Lêwi 23 - Sơ̆p Hlabơar Nơ̆r 'Bok Kei-Dei

Lu năr pơm giĕng

¹ Kră Yang khan kơ Môis:

² Athei roi bĕ kơ kon pơlei Isơrael: 'Nâu năr pơm giĕng tih đơ̆ng Kră Yang 'Bok Kei-Dei lu iĕm đei pơkă jing năr akŭm 'lơ̆ng rơgoh.

³ Đe gô bơ̆jang lăm tơdrâu năr; mă-lei năr tơpơh, noh năr Sa'bat, năr đe pơdơh wă khan năr akŭm kơkuh 'lơ̆ng rơgoh. 'Nĕ kơ bơ̆jang kiơ; noh năr Sa'bat kơ Kră Yang tơ lăm jơ̆p-jang anih lu iĕm.

⁴ 'Nâu lu năr Kră Yang pơkă boih, năr akŭm kơkuh 'lơ̆ng rơgoh, lu iĕm athei ră roi bĕ kơ đe mưh truh năr mă đei pơkă bơih.

⁵ Truh năr mơjĭt-puăn khei mônh, kơplah til kơsơ̆ măng noh năr giĕng Năm Brih Kră Yang.a

⁶ Na truh năr mơjĭt-pơđăm khei noh đe pơm giĕng 'Bĕng Ưh Kơ Đei 'Buih Pông. Wă kơkuh pơyom kơ Kră Yang, na lu iĕm gô sa 'bĕng ưh kơ đei 'buih noh lăm tơpơh năr.

⁷ Năr blŭng-a lu iĕm athei akŭm 'lơ̆ng rơgoh, ưh kơ gơh bơ̆jang kiơ kơ sĕch akar.

⁸ Mă-lei lu iĕm athei pơyơ̆r kơ Kră Yang tơmam soi yua 'buh lăm ŭnh lăm tơpơh năr; truh năr mă tơpơh gô đei tơdrong akŭm kơkuh 'lơ̆ng rơgoh; lu iĕm 'nĕ kơ pơm minh tơdrong jang kiơ kơ sĕch akar ôh.

⁹ Kră Yang khan kơ Môis:

¹⁰ Khan bĕ kơ kon pơlei Isơrael: Tơdah lu iĕm mơ̆t tơ lăm char mă Inh ăn kơ lu iĕm păng lu iĕm đei kĕch yuă, bơyan 'ba tơ noh, iĕm athei năm ba minh hơchô̆ ba plei blŭng-a ăn kơ 'bok soi.

¹¹ Năr đơ̆ng rŏng hlôi kơ năr giĕng Sa'bat, 'bok soi gô pơyơ̆r hơchô̆ ba, ba 'ma 'ngiĕo 'bơ̆t anăp Kră Yang, wă kơ tơdrong pơyơ̆r hơchô̆ 'ba noh Kră Yang iŏk;

¹² lăm năr pơyơ̆r hơchô̆ 'ba, mă ba 'ma 'ngiĕo noh lu iĕm kư̆m athei pơyơ̆r kơ Kră Yang minh pôm kon triu tơ'bưh kơ đêl, ưh kơ đei jĭ kiơ, wă pơm tơmam soi 'buh.

¹³ Păng pơyơ̆r tơmam soi phe 'ba, dang 'bar lăm mơjĭt êpha tơpŭng, b lŭk hrâu hăm đak rơmă ôliwơ pơm tơmam soi soh hăm ŭnh, pơyơ̆r đei 'bâu phu 'lơ̆ng ăn kơ Kră Yang păng pơyơ̆r tơmam huch hai sik plei hơmu, minh lăm puăn hin.c

¹⁴ Lu iĕm 'nĕ kơ sa 'bĕng, 'ba hơdrĕng, dah 'ba oei adrih, dĭng truh tơnăr âu, wă khan truh năr mă lu iĕm pơyơ̆r tơmam soi kơ Kră Yang boih. Mă khan tơ anih ayơ, noh boih tơdrong juăt pơkă kơ lu iĕm ling-lang truh tơ kon sâu iĕm.

¹⁵ Iŏk đơ̆ng rŏng năr pơdơh Sa'bat, năr mă lu iĕm chĕp hơchô̆ 'ba pơyơ̆r ba 'ma 'ngiĕo, iĕm athei jô̆ noh tơpơh 'măng giĕng.

¹⁶ Lu iĕm jô̆ pơđăm-jĭt năr đơ̆ng rŏng kơ năr pơdơh Sa'bat tăl mă tơpơh; kơplah noh iĕm athei pơyơ̆r tơmam phe 'ba hle ăn kơ Kră Yang.

¹⁷ Lu iĕm athei năm ba đơ̆ng hnam iĕm 'bar tŏ 'bĕng wă pơm tơmam soi ba 'ma 'ngiĕo, 'bĕng noh pơm hăm minh lăm mơjĭt êpha tơpŭng, đei 'buih pông pơtŏ tơ ŭnh; 'bĕng noh jing tơmam blŭng-a lăm bơyan pơyơ̆r kơ Kră Yang.

¹⁸ Lu iĕm kư̆m athei pơyơ̆r hloi 'bĕng noh hăm tơpơh tŏ triu kon dang minh sơnăm, ưh kơ đei jĭ kiơ, minh pôm kon rơmo tơno păng 'bar tŏ triu tơno hơdai hăm tơmam soi phe 'ba păng tơmam soi huch wă pơm tơmam soi 'buh hăm ŭnh, pơyơ̆r đei 'bâu phu 'lơ̆ng ăn kơ Kră Yang.

¹⁹ Lu iĕm athei pơyơ̆r minh pôm bơbe tơno pơm tơmam soi huai đơ̆ng yoch păng 'bar tŏ kon triu đei minh sơnăm wă pơm tơmam soi 'blŏk bơnê.

²⁰ 'Bok soi gô iŏk tơmam soi noh hơdai hăm 'bar tŏ 'bĕng pơm păng 'ba blŭng-a lăm bơyan hơdai hăm 'bar tŏ kon triu na pơyơ̆r ba 'ma 'ngiĕo 'bơ̆t anăp Kră Yang, lu tơmam noh athei 'măn lê̆ rơgoh pha ăn kơ Kră Yang păng gô ăn kơ 'bok soi.

²¹ Lu iĕm athei roi tơ'băt: Tơdrong akŭm tơm năr noh athei đei tơdrong akŭm rơgoh, ưh kơ gơh kơ bơ̆jang tơdrong sĕch akar. Noh jing tơdrong juăt pơkă ling-lang ăn kơ adrĕch adrung lu iĕm, mă tơ anih yơ yơ lu iĕm oei.

²² Tơdah kĕch yuă 'ba lăm tơring iĕm, 'nĕ kơ yuă kĕch truh tơ mum jih kơ mir păng kư̆m 'nĕ kơ dônh lu 'ba mă huŏng. Athei 'măn lu 'ba noh kơ lu bơngai dơnuh hin păng lu bơngai tơmoi, Inh boih Kră Yang 'Bok Kei-Dei lu iĕm.

²³ Kră Yang khan kơ Môis:

²⁴ Roi tơ'băt bĕ kơ bơngai Isơrael, lăm năr mônh khei tơpơh, d năr noh lu iĕm gô đei năr pơdơh gĭt găl, wă kơ 'blŏk hơdơ̆r; iĕm athei hlôm keng, na ră roi, năr noh đei tơdrong akŭm rơgoh.

²⁵ Lu iĕm ưh kơ gơh bơ̆jang kơ sĕch akar ôh; iĕm athei pơyơ̆r tơmam soi 'buh hăm ŭnh kơ Kră Yang.

²⁶ Kră Yang kư̆m khan kơ Môis:

²⁷ Năr mônh khei tơpơh âu jơ̆ năr pơm giĕng huai đơ̆ng yoch; lu iĕm gô đei tơdrong akŭm rơgoh, lu iĕm athei hơdrĭ lăm jơhngơ̆m pơmat akâu iĕm kơdihe păng pơyơ̆r tơmam soi yua 'buh hăm ŭnh kơ Kră Yang.

²⁸ Năr noh 'nĕ kơ jang minh tơdrong kiơ; yua kơ năr noh wă huai đơ̆ng tơdrong yoch, lăm năr noh wă pơm rơgoh tơdrong yoch iĕm 'bơ̆t anăp Kră Yang 'Bok Kei-Dei lu iĕm.

²⁹ Lăm năr noh bu mă ưh kơ hơdrĭ kơ jơhngơ̆m pơmat akâu sư kơdih đe gô puh tơlĕch sư đơ̆ng kon pơlei pơla sư.

³⁰ Păng tơdah bơngai bu bơ̆jang tơdrong kiơ, lăm năr âu, Inh gô pơrăm sư đơ̆ng lăm kon pơlei pơla sư.

³¹ Lu iĕm ưh kơ gơh jang minh tơdrong kiơ noh jơ̆ khôi juăt pơkă ling-lang ăn kơ adrĕch adrung iĕm jơ̆p-jang mă tơ anih ayơ iĕm oei.

³² Noh jing minh năr Sa'bat, năr pơdơh ăn kơ lu iĕm, lu iĕm athei hơdrĭ lăm jơhngơ̆m pơmat akâu kơdih; dơ̆ng măng năr tơsĭn lăm khei noh, iĕm athei bơwei năr Sa'bat iĕm, đơ̆ng kơsơ̆ âu truh kơsơ̆ dơning.

³³ Kră Yang khan kơ Môis:

³⁴ Roi khan bĕ kơ bơngai Isơrael, 'bơ̆t năr mơjĭt-pơđăm khei tơpơhf âu, pơm giĕng bơsŭn lăm tơpơh năr wă kơkuh kơ Kră Yang.

³⁵ Năr mă blŭng-a đei tơdrong akŭm rơgoh; lu iĕm ưh kơ gơh bơ̆jang kơ sĕch akar minh tơdrong kiơ ôh.

³⁶ Lăm tơpơh năr noh iĕm athei pơyơ̆r rim năr dôm tơmam soi, yua 'buh hăm ŭnh ăn kơ Kră Yang; truh lăm năr tơhngam lu iĕm đei akŭm rơgoh păng năm ba tơmam pơyơ̆r 'buh hăm ŭnh kơ Kră Yang; noh đei tơdrong akŭm tih pơyom. Lu iĕm 'nĕ kơ bơ̆jang kơ sĕch akar minh tơdrong kiơ.

³⁷ Noh jing năr pơm giĕng Kră Yang pơkă bơih, lu iĕm ră roi kơ kon pơlei pơla, noh jing năr akŭm 'lơ̆ng rơgoh wă pơyơ̆r kơ Kră Yang dôm tơmam soi yua 'buh hăm ŭnh. Tơmam soi 'buh, tơmam soi phe 'ba, tơmam soi 'blŏk bơnê, tơmam soi huch, tơmam ayơ đe hơgăt trŏ kơ năr noh.

³⁸ 'Nguaih kơ bơwei năr pơdơh Sa'bat Kră Yang, lu iĕm athei pơyơ̆r tơmam soi iĕm kơdih, lu tơmam soi pơsĭt nơ̆r pơkă păng tơmam soi 'maih wă. Iĕm juăt kơ pơyơ̆r ăn kơ Kră Yang.

³⁹ Truh năr mơjĭt-pơđăm khei tơpơh, g đang kơ lu iĕm kĕch yuă bơyan hơnê̆ sơnăm iĕm bơih, lu iĕm athei bơwei tơdrong pơm giĕng iĕm lăm tơpơh năr, năr blŭng-a jing năr pơdơh đei tơdrong pơyom păng năr mă tơhngam kư̆m năr pơdơh pơyom.

⁴⁰ Năr mă mônh lu iĕm athei iŏk plei 'long 'lơ̆ng; dơng 'long gol, dơng tih đei hla lơ păng 'long hla prai, na lu iĕm et sa chơt hiôk 'bơ̆t anăp Kră Yang 'Bok Kei-Dei lu iĕm lăm tơpơh năr.

⁴¹ Rim sơnăm lăm khei tơpơh lu iĕm athei bơwei năr pơdơh Kră Yang âu, lăm tơpơh năr, noh jing khôi juăt pơkă ăn kơ adrĕch adrung iĕm ling-lang đĭ chăl; lu iĕm pơm 'blŏk hơdơ̆r lăm khei tơpơh.

⁴² Đĭ-đăng bơngai bu lăm adrĕch adrung Isơrael athei oei lăm hnam bơsŭn tơpơh năr.

⁴³ Wă kơ kon drŏ-nglo lu iĕm băt, kơplah Inh anhăk ba lu iĕm lĕch đơ̆ng Êyiptơ, Inh ăn kơ lu iĕm oei lăm hnam bơsŭn, Inh boih Kră Yang 'Bok Kei-Dei lu iĕm.

⁴⁴ Thoi noh Môis roi kơ lu kon pơlei Isơrael dôm tơdrong pơm giĕng Kră Yang đei pơkă boih.