Le 38 - Sơ̆p Hlabơar Nơ̆r 'Bok Kei-Dei

Pơm chơnang soi 'buh

¹ Sư pơm chơnang soi 'buh păng 'long keo (sitim), puăn pah tŏ ăi tor sư pơđăm hơgăt, wơ̆l sư pơđăm hơgăt, kơjung pêng hơgăt.a

² Sư pơm puăn pah mum chơnang soi đei pơm ake kơtă hloi, ake noh lom hăm kong. Đơ̆ng noh sư pơm dôm lu tơmam yua lăm chơnang soi noh păng kong;

³ Sư pơm tơmam yua lăm noh, đei gŏ bô̆i iĕ mong tơnuh, gơ'bênh, kơthao, bô̆i mong đak wă ruh, chơkrơ păng bô̆i wă mong ngar.

⁴ Sư pơm minh blah grang hơdrao păng kong 'măn tơ ala chơnang đơ̆ng jơ̆ng truh tơ tŏk-bŏk.

⁵ Păng sư hling pơm puăn tŏ khuen tơ puăn pah mum grang tanh păng kong, wă sôr 'long tơnung ting tung.

⁶ Sư pơm 'long ting tung hăm 'long keo, đơ̆ng noh lom sư hăm kong.

⁷ Sư sôr 'long ting tung lăm khuen 'bơ̆t 'bar pah chơnang wă ting tung sư. Sư pơm chơnang soi lăm to sư kơkhơng.

Pơm kơthŭng păng kong

⁸ Sư iŏk kơmĭl hăm kong đơ̆ng lu drŏ-kăn bơ̆jang 'bơ̆t 'măng Bơsŭn Anih Akŭm pơyơ̆r, pơm hĭ minh pôm kơthŭng hăm jơ̆ng sư.

Cham Bơsŭn Anih Akŭm

⁹ Sư pơm cham Bơsŭn Anih Akŭm gah gơal tor să minh-hrĕng hơgăt, gah gơal che 'bui pĕng tanh hăm brai se.

¹⁰ 'Bar-jĭt tŏ rơnuh păng 'bar-jĭt bơlôh păng kong păng gơwŏk hăm tơlei pơm păng hu.

¹¹ Tơ gah yă-nơ̆m đei minh-hrĕng hơgăt,b 'bar-jĭt tŏ jrăng păng 'bar-jĭt tŏ bơlôh rơnuh jrăng pơm păng kong păng gơwŏk păng tơlei pơm păng hu.

¹² Gah bơmơ̆t, pơđăm-jĭt hơgăt,c mơjĭt tŏ jrăng păng mơjĭt tŏ bơlôh rơnuh pơm păng hu păng gơwŏk hăm tơlei pơm păng hu.

¹³ Gah hơlĕch pơđăm-jĭt hơgăt mơ̆n.

¹⁴ Minh pah gah 'ma kơ 'măng cham Bơsŭn Anih Akŭm mơjĭt-pơđăm hơgăt pêng tŏ jrăng hăm pêng tŏ bơlôh rơnuh.

¹⁵ Gah 'ngiĕo kơ 'măng cham Bơsŭn Anih Akŭm kư̆m dai mơjĭt-pơđăm hơgăt, pêng tŏ jrăng păng pêng tŏ bơlôh rơnuh mơ̆n.

¹⁶ Đĭ-đăng che pĕng tăp dăr kơ cham Bơsŭn Anih Akŭm đe tanh hăm brai se.

¹⁷ Đĭ-đăng jrăng păng bơlôh rơnuh đe pơm păng kong, gơwŏk hăm tơlei pơm păng hu, kơ̆l jrăng lom hăm hu, đĭ-đăng jrăng lăm cham Bơsŭn Anih Akŭm ei đei pơ̆n păng gơwŏk tơlei hu.

¹⁸ Che 'bơ̆t 'măng cham đe tanh păng brai jơk, 'brê hơhĭm, 'brê gôh, đe tanh păng brai se.d Tor sư 'bar-jĭt hơgăt păng kơjung sư pơđăm hơgăte thoi lu kơ che pĕng tăp dăr kơ cham.

¹⁹ Jrăng puăn tŏ hăm puăn tŏ bơlôh rơnuh pơm păng kong lu jrăng păng dôm lu gơwŏk tơlei pơm păng hu,

²⁰ Hơdrơ̆ng tăp dăr yua pơdơ̆ng Bơsŭn Anih Akŭm păng tăp dăr kơ cham đe pơm păng kong.

Maih, hu, kong đe yua lăm anih rơgoh 'lơ̆ng

²¹ 'Nâu đe jô̆ tơmam yua lăm pơm Bơsŭn Anih Akŭm, anih mă tah 'bar hlak tơmo chih mơjĭt khôi juăt kiơ̆ thoi Môis pơkă kơ bơngai Lêwi bơwei, chih răk đĭ-đăng 'nâu đơ̆ng Ithamar kon drŏ-nglo 'bok soi tơm Arôn pơgơ̆r.

²² Bêsalel kon drŏ-nglo Uri sâu Hur đơ̆ng adrĕch adrung Juđa, pơm pơkeh đĭ tôm dôm tơdrong kiơ̆ thoi Kră Yang đei pơkă boih.

²³ Bơngai tơgŭm sư Ôhôliap kon drŏ-nglo Ahisamak, đơ̆ng adrĕch adrung Đan. Bơngai jang chrek, gơh chhơ̆ tơchĕng pơm dôm tơmam păng gơh tanh brai jơk 'brê gôh, 'brê hơhĭm păng brai se.

²⁴ Đĭ-đăng maih mă yua boih lăm tơdrong jang pơm Bơsŭn Anih Akŭm đơ̆ng lu kon pơlei Isơrael pơyơ̆r tơpơng 'ma 'ngiĕo 'lơ̆ng,f pơtih thoi maih đơ̆ng đe pơyơ̆r, đei 'bar-jĭt tơsĭn talâng noh đei minh-rơbâu kĭ lăm anih 'lơ̆ng rơgoh.

²⁵ Hu đơ̆ng lu đe jô̆ boih đơ̆ng lu bơngai pơyơ̆r đei pêng-rơbâu puăn-hrĕng kĭ, g kiơ̆ kơ kĭ lăm anih rơgoh 'lơ̆ng.

²⁶ Thoi noh lăm minh puăt seikơl đơ̆ng rim 'nu bơngai kiơ̆ kơ seikơl lăm anih rơgoh 'lơ̆ng. Đĭ-đăng bơngai drŏ-nglo đe jô̆ boih iŏk đơ̆ng 'bar-jĭt sơnăm tơ kơpal. Đei tơdrâu-hrĕng pêng-rơbâu, pơđăm-hrĕng pơđăm-jĭt 'nu drŏ-nglo.h

²⁷ Đei pêng-hrĕng puăn-jĭt kĭ hu, yua hling pơm minh-hrĕng tŏ bơlôh rơnuh kơ jrăng tơ'băk che anih rơgoh 'lơ̆ng: Minh-hrĕng talâng pơm kơ minh-hrĕng bơlôh rơnuh, minh talâng hling kơ minh bơlôh rơnuh.

²⁸ Hăm pêng-jĭt kĭ hu na yua pơm gơwŏk, lom kơ̆l jrăng hăm gơwŏk tơlei wă pơtrơp băl lu jrăng noh.

²⁹ Kong đe chĕp ba pơyơ̆r, akŭm đĭ-đăng đei 'bar-rơbâu puăn-hrĕng kĭ.i

³⁰ Lu sư yua kong noh pơm bơlôh jrăng 'bơ̆t 'măng mơ̆t tơ Bơsŭn Anih Akŭm chơnang soi pơm păng kong, hơdrao sư pơm păng kong lu tơmam yua tơ gơ'bang yua lăm chơnang soi.

³¹ Lu bơlôh jrăng tăp dăr kơ kơdeng hăm bơlôh jrăng 'bơ̆t 'măng kơdeng păng lu hơdrơ̆ng war bơsŭn păng đĭ-đăng 'long hơdrơ̆ng tăp dăr kơ kơdeng.