Le 40 - Sơ̆p Hlabơar Nơ̆r 'Bok Kei-Dei

Pơdơ̆ng Bơsŭn Anih Akŭm

¹ Đơ̆ng noh Kră Yang khan kơ Môis:

² Năr mă mônh lăm khei mônh ih athei pơdơ̆ng tơiung Bơsŭn Anih Akŭm.

³ Dan hom pơgơ̆p tơ lăm noh păng iŏk che pĕng găn lê̆.

⁴ Iŏk tơmơ̆t gơ'bang tơ lăm, dan proh hơmet dôm lu tơmam kơpal gơ'bang, đơ̆ng noh chĕp jơ̆ng ŭnh kơđeng tơmơ̆t păng tơ̆k rim ŭnh kơđeng.

⁵ Dan chơnang soi maih wă soh tơmam 'bâu phu 'bơ̆t anăp hom pơgơ̆p păng iŏk che dăng pĕng klơ̆p 'măng mơ̆t tơ bơsŭn.

⁶ Dan chơnang soi 'buh noh 'bơ̆t anăp 'măng wă mơ̆t tơ Bơsŭn Anih Akŭm;

⁷ Dan kơthŭng đak tơ tŏk-bŏk sơlam Bơsŭn Anih Akŭm hăm chơnang soi đơ̆ng noh tuh đak tơ lăm noh;

⁸ Pơm cham jum dăr păng pĕng che 'bơ̆t 'măng mơ̆t tơ cham.

⁹ Ih iŏk đak rơmă 'bâu phu na pik tơ Bơsŭn păng rim kơ tơmam lăm noh; pơyơ̆r bơsŭn păng dôm lu tơmam yua lăm Bơsŭn păng Bơsŭn noh gô 'lơ̆ng rơgoh.

¹⁰ Đơ̆ng rŏng kơ noh ih pik đak rơmă 'bâu phu tơ chơnang soi 'buh pơyơ̆r păng dôm tơmam yua lăm chơnang soi; pơyơ̆r chơnang soi, na chơnang soi jing 'lơ̆ng rơgoh tơpă.

¹¹ Ih kư̆m pik rơmă 'bâu phu tơ kơthŭng đak păng jơ̆ng sư păng pơyơ̆r kơthŭng noh.

¹² Đang kơ noh, ih chông Arôn hăm lu kon drŏ-nglo sư năm jê̆ 'bơ̆t 'măng Bơsŭn Anih Akŭm, na tuh hum lu sư.

Pơjing ăn Arôn hăm lu kon drŏ-nglo sư

¹³ Đơ̆ng rŏng kơ noh ih pơhrŭk kơ Arôn ao 'lơ̆ng rơgoh, pik đak rơmă 'bâu phu păng pơyơ̆r sư; wă kơ sư jang kơ Inh lăm tơdrong jang 'bok soi tơm.

¹⁴ Ih kư̆m chông ba lu kon drŏ-nglo Arôn păng pơhrŭk ăn kơ lu sư ao tai;

¹⁵ pik ăn đak rơmă 'bâu phu thoi ih pik ăn kơ 'bă lu sư wă kơ lu sư jang kơ Inh lăm tơdrong jang 'bok soi. Tơdrong pik đak rơmă 'bâu phu pôk ăn noh wă pơsĭt kơ lu sư pơm 'bok soi ling-lang lăm rim jơhnơr.

¹⁶ Na Môis pơm kiơ̆ đĭ thoi dôm tơdrong Kră Yang đei tơtă ăn.

¹⁷ Lăm năr mă mônh khei mônh lăm sơnăm mă 'bar, lu sư pơm tơiung Bơsŭn Anih Akŭm.

¹⁸ Môis pơdơ̆ng tơiung Bơsŭn dan dôm bơlôh rơnuh, pơ̆ng tơ̆r, roh hơbăt păng tơiung lu jrăng.

¹⁹ Na Sư bơyar che bơbŭng tơ kơpal Bơsŭn, na sư klơ̆p tơ kơpal bơbŭng kiơ̆ thoi nơ̆r Kră Yang pơkă kơ Môis.

²⁰ Môis tah 'bar hlak gơ'bang chih Mơjĭt Khôi Juăt tơ lăm Hom Tơdrong Pơgơ̆p, sư sôr 'long tơnung. Păng dan tơnglơ̆p tơdrong 'mêm mơnat tơ kơpal hom noh.

²¹ Sư tung ba hom tơmơ̆t lăm Bơsŭn Anih Akŭm păng pĕng che găn hom tơdrong pơgơ̆p kiơ̆ thoi nơ̆r Kră Yang đei pơkă kơ Môis.

²² Sư dan lê̆ gơ'bang lăm Bơsŭn Anih Akŭm, gah yă-nơ̆m 'nguaih kơ che pĕng noh;

²³ na dan 'bĕng tơ gơ'bang, 'bơ̆t anăp Kră Yang, kiơ̆ thoi nơ̆r Kră Yang đei pơkă kơ Môis.

²⁴ Sư dan lê̆ jơ̆ng ŭnh kơđeng lăm Bơsŭn Anih Akŭm tơklă hăm gơ'bang gah gơal.

²⁵ Na sư tơ̆k ŭnh kơđeng 'bơ̆t anăp Kră Yang kiơ̆ thoi nơ̆r Kră Yang đei pơkă kơ Môis.

²⁶ Sư dan chơnang soi maih 'bơ̆t anăp che pĕng lăm Bơsŭn Anih Akŭm.

²⁷ Kơpal chơnang noh, sư soh tơmam 'bâu phu kiơ̆ thoi nơ̆r Kră Yang đei pơkă kơ Môis.

²⁸ Sư iŏk che pĕng 'bơ̆t 'măng mơ̆t tơ Bơsŭn Anih Akŭm.

²⁹ Sư dan chơnang soi 'buh 'bơ̆t 'măng mơ̆t tơ Bơsŭn Anih Akŭm sư pơyơ̆r tơmam soi 'buh păng tơmam soi phe 'ba tơpŭng, kiơ̆ thoi nơ̆r Kră Yang đei pơkă kơ Môis.

³⁰ Sư dan kơthŭng đak 'bơ̆t sơlam Bơsŭn Anih Akŭm păng chơnang soi, sư tuh đak lăm noh wă răk kơ ôp 'nhao;

³¹ Môis, Arôn hăm lu kon drŏ-nglo Arôn, yua đak 'nâu ôp jơ̆ng ti lu sư.

³² Mưh layơ lu sư wă mơ̆t tơ lăm Bơsŭn Anih Akŭm păng năm jê̆ chơnang soi lei lu sư ôp hơrao jơ̆ng ti lu sư, kiơ̆ thoi nơ̆r Kră Yang đei pơkă kơ Môis.

³³ Tăp dăr Bơsŭn Anih Akŭm păng chơnang soi, sư kư̆m pơm cham păng pĕng che 'bơ̆t 'măng mơ̆t lăm cham. Thoi 'noh Môis pơm keh tôm tơdrong jang noh.

Rang hơdah đơ̆ng Kră Yang

³⁴ Hơmơ̆l gom Bơsŭn Anih Akŭm păng tơdrong hơdah rang mơnhal Kră Yang 'bĕnh kơ Bơsŭn,

³⁵ dĭng mah Môis ưh kơ gơh kơ mơ̆t lăm Bơsŭn Anih Akŭm, yua kơ hơmơ̆l tơdrong hơdah rang mơnhal Kră Yang 'bĕnh kơ Bơsŭn.

³⁶ Thoi noh, lăm dôm lu trong kon pơlei Isơrael yak năm, mưh layơ hơmơ̆l đông weh đơ̆ng kơpal Bơsŭn Anih Akŭm lei lu sư yuih Bơsŭn yak nơnăm;

³⁷ mă-lei mưh hơmơ̆l ưh kơ đông weh lei lu sư kư̆m ưh kơ yak năm, dĭng mă truh tơ năr ayơ hơmơ̆l mă đông weh 'mơ̆i.

³⁸ Lăm rim trong kon pơlei Isơrael yak năm đei hơmơ̆l Kră Yang tơ kơpal Bơsŭn Anih Akŭm tơ kơ'năr đei hơmơ̆l gom păng kơmăng đei ŭnh lĕch pơchrang kơpal tơ'bôh 'bơ̆t anăp đĭ-đăng kon pơlei Isơrael.