Le 8 - Sơ̆p Hlabơar Nơ̆r 'Bok Kei-Dei

Tơdrong truh mă 'bar: Đei kit

¹ Kră Yang khan kơ Môis: Năm tơ'bơ̆p bĕ Pharaôn păng roi tơbăt kơ sư, Kră Yang đei khan thoi âu: Athei achăng kon pơlei inh năm, wă kơ lu sư awih awăn kơkuh kơ inh.

² Tơdah ih ưh kơ achăng lu sư năm lei inh gô ăn tơdrong truh đei kit tơ jơ̆p-jang kơ dêh Êyiptơ.

³ Tơ đak krong Nil gô 'bĕnh kơ kit, lu kit gô mơmŏ mơ̆t lăm hnam pơtao tơ anih bơ̆jang, anih tep păng tŏk kơpal giơng ih, mơ̆t hloi lăm hnam đĭch đam păng kon pơlei ih, lăm anih gŏ, lăm kơthŭng ih jrâu tơpŭng pơm 'bĕng.

⁴ Kit ei gô mơmŏ tŏk tơ akâu ih, akâu kon pơlei păng rim 'nu kơ đĭch đam ih.

⁵ Na, Kră Yang khan kơ Môis: Khan bĕ kơ Arôn: Athei chĕp 'long jra yơ̆r ti tơ kơpal thong đak tih iĕ, đak dơnâu, wă kơ kit tŏk đơ̆ng noh năm tơ jơ̆p kơ dêh Êyiptơ.

⁶ Na, Arôn yơ̆r ti sư tơklă đak krong dêh Êyiptơ, kit tih iĕ mơmŏ tŏk lanh 'bĕnh jơ̆p-jang hloi dêh Êyiptơ.

⁷ Lu bơngai pơjâu tơwir kư̆m pơm lei-lăi thoi noh mơ̆n, wă pơm kơ kit tih iĕ mơmŏ tŏk jơ̆p kơ dêh Êyiptơ.

⁸ Pharaôn krao hloi Môis păng Arôn na khan: Krao khan bĕ kơ Kră Yang wă kơ Sư puh kit weh đơ̆ng inh păng đơ̆ng kon pơlei inh; na inh gô achăng kon pơlei Hêbrơ năm pơyơ̆r tơmam soi kơkuh kơ Kră Yang.

⁹ Môis khan kơ Pharaôn: Apinh ih đei jơhngơ̆m hiôk tơbăt ăn kơ inh layơ ih wă kơ kit weh đơ̆ng ih đơ̆ng hnam ih đơ̆ng đĭch đam hăm đơ̆ng kon pơlei ih, na inh krao khan apinh Kră Yang wă kơplah noh kit lôch đĭ păng oei pă lăm đak krong đĕch.

¹⁰ Pơtao tơl khan: Năr dơning, Môis khan: Lei ăn kơ nơ̆r ih pơma noh jing thoi noh, wă kơ ih băt ưh kơ đei bơngai bu thoi Kră Yang 'Bok Kei-Dei lu nhôn.

¹¹ Na kit gô weh đơ̆ng ih, đơ̆ng hnam ih, đơ̆ng đĭch đam hăm đơ̆ng kon pơlei ih; lu sư oei pă tơ lăm đak krong Nil đĕch.

¹² Môis păng Arôn lĕch đơ̆ng Pharaôn; Môis krao apinh Kră Yang kơ tơdrong kit mă sư đei pơkă boih kơ Pharaôn.

¹³ Kră Yang pơm lei-lăi thoi nơ̆r Môis apinh; kit tih iĕ đơ̆ng lăm hnam lăm pơlei, tơ bri, mir tơ 'nguaih lôch đĭ-đăng.

¹⁴ Lu đe dônh akŭm kit tih iĕ hơlôk hơlak thoi pôi tih păng 'bâu ôm jơ̆p-jang kơ dêh sư.

¹⁵ Na Pharaôn lăp sư 'bôh tơdrong truh hlôi boih, sư arăng jơhngơ̆m ưh kơ chu dơ̆ng, ưh kơ wă mơ̆ng Môis păng Arôn, lei-lăi thoi nơ̆r Kră Yang đei khan boih.

Tơdrong truh mă pêng: Đei sơmĕch

¹⁶ Kră Yang khan kơ Môis: Athei Arôn: Yơ̆r bĕ 'long jra ih, tôn tơteh: Wă kơ 'mui teh noh jing sơmĕch jơ̆p-jang kơ dêh Êyiptơ.

¹⁷ 'Bar 'nu bre sư pơm thoi noh. Na Arôn chĕp 'long jra yơ̆r ti tơ kơpal tôn tơ teh, 'mui teh jing hloi sơmĕch, kôp 'bĕnh-'bang kơ bơngai păng sem dơrong; đĭ-đăng 'mui teh jing kon sơmĕch ngăl jơ̆p lăm dêh Êyiptơ.

¹⁸ Lu bơngai pơjâu kư̆m 'maih tơwir pơm lei-lăi, wă kơ 'mui teh jing kon sơmĕch, mă-lei lu sư pơm ưh kơ gơh, na sơmĕch 'bĕnh kơ bơngai păng sem dơrong lu sư.

¹⁹ Lu bơngai pơjâu khan kơ Pharaôn, 'Nâu boih hơnglâu ti Kră Yang 'Bok Kei-Dei; mă-lei Pharaôn oei arăng kơ̆l ưh kơ chu, ưh kơ mơ̆ng Môis păng Arôn thoi nơ̆r Kră Yang khan boih.

Tơdrong truh mă puăn: Roi wŏng

²⁰ Đơ̆ng noh, Kră Yang khan kơ Môis, Pharaôn sư gô lĕch ngôi jê̆ đak krong, ih athei iung mă hrôih năm tơ'bơ̆p sư na roi tơbăt ăn kơ sư, Kră Yang khan thoi âu: Ăn kon pơlei inh năm, wă kơ lu sư gơh kơkuh kơ inh.

²¹ Tơdah ih ưh kơ achăng ăn lu sư năm, lei Inh gô ăn roi wŏng truh lơ iam tơ ih, tơ đĭch đam ih, tơ kon pơlei păng tơ lăm hnam ih; tơ hnam bơngai Êyiptơ, roi wŏng iam 'bĕnh-'bang, jơ̆p-jang kơpal teh hloi.

²² Mă-lei năr noh, lăm tơring Gôsen, anih kon pơlei Inh oei, ưh kơ đei roi wŏng iam, wă kơ ih băt kơ Inh, Kră Yang oei lăm dêh 'nâu.

²³ Lei Inh gô klah kon pơlei Inh hăm kon pơlei ih pha. Truh năr dơning, tơdra hlĭch 'nâu gô đei.

²⁴ Kră Yang pơm thoi nơ̆r Sư, Đei roi wŏng lơlap mơ̆t 'bĕnh lăm hnam Pharaôn, lăm hnam dơnŏ đĭch đam sư, roi wŏng kăp pơrăm jơ̆p-jang kơ teh lăm dêh Êyiptơ.

²⁵ Pharaôn krao hloi Môis păng Arôn na khan: Năm bĕ pơyơ̆r tơmam soi kơ Kră Yang 'Bok Kei-Dei lu iĕm tơ lăm dêh âu:

²⁶ Mă-lei Môis khan: Pơm thoi noh ưh kơ gơh ôh; yua kơ dôm tơmam soi mă lu nhôn wă soi pơyơ̆r kơ Kră Yang 'Bok Kei-Dei lu nhôn jing minh tơdrong krưp dêh kơ bơngai Êyiptơ. Tơdah lu nhôn pơyơ̆r tơmam soi sơmah mă lu sư areh. Hăm trŏ lu sư gô klơ̆m nhôn hăm tơmo?

²⁷ Lu nhôn athei năm tơ char glă, dang pêng năr kơ trong, wă pơyơ̆r tơmam soi sơmah kơ Kră Yang 'Bok Kei-Dei lu nhôn, kiơ̆ thoi nơ̆r Sư gô bơtho tơ'bôh tơtă kơ lu nhôn.

²⁸ Pharaôn khan: Inh gô ăn lu iĕm năm, wă kơ iĕm năm pơyơ̆r tơmam soi sơmah kơ Kră Yang 'Bok Kei-Dei lu iĕm, tơ char glă, mă-lei lu iĕm 'nĕ năm ataih hloh kơ noh. Krao khan bĕ kơ inh hai!

²⁹ Môis drơ̆ng khan: Inh gô krao khan apinh Kră Yang tơgŭm ih; dơning roi wŏng gô weh ataih đơ̆ng ih, đơ̆ng đĭch đam ih păng kon pơlei lu iĕm. Mă-lei apinh ih, 'Nĕ pă hơlĕnh kơ lu nhôn dơ̆ng, na ưh kơ ăn kon pơlei nhôn năm pơyơ̆r tơmam soi sơmah kơ Kră Yang nhôn.

³⁰ Thoi noh Môis lĕch hloi đơ̆ng Pharaôn păng Krao khan kơ Kră Yang.

³¹ Kră Yang pơm lei-lăi thoi nơ̆r Môis apinh, na roi wŏng weh ataih hloi đơ̆ng Pharaôn, đơ̆ng đĭch đam păng đơ̆ng kon pơlei sư, ưh pă đei minh pôm dơ̆ng.

³² Mă-lei Pharaôn oei arăng kơ̆l ưh kơ chu dơ̆ng mơ̆n, ưh kơ ăn kon pơlei năm ôh.