Lêwi 1 - Sơ̆p Hlabơar Nơ̆r 'Bok Kei-Dei

Tơmam soi 'buh

¹ Đơ̆ng lăm Bơsŭn Anih Akŭm, Kră Yang krao Môis khan:

² Pơma roi bĕ kơ kon pơlei Isơrael thoi âu: Layơ bu lăm lu iĕm đei năm pơyơ̆r tơmam soi kơ Kră Yang athei rôp iŏk rơmo, triu dah bơbe đơ̆ng lăm khŭl sem dơrong na pơyơ̆r.

³ Tơdah tơmam sư pơyơ̆r tơmam soi 'buh hăm rơmo, sư athei pơyơ̆r rơmo tơno ưh kơ đei tơdrong jĭ kiơ, ăn kơ sư pơyơ̆r tơ 'măng Bơsŭn Anih Akŭm, 'bơ̆t anăp Kră Yang wă kơ Sư lăp đon iŏk.

⁴ Na bơngai pơyơ̆r sư dan ti sư tơ kơpal kơ̆l sem dơrong wă soi 'buh noh na kon sem noh gô jing tơmam soi pơklaih tơdrong yoch sư.

⁵ Sư gô 'bet pơlôch rơmo dăm noh 'bơ̆t anăp Kră Yang, na lu 'bok soi kon drŏ-nglo Arôn iŏk pham rơmo pơyơ̆r păng tơtreh tăp dăr kơ chơnang soi 'bơ̆t 'măng Bơsŭn Anih Akŭm.

⁶ Đơ̆ng noh lŏng akar rơmo păng kăt lơ kơnăt.

⁷ Lu kon drŏ-nglo Arôn gô iŏk 'long ŭnh tơkuh tơ kơpal chơnang soi.

⁸ Klaih kơ noh lu 'bok soi kon drŏ-nglo Arôn săp lu kơnăt 'nhĕm, kơ̆l păng rơmă dan kơpal 'long ŭnh, mă ŭnh oei khơ̆ng kơpal chơnang soi.

⁹ Mă-lei sư gô iŏk đak ôp klak păng tơkong. Đơ̆ng noh lu 'bok soi gô 'buh dan đĭ tơmam soi tơ kơpal chơnang soi, noh boih tơmam soi 'buh, wă khan tơmam soi 'buh lăm ŭnh sa wă pơyơ̆r đei 'bâu phu 'lơ̆ng ăn kơ Kră Yang.

¹⁰ Tơdah tơmam sư wă pơyơ̆r soi 'buh hăm triu dah bơbe sư athei rơih chă tơno mă ưh kơ đei jĭ kiơ,

¹¹ ket pơlôch hloi tơ gah yă-nơ̆m kơ chơnang soi 'bơ̆t anăp Kră Yang. Đơ̆ng noh lu 'bok soi kon drŏ-nglo Arôn gô iŏk pham tơtreh tăp dăr kơ chơnang soi.

¹² Kăt lơ kơnăt 'nhĕm, kơnăt 'nhĕm kơ̆l păng rơmă 'măn lê̆ pha, lu 'bok soi gô dan 'nhĕm noh tơ kơpal 'long ŭnh mă ŭnh sa oei khơ̆ng tơ chơnang soi

¹³ Mă-lei sư gô iŏk đak ôp klak păng tơkong. Đơ̆ng noh lu 'bok soi gô pơyơ̆r đĭ tơmam soi 'buh dan tơ kơpal chơnang soi noh pơm tơmam soi 'buh wă khan tơmam soi 'buh lăm ŭnh wă pơyơ̆r đei 'bâu phu 'lơ̆ng ăn kơ Kră Yang.

¹⁴ Tơdah tơmam sư pơyơ̆r ăn kơ Kră Yang tơmam soi 'buh hăm sem păr, athei iŏk pơyơ̆r sem pơgâm bri dah kon sem kơtơp.

¹⁵ 'Bok soi gô chĕp ba sem noh tơ chơnang soi, wĕch kơ̆l sư, na phang tơ kơpal chơnang soi; pham sư tơdjoh cheng chơnang soi.

¹⁶ 'Bok soi gô pleh lê̆ ben păng buch sŏk hăm klơ̆m lê̆ tơ cheng kơ chơnang soi tơ gah hơlĕch anih mă đe tuh lê̆ tơnuh ŭnh.

¹⁷ Sư gô hek 'bar pah pơnăr, mă-lei lê̆ sư oei tơklep ưh kơ tơpleh. Đơ̆ng noh 'bok soi 'buh dan tơ kơpal chơnang soi, ŭnh sa oei khơ̆ng, noh tơmam soi 'buh, wă khan tơmam soi 'buh lăm ŭnh, wă pơyơ̆r đei 'bâu phu 'lơ̆ng ăn kơ Kră Yang.