei jô̆ tơdrong gĭt sư 'bar-jĭt seikơl jên hu kơ bơngai drŏ-nglo păng mơjĭt seikơl jên hu kơ bơngai drŏ-kăn.

⁶ Tơdah bơngai nge đơ̆ng minh khei truh tơ pơđăm sơnăm athei jô̆ tơdrong gĭt sư pơđăm seikơl jên hu kơ bơngai drŏ-nglo păng pêng seikơl jên hu kơ bơngai drŏ-kăn.

⁷ Tơdah bơngai kră đơ̆ng tơdrâu-jĭt sơnăm truh tơ kơpal, ih athei jô̆ tơdrong gĭt sư mơjĭt-pơđăm seikơl jên hu, kơ bơngai drŏ-nglo păng mơjĭt seikơl jên hu, kơ bơngai drŏ-kăn.

⁸ Tơdah bơngai pơyơ̆r pơkă pơkăm noh dơnuh dêh, ưh kơ kĕ ăn jên kiơ̆ kơ hơgăt. Athei anhăk ba sư tơ anăp 'bok soi sư gô hơgăt kiơ̆ kơ bơngai noh kĕ đei.

⁹ Tơdah pơkă pơyơ̆r hăm sem dơrong juăt kơ pơm tơmam pơyơ̆r kơ Kră Yang, na tơmam wă pơyơ̆r kơ Kră Yang noh athei 'lơ̆ng rơgoh.

¹⁰ Bơngai noh ưh kơ gơh tơplih păng tơăn băl sem dơrong 'lơ̆ng na iŏk sem dơrong kơnê̆, dah ăn sem dơrong kơnê̆ na iŏk sem dơrong 'lơ̆ng, tơdah wă tơplih sem dơrong âu păng sem dơrong to, athei 'bar tŏ noh 'lơ̆ng rơgoh ngăl.

¹¹ Tơdah sem dơrong kơnê̆ ưh kơ gơh pơm tơmam soi wă pơyơ̆r kơ Kră Yang, athei chĕp ba sem dơrong noh 'bơ̆t anăp 'bok soi.

¹² Đơ̆ng noh 'bok soi gô lăng jô̆ kiơ̆ kơ kon kơnê̆ dah 'lơ̆ng na sư hơgăt ăn tơdrong gĭt sư. Na sư gô ăn jên kiơ̆ kơ 'bok soi hơgăt noh.

¹³ Păng tơdah sư wă huai pơdrâu iŏk, sư athei ăn thim minh lăm pơđăm kiơ̆ kơ sư hơgăt boih.

¹⁴ Mưh bu wă 'măn ăn hnam sư 'lơ̆ng rơgoh kơ Kră Yang, 'bok soi gô kiơ̆ kơ hnam kơnê̆ dah 'lơ̆ng na sư jô̆ hơgăt ăn tơdrong gĭt sư. Na bơngai noh athei kiơ̆ kơ jên 'bok soi hơgăt.

¹⁵ Tơdah đơ̆ng rŏng, bơngai noh 'măn lê̆ boih hnam noh 'maih huai pơdrâu iŏk, athei ăn thim minh lăm pơđăm kiơ̆ kơ jên đe hơgăt bơih, na hnam noh gô pơdrâu kơ sư.

¹⁶ Tơdah bu wă pơyơ̆r chŭn mir sư kơ Kră Yang, ih athei jô̆ jên kiơ̆ kơ adrĕch sư rei lăm noh, wă khan minh hlak chŭn đe rei minh homerb adrĕch jô̆ gĭt sư pơđăm-jĭt seikơl jên hu.

¹⁷ Tơdah chŭn sư pơyơ̆r đơ̆ng sơnăm hiôk-hian tơdrong gĭt sư iŏk kiơ̆ kơ hơgăt lê̆ bơih.

¹⁸ Mưh khan sư pơyơ̆r chŭn sư đơ̆ng rŏng kơ sơnăm hiôk-hian lei 'bok soi gô jô̆ kiơ̆ kơ oei pă dôm sơnăm truh tơ sơnăm hiôk-hian, na mă đei hơgăt boih.

¹⁹ Tơdah sư đei pơyơ̆r chŭn sư bơih, na 'maih wă huai pơdrâu iŏk dơ̆ng, sư athei ăn thim minh lăm pơđăm kiơ̆ kơ jên đei hơgăt boih, đơ̆ng noh chŭn gô pơdrâu kơ sư.

²⁰ Tơdah mưh sư ưh kơ wă huai pơdrâu iŏk ôh păng sư tĕch boih chŭn noh kơ bơngai nai, lei chŭn noh ưh pă gơh pơdrâu iŏk bơih.

²¹ Mă-lei tơdah truh tơ sơnăm hiôk-hian bơih, chŭn noh pơdrâu kơ tơ'ngla sư. Lei chŭn noh gô jing rơgoh 'lơ̆ng, teh âu gô jing tơmam Kră Yang gô jao ăn kơ 'bok soi.

²² Tơdah wă pơm tơmam 'lơ̆ng rơgoh, pơyơ̆r kơ Kră Yang minh hlak chŭn sư răt, ưh kơ sĭ chŭn đơ̆ng yă 'bok sư ôh,

²³ thoi noh 'bok soi gô hơgăt tơng lăng gĭt chŭn noh dôm yơ jên truh tơ sơnăm hiôk-hian, lăm năr noh hloi sư athei ăn jên kiơ̆ kơ đêl hơgăt yua kơ jing tơmam 'lơ̆ng rơgoh ăn kơ Kră Yang.

²⁴ Truh sơnăm hiôk-hian chŭn noh gô pơdrâu kơ tơ'ngla sư wă khan pơdrâu kơ tơ'ngla đêl tĕch sư.

²⁵ Đĭ-đăng tơdrong gĭt sư mă đêl hơgăt bơih, gĭt sư athei kiơ̆ kơ seikơl jên hu tơ anih 'lơ̆ng rơgoh, minh seikơl gĭt sư dang 'bar-jĭt Gêra.c

²⁶ Mă-lei ưh kơ đei bu wă 'măn lê̆ pơm tơmam 'lơ̆ng rơgoh pơyơ̆r kon sem dơrong tuh blŭng-a rơmo dah triu, yua kơ kon mă tuh blŭng-a noh trŏ tơmam Kră Yang ngăl bơih.

²⁷ Păng tơdah kon sem brem ưh kơ rơgoh, sư athei kiơ̆ kơ tơdrong gĭt đei hơgăt. Na thim minh lăm pơđăm, đơ̆ng noh huai pơdrâu iŏk sư. Tơdah kon sem noh đe ưh kơ huai pơdrâu iŏk, đe gô tĕch sư, kiơ̆ kơ tơdrong gĭt đei hơgăt bơih.

Gah tơmam jao păng pơyơ̆r minh lăm mơjĭt

²⁸ Dôm lu tơmam jao, wă khan đĭ-đăng tơmam kiơ mă pơyơ̆r kơ Kră Yang, kon bơngai, sem brem dah chŭn mir tơmam đơ̆ng lăm hnam bơ̆n đei, ưh pă gơh tĕch kư̆m ưh kơ gơh kơ huai pơdrâu iŏk ôh. Yua kơ dôm tơmam noh 'lơ̆ng rơgoh ăn kơ Kră Yang bơih.

²⁹ Minh 'nu bơngai đe wă pơlôchd 'bơ̆t anăp kon bơngai ưh pă gơh wă huai iŏk sư ôh, bơngai noh khŏm ăn đe pơlôch.

³⁰ Dôm tơmam minh lăm mơjĭt đơ̆ng chŭn mir, 'ba hơ'bo dah plei 'long noh tơmam Kră Yang ngăl tơmam 'lơ̆ng rơgoh pơyơ̆r kơ Kră Yang.

³¹ Tơdah bu wă huai pơdrâu iŏk tơmam kiơ đơ̆ng minh lăm mơjĭt tơmam sư, athei ăn thim minh lăm pơđăm kơ tơmam noh.

³² Đĭ-đăng minh lăm mơjĭt đơ̆ng rơmo, dah triu, iŏk 'long jra na jô̆ rơmo dah triu ayơ mă yak năm ala 'long jra truh tơ mơjĭt noh tơmam 'lơ̆ng rơgoh, iŏk 'măn pơyơ̆r kơ Kră Yang.

³³ Sư ưh kơ gơh pơkă khan 'lơ̆ng dah kơnê̆ păng kư̆m ưh kơ gơh tơplih, kon sem mă tơplih noh păng kon wă tơplih 'măn lê̆ jing 'lơ̆ng rơgoh; đe ưh kơ gơh huai pơdrâu iŏk ôh.

³⁴ Noh jơ̆ dôm tơdrong nơ̆r tơtă athei đơ̆ng Kră Yang roi khan kơ Môis păng kon pơlei Isơrael tơ kơpal kông Sinai.