Lêwi 15 - Sơ̆p Hlabơar Nơ̆r 'Bok Kei-Dei

'Mê̆-'mach lĕch đơ̆ng akâu jăn

¹ Kră Yang khan kơ Môis păng Arôn:

² Roi bĕ kơ kon pơlei Isơrael; tơdah minh 'nu bơngai drŏ-nglo đei đuh lĕch đơ̆ng akâu sư jĭ lĕcha đuh noh jing kơnê̆ 'mê̆-'mach.

³ 'Nâu jing khôi juăt gah tơdrong 'mê̆-'mach yua kơ đei đuh lĕch đơ̆ng akâu sư. Mă khan akâu sư oei lĕch hơnơ̆ng dah ưh pă lĕch bơih, akâu sư noh jing kơnê̆ 'mê̆-'mach.

⁴ Anih giơng tep bơngai đei tơdrong jĭ đuh lĕch đơ̆ng akâu, gô jing 'mê̆-'mach păng dôm tơmam kiơ mă sư ngăl hơ-oei kư̆m gô jing 'mê̆-'mach mơ̆n.

⁵ Bu mă hơtŭt 'bơm giơng tep sư, athei pih hơbĕn ao sư, hum lăm đak păng sư jing kơnê̆ 'mê̆-'mach truh kơmăng.

⁶ Bu hơ-oei kơpal tơmam kiơ mă đêl bơngai đei tơdrong jĭ đuh lĕch đơ̆ng akâu hơ-oei bơih, sư athei pih hơbĕn ao sư, hum lăm đak păng sư gô jing kơnê̆ 'mê̆-'mach truh kơmăng.

⁷ Bu hơtŭt 'bơm akâu bơngai đei tơdrong jĭ đuh lĕch đơ̆ng akâu noh, athei pih hơbĕn ao sư, hum lăm đak păng jing kơnê̆ 'mê̆-'mach truh kơmăng.

⁸ Tơdah bơngai đei tơdrong jĭ đuh lĕch đơ̆ng akâu, gơsoh 'bơm kơ bơngai rơgoh, bơngai noh athei pih hơbĕn ao sư, hum lăm đak păng jing kơnê̆ 'mê̆-'mach truh kơmăng.

⁹ An gre ayơ mă bơngai đei tơdrong jĭ đuh lĕch đơ̆ng akâu hao hơ-oei, an noh gô jing kơnê̆ 'mê̆-'mach.

¹⁰ Bu mă hơtŭt 'bơm dôm tơmam kiơ ala akâu bơngai đei tơdrong jĭ đuh, jing đei kơnê̆ 'mê̆-'mach truh kơmăng păng bu mă chĕp tơmam noh, athei pih hơbĕn ao sư, hum lăm đak păng jing kơnê̆ 'mê̆-'mach truh kơmăng.

¹¹ Tơdah bơngai bu mă đêl bơngai đei tơdrong jĭ đuh lĕch đơ̆ng akâu pel 'bơm na ưh kơ ôp ti adrol, bơngai noh athei pih hơbĕn ao sư, hum lăm đak păng gô jing kơnê̆ 'mê̆-'mach truh kơmăng.

¹² Gŏ man hăm gŏ teh đêl bơngai đei tơdrong jĭ lĕch đơ̆ng akâu pel 'bơm, athei teh pơchah lê̆; dah tơmam pơm hăm 'long athei ôp hăm đak.

¹³ Tơdah bơngai drŏ-nglo đei tơdrong jĭ đuh noh klaih bơih, athei jô̆ đơ̆ng năr sư gơh klaih truh tơ tơpơh năr, đơ̆ng noh pih hơbĕn ao sư păng hum tơ đak ro, na sư gô rơgoh.

¹⁴ Truh năr mă tơhngam sư gô rôp 'bar tŏ sem pơgâm dah 'bar tŏ kon sem kơtơp, năm ba 'bơ̆t anăp Kră Yang tơ 'măng Bơsŭn Anih Akŭm păng jao sem noh ăn kơ 'bok soi.

¹⁵ 'Bok soi gô pơyơ̆r, minh pôm sem pơm tơmam soi huai đơ̆ng yoch minh pôm sem pơm tơmam soi 'buh, thoi noh 'bok soi gô soi sơmah wă kơ goh tơdrong yoch sư 'bơ̆t anăp Kră Yang yua kơ đei tơdrong jĭ lĕch đak đuh đơ̆ng akâu.

¹⁶ Tơdah bơngai drŏ-nglo lĕch đak kơtăk athei hum đĭ akâu sư lăm đak păng gô kơnê̆ 'mê̆-'mach truh kơmăng.

¹⁷ Đĭ-đăng hơbĕn ao păng đĭ-đăng akâu akar sư đêl 'bơm đak kơtăk lĕch noh, athei pih hum hơrao 'nhao hơpĕch lăm đak păng gô jing kơnê̆ 'mê̆-'mach truh kơmăng.

¹⁸ Tơdah bơngai drŏ-nglo ngôi hăm minh 'nu drŏ-kăn na lĕch đak kơtăk, 'bar 'nu măr sư athei hum lăm đak păng gô jing kơnê̆ 'mê̆-'mach truh kơmăng.

¹⁹ Tơdah minh 'nu bơngai drŏ-kăn 'bôh jơ̆ng, sư athei chu iŏk tơdrong 'mê̆ noh lăm tơpơh năr bu hơtŭt 'bơm sư gô jing kơnê̆ 'mê̆-'mach truh kơmăng.

²⁰ Dôm tơmam sư yua 'bĭch kơplah sư đei tơdrong kơnê̆ 'mê̆-'mach jing kơnê̆ 'mê̆-'mach đĭ; păng tơmam sư kơtĭt oei kư̆m jing kơnê̆ 'mê̆-'mach.

²¹ Bu hơtŭt 'bơm giơng sư tep, athei pih hơbĕn ao, hum lăm đak păng gô jing kơnê̆ 'mê̆-'mach truh kơmăng.

²² Bu hơtŭt 'bơm tơmam đêl sư kơtĭt oei, athei pih hơbĕn ao, hum lăm đak păng gô jing kơnê̆ 'mê̆-'mach truh kơmăng.

²³ Tơdah tơmam kiơ kơpal giơng sư, dah tơmam đêl sư hơ-oei na bu mă hơtŭt 'bơm gô jing kơnê̆ 'mê̆-'mach truh kơmăng.

²⁴ Tơdah bơngai drŏ-nglo 'bĭch hăm bơngai drŏ-kăn, na tơdrong 'mê̆-'mach bơngai drŏ-kăn 'bôh jơ̆ng, 'bơm tơ drŏ-nglo, bơngai drŏ-nglo gô jing kơnê̆ 'mê̆-'mach lăm tơpơh năr; giơng đêl sư 'bĭch kư̆m gô jing kơnê̆ 'mê̆-'mach.

²⁵ Tơdah bơngai drŏ-kăn 'bôh pham lơ năr, hloh kơ khei năr sư juăt kơ 'bôh jơ̆ng, dah tơdrong 'bôh pham noh đunh dêh, hloh kơ năr jing kơnê̆ 'mê̆-'mach, sư gô jing kơnê̆ 'mê̆-'mach đĭ lăm năr sư 'bôh jơ̆ng noh; thoi lăm năr kơplah sư jing kơnê̆ 'mê̆-'mach.

²⁶ Lăm năr sư 'bôh jơ̆ng. Lu giơng mă sư ngăl 'bĭch păng dôm tơmam kiơ đêl sư kơtĭt hơ-oei jing kơnê̆ 'mê̆-'mach ngăl, kư̆m thoi kơplah sư 'bôh hơbĕn.

²⁷ Bu hơtŭt 'bơm tơmam noh gô jing kơnê̆ 'mê̆-'mach athei pih hơbĕn ao sư hum lăm đak; păng gô jing kơnê̆ 'mê̆-'mach truh kơmăng.

²⁸ Mă-lei tơdah pham 'bôh jơ̆ng noh păt bơih, athei jô̆ đơ̆ng năr sư păt truh tơ tơpơh năr, đơ̆ng noh jô̆ sư jing rơgoh.

²⁹ Lăm năr mă tơhngam, sư gô rôp 'bar tŏ sem pơgâm dah 'bar tŏ kon sem kơtơp păng sư athei chĕp ba kơ 'bok soi tơ 'măng Bơsŭn Anih Akŭm.

³⁰ 'Bok soi gô pơyơ̆r minh pôm sem wă soi sơmah huai đơ̆ng tơdrong yoch păng minh pôm sem dơ̆ng pơm tơmam soi 'buh, na 'bok soi gô soi sơmah wă kơ sư rơgoh đơ̆ng yoch sư 'bơ̆t anăp Kră Yang, yua kơ tơdrong sư 'bôh pham lơ năr, jing kơnê̆ 'mê̆-'mach.

³¹ Thoi noh ih athei klah lê̆ lu bơngai Isơrael ataih đơ̆ng lu tơdrong kơnê̆ 'mê̆-'mach lu sư, kơnh hli kơ lu sư lôch lăm tơdrong kơnê̆ 'mê̆-'mach lu sư noh na pơm 'mê̆-'mach kơ Bơsŭn Anih Akŭm Inh mă oei tŏk-bŏk lu sư.

³² Noh jing tơdrong juăt gah bơngai drŏ-nglo mă đei tơdrong jĭ đuh lĕch đơ̆ng akâu sư păng bơngai drŏ-nglo lĕch đak kơtăk jing kơnê̆ 'mê̆-'mach.

³³ Gah bơngai drŏ-kăn 'bôh jơ̆ng dah bơngai drŏ-nglo lĕch đak kơtăk păng gah bơngai drŏ-nglo 'bĭch hăm bơngai drŏ-kăn oei 'bôh jơ̆ng kơnê̆ 'mê̆-'mach.