Lêwi 13 - Sơ̆p Hlabơar Nơ̆r 'Bok Kei-Dei

Tơdrong juăt gah jĭ chin

¹ Kră Yang khan dơ̆ng kơ Môis păng Arôn:

² Tơdah minh 'nu bơngai 'bôh akâu sư pơ'ngeh păng wă đuh, dah jĭ sư thoi lak kok păng jing hloi chin tơ akâu sư, athei đe chông ba sư tơ 'bok soi tơm Arôn, dah năm ba sư tơ minh 'nu lăm lu kon drŏ-nglo sư, mă pơm 'bok soi.

³ 'Bok soi gô lăng lăng rơka jĭ tơ akâu sư, tơdah sŏk sop 'bơ̆t jĭ tơ akâu sư noh tơplih jing kok păng Jĭ sư jrŭ 'biơ̆ kơ akar so, noh jing jĭ chin, tơdah 'bok soi lăng đang bơih, sư gô jô̆ bơngai âu jing jĭ kơnê̆.

⁴ Mă-lei tơdah anih lak jing kok lăm akâu sư huay kơ jrŭ 'biơ̆ hăm akar so sư păng sŏk sop ưh kơ jing kok ôh, 'bok soi sư gô chĭt bơngai noh lăm tơpơh năr.

⁵ Lăm năr mă tơpơh 'bok soi gô lăng sư dơ̆ng. Tơdah jĭ sư oei hơnơ̆ng huay kơ lanh tơ akar nai, 'bok soi gô chĭt sư mă 'bar lăm tơpơh năr dơ̆ng.

⁶ Hlôi kơ tơpơh năr noh 'bok soi gô lăng sư dơ̆ng. Tơdah lak sư noh yơ̆m bơih ưh pă lanh tơ akar nai, 'bok soi gô jô̆ sư rơgoh, noh jĭ pơtôch đĕch. Lei sư gô pih hơbĕn ao sư jing rơgoh.

⁷ Mă-lei tơdah đơ̆ng rŏng kơ sư dơ̆ng 'bơ̆t anăp 'bok soi wă jô̆ sư 'lơ̆ng rơgoh, na jĭ đuh sư iung lanh dơ̆ng tơ lăm akar, bơngai noh sư athei năm pơlơ̆k tơ 'bok soi tăl mă 'bar.

⁸ 'Bok soi gô lăng hơlen tơdah jĭ đuh sư iung lanh dơ̆ng tơ akâu akar sư na pơm kơ bơngai noh jing kơnê̆ 'mê̆-'mach; lei noh jơ̆ Jĭ chin bơih.

⁹ Tơdah minh 'nu bơngai 'bơm chin bơih, athei đe ba sư tơ'bôh tơ 'bok soi.

¹⁰ 'Bok soi gô lăng sư tơdah đei pơ'ngeh tơ lăm akar, pơm kơ sŏk sop jing kok păng đei 'breo lăm pơ'ngeh sư,

¹¹ noh boih Jĭ chin oei ngăn lăm akâu akar sư păng 'bok soi gô jô̆ sư kơnê̆ 'mê̆-'mach bơih, 'bok soi ưh kơ kăl chĭt sư ôh, yua kơ sư jing kơnê̆ bơih.

¹² Tơdah Jĭ chin lanh jơ̆p kơ akâu akar sư, đơ̆ng kơ̆l truh tơ jơ̆ng, jơ̆p-jang 'bok soi lăng 'bôh nhen.

¹³ 'Bok soi gô lăng, tơdah jĭ chin jơ̆p-jang 'bĕnh kơ akâu sư boih, 'bok soi jô̆ sư jing rơgoh kơ tơdrong jĭ noh, akar sư jing kok jơ̆p-jang akâu na noh jing rơgoh bơih.

¹⁴ Mă-lei năr ayơ mă sĕch akâu nhen đum 'brê na sư noh jing kơnê̆ 'mê̆-'mach.

¹⁵ Mưh 'bok soi lăng 'bôh sĕch akar sư đum 'brê na jô̆ sư jing kơnê̆ 'mê̆-'mach. Sĕch đum 'brê noh jing kơnê̆ 'mê̆-'mach, noh Jĭ chin bơih.

¹⁶ Mă-lei tơdah akâu akar sư đơ̆ng 'brê jing kok sư athei năm tơ'bôh akâu sư tơ 'bok soi.

¹⁷ Na 'bok soi lăng sư păng tơdah tơdrong jĭ sư jing kok bơih, na 'bok soi jô̆ sư rơgoh đơ̆ng tơdrong jĭ, yua kơ rơgoh 'lơ̆ng bơih.

¹⁸ Tơdah đei minh 'nu bơngai tơ akâu sư đêl pơtôch na klaih bơih,

¹⁹ păng đêl rơka pơtôch noh đei pơ'ngeh kok dah pơ'ngeh 'bri, bơngai noh athei năm tơ'bôh akâu sư kơ 'bok soi.

²⁰ 'Bok soi gô lăng sư, tơdah 'bơ̆t jĭ rơka sư jrŭ hloh kơ akar păng sŏk sop sư jing kok 'bok soi gô jô̆ sư jing kơnê̆ 'mê̆-'mach, noh jĭ chin, sư lĕch 'bơ̆t đêl pơtôch.

²¹ Mă-lei tơdah 'bok soi lăng boih, na sŏk sop 'bơ̆t jĭ sư ưh kơ jing kok păng ưh kơ jrŭ tơ akar, na jing thoi rơka so đĕch 'bok soi gô chĭt sư lăm tơpơh năr.

²² Tơdah jĭ sư lanh lăm akar, 'bok soi gô jô̆ sư jing kơnê̆ 'mê̆-'mach, noh sư đei jĭ chin.

²³ Tơdah anih lak sư hơnơ̆ng minh 'bôt, ưh kơ lanh rai să, noh đêl pơtôch so đĕch, 'bok soi gô jô̆ sư rơgoh.

²⁴ Mă-lei tơdah bu mă đei pơtŏk đơ̆ng ŭnh tơ akar sư, na rơka pơtŏk noh sư 'brê dah kok,

²⁵ 'bok soi gô lăng tơdah sŏk sop 'bơ̆t jĭ lak jing kok păng jrŭ hloh kơ akar so, noh jĭ chin đuh lăm đêl pơtŏk, 'bok soi jô̆ sư kơnê̆ 'mê̆-'mach, noh jĭ chin.

²⁶ Păng tơdah 'bok soi lăng anih noh, ưh kơ 'bôh sŏk sop 'bơ̆t jĭ sư huay kơ kok ôh, ưh kơ jrŭ hloh akar so păng 'bôh jĭ sư akar nhen thoi so, 'bok soi athei chĭt sư lăm tơpơh năr.

²⁷ Kơtĕch lăm tơpơh năr 'bok soi lăng lăng sư dơ̆ng, tơdah jĭ sư lanh jơ̆p lăm akar, 'bok soi athei jô̆ sư jing kơnê̆ 'mê̆-'mach, noh jĭ chin.

²⁸ Mă-lei tơdah jĭ sư oei hơnơ̆ng minh 'bôt ưh kơ lanh tơ lăm akar, nhen akar so noh đơ̆ng đêl pơtŏk ŭnh, 'bok soi gô jô̆ sư jing rơgoh, yua kơ noh đêl rơka pơtŏk so.

²⁹ Tơdah minh 'nu bơngai drŏ-nglo dah drŏ-kăn đei rơka tơ kơ̆l, dah 'bơ̆t kang sư,

³⁰ na 'bok soi gô lăng lăng rơka noh, tơdah rơka noh jrŭ hloh kơ akar so, đei sŏk sop jing kơmưt păng chăt hui, 'bok soi gô jô̆ sư jing kơnê̆ 'mê̆-'mach, noh jĭ đơđik, chin tơ kơ̆l dah 'bơ̆t sŏk kang sư.

³¹ Tơdah 'bok soi lăng tơdrong jĭ đơđik, ưh kơ jrŭ hloh akar so păng ưh kơ đei sŏk sop găm chăt 'bơ̆t rơka jĭ noh, na 'bok soi gô chĭt bơngai jĭ đơđik noh lăm tơpơh năr.

³² 'Bơ̆t năr mă tơpơh 'bok soi gô lăng lăng rơka Jĭ sư; tơdah đơđik sư ưh kơ lanh, ưh kơ đei sŏk sop kơmưt păng ưh kơ jrŭ hloh kơ akar so,

³³ bơngai noh gô hơkôih sŏk sop păng sŏk kơ̆l sư mă-lei ưh kơ hơkôih 'bơ̆t đơđik sư, đơ̆ng noh 'bok soi gô chĭt sư mă 'bar lăm tơpơh năr dơ̆ng.

³⁴ 'Bok soi gô lăng dơ̆ng tơdrong đơđik sư tơ lăm năr mă tơpơh, tơdah đơđik sư ưh kơ lanh rai să, ưh kơ jrŭ hloh kơ akar so, 'bok soi gô jô̆ sư jing rơgoh, bơngai jĭ noh athei pih ao tai sư na jing rơgoh.

³⁵ Mă-lei tơdah đơ̆ng rŏng jô̆ bơngai noh rơgoh bơih, na đei dơ̆ng jĭ sư lanh tơ akâu, 'bok soi athei lăng lăng dơ̆ng.

³⁶ Tơdah jĭ sư lanh tơ akâu akar sư, 'bok soi ưh kơ kăl ôh chơchă sŏk sop sư kơmưt dơ̆ng, noh jơ̆ kơnê̆ bơih.

³⁷ Mă-lei tơdah sư 'bôh jĭ đơđik hơnơ̆ng minh 'bôt, ưh pă lanh, na sŏk sop găm ưh kơ chăt 'bơ̆t rơka jĭ noh lei tơdrong jĭ noh klaih bơih, sư jing rơgoh; păng 'bok soi gô jô̆ sư rơgoh.

³⁸ Tơdah drŏ-nglo dah drŏ-kăn tơ akâu akar sư đei hơđoh kok, lak kok.

³⁹ 'Bok soi gô lăng. Tơdah akâu akar sư đei hơđoh kok, bul, bơngai noh jing rơgoh, yua kơ noh jơ̆ jĭ lak tơ akar sư đĕch.

⁴⁰ Tơdah sŏk kơ̆l minh 'nu bơngai drŏ-nglo tơtuh, noh jơ̆ bơngai kơ̆l hok, đe jô̆ sư oei rơgoh đĕch.

⁴¹ Tơdah minh 'nu bơngai drŏ-nglo sŏk sư tơtuh 'bơ̆t klĕng, bơngai noh klĕng hok, jô̆ sư oei rơgoh.

⁴² Mă-lei tơdah đei 'bơ̆t kơ̆l mưu dah 'bơ̆t, klĕng hok đei jĭ lak, noh jơ̆ jĭ chin, sư lĕch tơ klĕng hok dah 'bơ̆t kơ̆l mưu.

⁴³ 'Bok soi athei lăng sư. Tơdah 'bơ̆t anih jĭ sư 'brê kok, 'bơ̆t kơ̆l mưu, dah 'bơ̆t klĕng hok sư thoi jĭ chin tơ akâu akar sư.

⁴⁴ Lei bơngai âu jĭ chin, 'bok soi gô jô̆ sư kơnê̆ 'mê̆-'mach rơka tơ kơ̆l.

⁴⁵ Bơngai jĭ chin đei tơdrong jĭ noh gô hrŭk hơbĕn ao hiah, ưh kơ chô̆ sŏk, gom lê̆ sŏk kang sư na athei ôr: 'Mê̆-'mach, 'mê̆-'mach.

⁴⁶ Lăm khei năr tơdrong jĭ, bơngai noh kơnê̆ 'mê̆-'mach sư athei oei hơdrô̆ 'nguaih kơ anih hơdrŭm.

Tơdrong hơbĕn ao phơ̆k

⁴⁷ Tơdah đei hơbĕn ao 'bơm phơ̆ka thoi jĭ chin, hơbĕn ao hăm sŏk triu dah hơbĕn ao che,

⁴⁸ tơ brai tơdơ̆ng dah brai tơnanh, b tơ ao sŏk triu dah ao che, dah tơmam kiơ hăm akar.

⁴⁹ Tơdah phơ̆k noh jơk dah 'brê, tơ hơbĕn ao dah tơ tơmam akar, tơ brai tơdơ̆ng dah tơnanh dah tơ minh blah akar noh jơ̆ phơ̆k, đe gô tơ'bôh kơ 'bok soi.

⁵⁰ 'Bok soi gô lăng tơmam noh păng tah chĭt lê̆ tơmam noh lăm tơpơh năr.

⁵¹ Sư gô lăng lăng tơdrong phơ̆k noh lăm năr mă tơpơh. Tơdah tơdrong phơ̆k noh lanh tơ hơbĕn ao, tơ brai tơdơ̆ng dah tơnanh tơ akar dah tơmam kiơ mă hăm akar. Tơdrong phơ̆k noh jĭ chin rai lanh; tơmam noh jing kơnê̆ 'mê̆-'mach.

⁵² Thoi noh sư athei soh hơbĕn ao noh phơ̆k 'bơm tơ brai tơdơ̆ng dah brai tơnanh, tơ hơbĕn ao hăm sŏk triu dah hơbĕn ao che, dah tơmam kiơ mă hăm akar, yua kơ noh tơdrong jĭ chin rai lanh; đe athei soh lê̆ tơmam noh tơ lăm ŭnh.

⁵³ Na tơdah 'bok soi lăng boih ưh kơ 'bôh phơ̆k tơdrong jĭ noh lanh tơ hơbĕn ao tơ brai tơdơ̆ng dah tơnanh dah tơmam kiơ mă hăm akar.

⁵⁴ Thoi noh 'bok soi sư athei đe pih lê̆ tơmam mă 'bơm phơ̆k jĭ noh păng tah 'măn lê̆ sư wơ̆t mă 'bar lăm tơpơh năr dơ̆ng.

⁵⁵ Đang kơ pih bơih 'bok soi gô lăng lăng dơ̆ng tơmam mă đei tơdrong jĭ phơ̆k noh. Tơdah tơdrong jĭ phơ̆k noh ưh kơ tơkloh păng ưh kơ lanh jơ̆p, lei tơmam noh jơ̆ kơnê̆ 'mê̆-'mach bơih, ih athei soh lê̆ lăm ŭnh bĕ, yua kơ đei tơdrong jĭ sư sa tơ pah rŏng dah pah klak.

⁵⁶ Mă-lei tơdah đơ̆ng rŏng kơ pih 'bok soi lăng lăng dơ̆ng mưh tơdrong jĭ phơ̆k yơ̆m bơih athei sư hek hŭt lê̆ 'bơ̆t đêl jĭ phơ̆k noh tơ che dah tơ akar, tơ brai tơdơ̆ng dah brai tơnanh.

⁵⁷ Tơdah tơdrong jĭ phơ̆k sư oei đei dơ̆ng, 'bôh tơ hơbĕn ao, tơ brai tơdơ̆ng, tơnanh dah tơmam kiơ mă hăm akar, tơdrong jĭ phơ̆k noh lanh dơ̆ng bơih, ih athei soh lê̆ tơmam đei tơdrong jĭ phơ̆k noh tơ lăm ŭnh.

⁵⁸ Mă-lei hơbĕn ao, brai tơdơ̆ng dah brai tơnanh, dah tơmam kiơ mă hăm akar mă ih đei pih, tơdrong jĭ phơ̆k tơkloh bơih, ih athei pih dơ̆ng wơ̆t mă 'bar đơ̆ng noh sư gô rơgoh.

⁵⁹ Noh jing tơdrong juăt gah tơdrong jĭ chin đei phơ̆k 'bơm tơ hơbĕn ao hăm sŏk triu dah hăm che, tơ brai tơdơ̆ng dah tơnanh dah tơ tơmam kiơ mă hăm akar. Wă lăng kiơ̆ kơ tơdrong juăt noh na jô̆ sư rơgoh 'lơ̆ng dah oei kơnê̆ 'mê̆-'mach.