Lêwi 12 - Sơ̆p Hlabơar Nơ̆r 'Bok Kei-Dei

Tơdrong rơgoh lu drŏ-kăn hơiơch

¹ Kră Yang khan kơ Môis:

² Khan bĕ kơ kon pơlei Isơrael, tơdah đei minh 'nu drŏ-kăn anăp păng hơiơch kơ minh 'nu kon hơ'lơ̆p drŏ-nglo, sư gô jing kơnê̆ 'mê̆-'mach lăm tơpơh năr; kư̆m thoi kơplah sư 'bôh jơ̆ng mơ̆n.

³ Năr mă tơhngam đe gô kăt tơdra akar kơ kon drŏ-nglo sư.

⁴ Đơ̆ng noh bơngai drŏ-kăn noh athei oei lăm pêng-jĭt pêng năr, wă kơ rơgoh lê̆ pham sư, ưh kơ gơh hơtŭt 'bơm tơmam kiơ mă rơgoh 'lơ̆ng, dah năm mơ̆t tơ anih 'lơ̆ng rơgoh, dĭng truh đĭ năr pơm rơgoh akâu sư 'mơ̆i.

⁵ Mă-lei tơdah sư tơpŭ minh 'nu kon drŏ-kăn, sư gô jing 'mê̆-'mach lăm 'bar giĕng kư̆m thoi kơplah sư 'bôh hơbĕn mơ̆n, sư gô oei lăm tơdrong kơnê̆ 'mê̆-'mach sư, lăm tơdrâu-jĭt tơdrâu năr, wă kơ jing rơgoh 'lơ̆ng kơ đơ̆ng pham.

⁶ Tơdah kơtĕch boih măng năr oei rơgoh tơpŭ nge drŏ-nglo dah drŏ-kăn sư, ăn kơ sư năm ba nge noh kơ 'bok soi tơ Bơsŭn Anih Akŭm chĕp ba minh pôm kon triu minh sơnăm, wă pơm tơmam soi 'buh păng minh pôm kon kơtơp dah pơgâm wă pơm tơmam soi huai đơ̆ng yoch.

⁷ 'Bok soi gô pơyơ̆r tơmam soi noh, 'bơ̆t anăp Kră Yang wă soi sơmah huai yoch sư, kơplah noh sư gô jing rơgoh đơ̆ng pham sư, noh jơ̆ tơdrong juăt bơngai drŏ-kăn hơiơch kơ kon drŏ-nglo dah drŏ-kăn.

⁸ Tơdah sư chă ưh kơ kĕ đei minh pôm kon triu, sư athei rôp 'bar tŏ sem pơgâm dah 'bar tŏ kon kơtơp. Minh pôm 'măn kơ tơmam soi 'buh, minh pôm yua pơm kơ tơmam soi huai đơ̆ng yoch, 'bok soi gô soi sơmah huai yoch sư, na sư gô rơgoh.