Le 37 - Sơ̆p Hlabơar Nơ̆r 'Bok Kei-Dei

Pơm hom tơdrong pơgơ̆p

¹ Bêsalel pơm hom tơdrong pơgơ̆p hăm 'long keo; tor sư 'bar hơgăt minh puăt, wơ̆l sư minh hơgăt minh puăt kơjung sư minh hơgăt minh puăt.a

² Sư lom hăm maih rơgoh tơ lăm păng tơ đaih păng pơm gơnăp sư tăp dăr hăm maih.

³ Sư hling pơm puăn tŏ khuen păng maih wă tah tơ lăm puăn pah mum. Minh pah 'bar tŏ păng minh pah nai 'bar tŏ mơ̆n.

⁴ Sư pơm lu 'long ting tung păng 'long keo klaih kơ noh lom lu sư hăm maih.

⁵ Sư sôr 'long tơnung ting tung lăm bơlôh khuen gah ala hom noh 'măn wă ting tung sư.

⁶ Sư pơm minh pôm Tơnglơ̆p Pơklaih Yoch lom ăn hăm maih rơgoh, tor sư 'bar hơgăt minh puăt, wơ̆l sư minh hơgăt minh puăt.b

⁷ Pơm kơtă hloi 'bar tŏ rup chêrubim hăm maih 'bơ̆t 'bar pah jih Tơnglơ̆p Pơklaih Yoch.

⁸ Minh pôm rup chêrubim noh 'bơ̆t jih pah âu minh pôm rup chêrubim to dơ̆ng 'bơ̆t jih pah to.

⁹ Rup chêrubim bơyar pơnăr sư kơpal tơnglơ̆p tơdrong 'mêm mơnat, muh măt tơwih tơklă băl, muh măt chêrubim lăng Tơ Anih Tơdrong 'Mêm Mơnat.

Pơm gơ'bang dan 'bĕng

¹⁰ Sư pơm gơ'bang hăm 'long keo: Tor sư 'bar hơgăt, wơ̆l sư minh hơgăt kơjung sư minh hơgăt minh puăt.c

¹¹ Sư lom hăm maih rơgoh păng lem trong jih hăm maih tăp dăr.

¹² Sư pơm tăp dăr gơ'bang puăn pah tŏ tơpuănd păng lem rok gor noh hăm maih păng pơ̆n minh trong gơnăp tăp dăr hăm maih.

¹³ Sư hling pơm puăn tŏ khuen hăm maih tah khuen noh 'bơ̆t mum 'long găn jơ̆ng gơ'bang.

¹⁴ Khuen noh tah 'bơ̆t jê̆ 'long găn gơ'bang noh, răk sôr 'long wă tung gơ'bang.

¹⁵ Sư pơm 'long ting tung păng 'long keo hăm lom sư păng maih, wă kơ ting-tung gơ'bang noh.

¹⁶ Sư pơm tơmam yua tơ kơpal gơ'bang; pơnhan chhĕr, kơthao mong pơgang, 'bâu phu, klĭnh bô̆i, kơchŏk 'măn yua tuh tơmam pơyơ̆r huch sa, pơm lu sư păng maih rơgoh.

Pơm jơ̆ng ŭnh kơđeng

¹⁷ Sư pơm jơ̆ng ŭnh kơđeng hăm maih rơgoh; jơ̆ng sư, akâu sư, gĕl sư, rơnôp, pơkao sư pơm hăm maih rơgoh păng klep băl hơbôl.

¹⁸ Akâu ŭnh kơđeng đei pơm tơdrâu tŏ tơ'bla, pêng tŏ pah âu, pêng tŏ pah to.

¹⁹ Lăm minh pôm tơ'bla đei pêng tŏ kơchŏk pơm nhen thoi pơkao Almon e đei rơnôp păng pơkao sư 'bơ̆t tơ'bla nai kư̆m pêng tŏ kơchŏk kư̆m pơm thoi pơkao (plei) (Almon) lei-lăi.

²⁰ Akâu ŭnh kơđeng đei puăn tŏ thoi pơkao, hăm tơmơ̆ng bluh rơnôp nhen pơkao hanh nhânf.

²¹ Đei tơdrâu tŏ dơng tơ tơ'bla chăt đơ̆ng jơ̆ng ŭnh, rim 'bar tŏ dơng tơ'bla chăt tơ ala sư đei minh pôm rơnôp (plei).

²² Plei păng dơng tơ'bla ŭnh kơđeng, đe hơjơ̆m păng minh hlak maih rơgoh.

²³ Sư pơm tơpơh tŏ ŭnh kơđeng kơ sư, chơkep tơmam pĭt ŭnh păng pơnhan chhĕr mong rơnok, sư pơm hăm maih rơgoh.

²⁴ Sư iŏk minh talâng g maih rơgoh pơm jơ̆ng ŭnh kơđeng păng tơmam yua lăm ŭnh kơđeng noh.

Chơnang soh pơgang 'bâu phu

²⁵ Sư pơm chơnang soh pơgang 'bâu phu hăm 'long keo să iĕ tŏ ăi tor sư minh hơgăt wơ̆l sư minh hơgăt, kơjung sư 'bar hơgăt chơnang ei đei puăn tŏ ake kơtă.h

²⁶ Sư lom hăm maih rơgoh, lom tăp dăr puăn pang păng tơ kơpal hăm ake sư, pơm minh trong gơnăp păng maih.

²⁷ Sư pơm tơ ala kơ trong gơnăp 'bar tŏ khuen maih tơ 'bar pah, sư pơm 'bar tŏ khuen maih răk sôr 'long tơnung wă tung sư.

²⁸ Sư pơm 'long ting tung noh hăm 'long keo păng lom sư hăm maih.

Đak rơmă 'bâu phu păng pơgang 'bâu phu

²⁹ Sư pơm đak rơmă rơgoh păng 'bâu phu 'lơ̆ng, pơm gơh hơgei.