Le 9 - Sơ̆p Hlabơar Nơ̆r 'Bok Kei-Dei

Tơdrong truh mă pơđăm: Sem dơrong lôch kơ toi

¹ Kră Yang khan kơ Môis, năm bĕ tơ Pharaôn tơbăt kơ sư, Kră Yang 'Bok Kei-Dei kon pơlei Hêbrơ, đei khan: Achăng bĕ lê̆ kon pơlei Inh năm, wă kơ lu sư kơkuh kơ Inh;

² Tơdah ih ưh kơ ăn năm, oei pơkơ̆ng lu sư.

³ Lei ti mơsêh Kră Yang gô pơm kơ lu sem dơrong ih oei tơ tơmăn glă, pơm kơ aseh, aseh iĕ, lăk-đa, rơmo, bơbe păng triu: Gô lôch kơ toi.

⁴ Kră Yang gô klah lê̆, sem dơrong lu bơngai Isơrael ưh kơ đei minh pôm lôch kơ toi, sem dơrong lu bơngai Êyiptơ đei lôch kơ toi đĭ.

⁵ Kră Yang khan: Truh năr dơning, Kră Yang gô pơm tơdrong 'noh tơ lăm char.

⁶ Lăp truh năr dơning, na Kră Yang pơm tơdrong 'noh; đĭ-đăng sem dơrong lu bơngai Êyiptơ lôch ngăl; mă-lei lu sem dơrong lu bơngai Isơrael ưh kơ đei lôch minh pôm.

⁷ Na Pharaôn wơh bơngai năm lăng, 'bôh ưh kơ đei minh pôm sem dơrong, lu bơngai Isơrael lôch ôh. Mă-lei Pharaôn oei arăng kơ̆l, ưh kơ chu ăn kon pơlei năm.

Tơdrong truh mă tơdrâu: Pơtôch

⁸ Kră Yang khan kơ Môis păng Arôn, Athei chup tơnuh ŭnh 'bĕnh tơpang ti măr iĕm, na Môis gô săi pơđông tơnuh ŭnh 'noh tơ kơpal plĕnh. 'Bơ̆t anăp Pharaôn.

⁹ Tơnuh ŭnh gô jing 'mui păr jơ̆p-jang kơ dêh Êyiptơ păng pơtôch pơchah đuh lĕch đơ̆ng akâu bơngai păng sem dơrong jơ̆p-jang lăm dêh Êyiptơ.

¹⁰ Na bre sư chup tơnuh đơ̆ng tơnuh ŭnh, dơ̆ng 'bơ̆t anăp Pharaôn, Môis săi tơnuh ŭnh tơ kơpal, jing pơtôch pơchah lĕch đak đuh đơ̆ng akâu bơngai păng sem dơrong lu sư.

¹¹ Lu bơngai pơjâu yua kơ pơtôch đuh lĕch ưh kơ gơh dơ̆ng 'bơ̆t anăp Môis yua kơ lu bơngai pơjâu kư̆m đei pơtôch lei-lăi thoi đĭ-đăng bơngai Êyiptơ.

¹² Kră Yang pơm kơ Pharaôn, arăng kơ̆l ưh kơ chu mơ̆ng Môis păng Arôn. Trŏ thoi nơ̆r Kră Yang khan bơih kơ Môis.

Tơdrong truh mă tơpơh: 'Mi prĕl

¹³ Kră Yang khan kơ Môis, ih athei iung mă hrôih năm tơ'bơ̆p Pharaôn na khan kơ sư: Kră Yang 'Bok Kei-Dei kon pơlei Hêbrơ, đei khan: Athei achăng lê̆ kon pơlei Inh năm, wă kơ lu sư kơkuh kơ inh,

¹⁴ 'Bơ̆t jơ 'nâu, Inh gô tuh tơdrong pơmat jĭ lăm jơhngơ̆m ih đĭch đam ih; păng kon pơlei ih, wă kơ ih băt, jơ̆p kơ teh đak ưh kơ đei bu thoi Inh.

¹⁵ Tơdah, Inh yơ̆r ti, teh tôn ih kon pơlei ih hăm tơdrong jĭ apoh, lôch hiong đĭ-đăng lăm teh âu.

¹⁶ Mă-lei yua kơ tơdrong 'nâu Inh rong ih arih wă kơ ih 'bôh tơdrong mơsêh Inh, wă kơ anăn Inh đei ră roi kơtơ̆ng ư-ang jơ̆p-jang kơ teh đak.

¹⁷ Tơdah ih oei pơang wă pơgăn, ưh kơ ăn kon pơlei inh năm,

¹⁸ Lei dơning trŏ jơ 'nâu, inh gô ăn plĕnh đei 'mi prĕl tih, lăm dêh Êyiptơ mă đơ̆ng blŭng-a sơ̆ khơ̆ dang ei ưh tam mă đei 'mi prĕl tih lei-lăi thoi năr noh.

¹⁹ Lei na mă tĕnh dang ei athei bơngai năm dui puh akŭm sem dơrong ih păng đĭ-đăng lu tơmam ih đei đơ̆ng mir chŭn wih tơ hnam wă huay truh kơ sư. Yua kơ 'mi prĕl gô jruh huŏng 'bơm bơngai păng sem dơrong tơ tơmăn glă tơ mir noh tơdah ưh kơ đei bu puh brŏk tơ hnam lei lu sư gô lôch đĭ.

²⁰ Dôm lu bơngai bơ̆jang kơ Pharaôn đei jơhngơ̆m hli kơ nơ̆r Kră Yang đei khan, lu sư hăt hot puh đĭch đam athei puh sem dơrong rơmo, triu sư wih tơ hnam;

²¹ Mă-lei đei lu bơngai mơ'nah ưh kơ hiơ̆k ôh kơ nơ̆r Kră Yang khan, lê̆ lu đĭch đam păng sem dơrong lu sư oei tơ bri tơ mir tơ tơmăn glă noh.

²² Kră Yang khan kơ Môis, athei yơ̆r ti ih tơ plĕnh, wă kơ 'mi prĕl đơ̆ng kơpal jruh jơ̆p-jang kơ dêh Êyiptơ, 'bơm tơ akâu bơngai 'bơm tơ sem dơrong păng đĭ-đăng hla 'nhot sa mă đe pơtăm tơ mir mă tơ jơ̆p-jang dêh Êyiptơ.

²³ Na Môis yơ̆r hloi 'long jra sư tơ plĕnh, Kră Yang ăn đei grơ̆m glaih 'mi prĕl jruh, glaih taih jơ̆p kơpal teh. Na Kră Yang ăn plĕnh 'mi prĕl jruh jơ̆p kơ dêh Êyiptơ.

²⁴ Đei 'mi prĕl jruh tih tơpă păng glaih taih rŏng anăp, kư̆m dêh, đơ̆ng sơ̆ khơ̆ tơ dang ei lăm dêh char Êyiptơ tam mă đei tơdrong truh thoi noh.

²⁵ Prĕl jruh jơ̆p-jang kơ dêh Êyiptơ 'mi prĕl pơrăm đĭ sem dơrong tơmam tơ tơmăn glă, 'bơm kon bơngai, 'bơm sem dơrong, 'bơm 'nhot sa, lăm mir păng kư̆m 'bơm truh tơ đĭ-đăng lu 'long păk tơgơ̆ mơ̆n.

²⁶ Lăp pă minh tơring Gôsen đĕch anih kon pơlei Isơrael oei mă ưh kơ đei 'mi prĕl truh tơ noh.

²⁷ Pharaôn wơh đe krao hloi Môis păng Arôn khan: Wơ̆t 'nâu inh yoch boih; Kră Yang jơ̆ Tơ'ngla 'lơ̆ng tơpăt; inh păng kon pơlei inh yoch tơpă.

²⁸ Krao khan bĕ kơ Kră Yang, wă kơ jah huay kơ grơ̆m glaih păng 'mi prĕl; na inh gô lê̆ lu iĕm năm, ưh pă gô đunh dơ̆ng boih.

²⁹ Môis tơl khan kơ sư: Lăp mưh inh lĕch hlôi tơ 'nguaih kơ pơlei, inh gô yơ̆r ti tơ Kră Yang; grơ̆m glaih gô pơdơh, 'mi prĕl gô pă đei dơ̆ng, wă kơ ih băt kơ plĕnh teh đơ̆ng Kră Yang.

³⁰ Mă-lei inh băt kơ ih păng lu bơngai bơ̆jang kơ ih ưh tam mă hli yom kơ Kră Yang 'Bok Kei-Dei 'mơ̆i.

³¹ Lăm kơplah bơyan, 'ba tơ'bâu huăt, 'long jơla đei bluh pơkao, lei na 'ba hăm 'long jơla păk răm đĭ.

³² Mă-lei oei pă 'ba mi mă huăt klui đĕch huay kơ 'bơm păk răm.

³³ Môis lĕch đơ̆ng Pharaôn, năm tơ 'nguaih pơlei; sư yơ̆r ti tơ Kră Yang, grơ̆m glaih păng 'mi prĕl pơdơh na đak 'mi kư̆m prăng hloi ưh pă kơtoh tơ teh dơ̆ng boih.

³⁴ Kơplah Pharaôn 'bôh, 'mi prĕl păng grơ̆m glaih pơdơh đĭ boih, sư păng lu bơngai bơ̆jang kơ sư arăng kơ̆l ưh kơ chu păng lu sư oei pơm yoch dơ̆ng,

³⁵ Pharaôn arăng kơ̆l, ưh kơ 'maih achăng kon pơlei Isơrael năm, trŏ thoi nơ̆r Kră Yang đei khan bơih kơ Môis păng yua 'bơ̆r Môis pơma.