Le 35 - Sơ̆p Hlabơar Nơ̆r 'Bok Kei-Dei

Khôi juăt năr Sa'bat

¹ Môis krao akŭm đĭ-đăng kon pơlei pơla Isơrael na khan kơ lu sư: 'Nâu dôm tơdrong Kră Yang bơtho khan athei lu iĕm wei răk pơm kiơ̆.

² Iĕm athei bơ̆jang lăm tơdrâu năr, mă-lei truh năr mă tơpơh năr noh năr Sa'bat 'lơ̆ng rơgoh 'măn pơdơh kơ Kră Yang. Bơngai bu jang minh tơdrong kiơ̆ lăm năr noh, đe gô pơlôch sư.

³ Lăm năr Sa'bat rim hnam dơnŏ iĕm mă tơ yơ yơ 'nĕ pơm ŭnh ôh:

Wă pơm Bơsŭn Anih Akŭm

⁴ Môis khan kơ đĭ-đăng lu bơngai Isơrael, 'nâu dôm nơ̆r Kră Yang tơtă khan boih.

⁵ Iŏk bĕ tơmam đơ̆ng lăm hnam lu iĕm na pơyơ̆r kơ Kră Yang, bu đei jơhngơ̆m hơmrah, sư athei pơyơ̆r kơ Kră Yang maih, hu, kong;

⁶ brai jơk, 'brê gôh, 'brê hơhĭm, che 'bui brai se, sŏk bơbe,

⁷ akar triu tơno tong đak 'brê, akar ka tih, 'long keo.

⁸ Đak rơmă plei ôliwơ tơ̆k ŭnh, tơmam 'bâu phu pơm đak rơmă wă pik 'bâu phu păng wă pơm pơgang 'bâu phu.

⁹ Tơmo rang (Ônik) hăm tơmo gĭt kăl nai wă yua pơklep 'bơ̆t ao êphot hăm bơnal 'băk tơ kơtơh.

¹⁰ Lăm lu iĕm dôm lu bơngai gơh hơgei noh, iĕm athei năm jang dôm tơdrong mă Kră Yang đei bơtho khan:

¹¹ Bơsŭn Anih Akŭm che hăm tơmam klơ̆p bơbŭng sư, gơwŏk, tơ̆r, 'long hơbăt, jrăng, hăm bơlôh rơnuh;

¹² Hom tơdrong pơgơ̆p hăm 'long tơnung răk kơ tung sư, tơnglơ̆p tơdrong mơnat păng che pĕng.

¹³ Gơ'bang hăm 'long tơnung sư păng đĭ-đăng tơmam yua lăm noh păng 'bĕng rơgoh.

¹⁴ Jơ̆ng ŭnh kơđeng hăm tơmam yua lăm sư, lu ŭnh kơđeng hăm đak rơmă ôliwơ tuh tơ̆k sư.

¹⁵ Chơnang soi hăm 'long tơnung tung, đak rơmă păng 'bâu phu; che pĕng 'măng Bơsŭn Anih Akŭm.

¹⁶ Chơnang soi pơyơ̆r tơmam soi 'buh grang hơdrao hăm 'long tung păng đĭ-đăng tơmam yua lăm sư, kơthŭng đak păng jơ̆ng kơthŭng:

¹⁷ Che pĕng cham Bơsŭn Anih Akŭm, jrăng hăm bơlôh rơnuh păng che pĕng 'bơ̆t 'măng cham.

¹⁸ 'Long hơdrơ̆ng pơdơ̆ng bơsŭn, 'long hơdrơ̆ng war klaih kơ noh tơlei kŭi chô̆ lu hơdrơ̆ng.

¹⁹ Hơbĕn ao giĕng yua hrŭk jang lăm anih rơgoh 'lơ̆ng, hơbĕn ao rơgoh 'lơ̆ng ăn kơ Arôn 'bok soi tơm păng hơbĕn ao giĕng kơ lu kon drŏ-nglo sư wă jang tơdrong jang 'bok soi.

Lu kon pơlei ba tơmam pơyơ̆r

²⁰ Đĭ-đăng tơpôl kon pơlei pơla Isơrael đang kơ akŭm lĕch wih.

²¹ Đĭ-đăng lu bơngai đei jơhngơ̆m pơdrŭt, hăm lu bơngai mă đei jơhngơ̆m 'maih wă, chĕp ba tơmam pơyơ̆r ăn kơ Kră Yang, wă yua lăm tơdrong jang pơm Bơsŭn Anih Akŭm kơkuh păng đĭ-đăng tơdrong jang kăl lăm noh, hăm pơm hơbĕn ao rơgoh 'lơ̆ng.

²² Thoi noh mă lu drŏ-nglo mă lu drŏ-kăn năm mơ̆n, đĭ-đăng bơngai bu bu đei jơhngơ̆m 'maih wă chĕp ba le đon, tơkhiĕn, kong 'bot, hăm dôm lu tơmam pơhrôp păng maih, đĭ-đăng lu sư pơyơ̆r maih kơ Kră Yang.

²³ Đĭ-đăng bơngai bu đei che brai jơk, 'brê gôh, 'brê hơhĭm, che 'bui brai se, sŏk bơbe, akar triu tơno tong đak 'brê păng akar ka tih kư̆m chĕp ba.

²⁴ Bơngai bu đei tơmam pơm păng hu dah păng kong kư̆m chĕp ba pơyơ̆r kơ Kră Yang mơ̆n păng dah bơngai bu đei 'long keo (sitim) pơyơ̆r wă yua lăm tơdrong jang kư̆m pơyơ̆r mơ̆n.

²⁵ Lu bơngai drŏ-kăn gơh dui tơroi, na chĕp ba pơyơ̆r brai đêl lu sư dui noh brai jơk 'brê gôh, 'brê hơhĭm, hăm che 'bui brai se.

²⁶ Na lu drŏ-kăn mơ'nah lăm jơhngơ̆m đei pơdrŭt păng hơgei lu sư dui tơroi hăm sŏk bơbe kư̆m pơyơ̆r mơ̆n.

²⁷ Lu kră pơgơ̆r kon pơlei chĕp ba pơyơ̆r tơmo rang (onik) hăm tơmo gĭt nai 'măn wă tah pơklep 'bơ̆t ao êphot păng pơklep 'bơ̆t bơnal 'băk tơ kơtơh.

²⁸ Lu sư kư̆m chĕp ba đak rơmă plei ôliwơ răk tơ̆k ŭnh kơđeng, tơmam 'bâu phu răk pơm đak rơmă 'bâu phu wă pik păng wă pơm đak pơgang 'bâu phu.

²⁹ Đĭ-đăng lu drŏ-nglo drŏ-kăn lăm kon pơlei pơla Isơrael. Đei jơhngơ̆m pơdrŭt wă tơgŭm tơdrong jang Kră Yang pơkă kơ Môis noh, lu sư chĕp ba tơmam pơyơ̆r kơ Kră Yang kiơ̆ thoi lu sư wă kơdih.

Kră Yang krao Bêsalel hăm Ôhôliap

³⁰ Môis khan kơ kon pơlei pơla Isơrael: Ăn kơ lu iĕm băt Kră Yang krao boih anăn Bêsalel kon drŏ-nglo Uri, Sâu Hur, đơ̆ng adrĕch adrung Juđa,

³¹ Kră Yang ăn kơ sư 'bĕnh blai boih yang bơhngol 'lơ̆ng Kră Yang 'Bok Kei-Dei, hăm tơdrong gơh hơgei, tơdrong hơdah, tơdrong hlôh wao, wă kơ gơh bơ̆jang pơm tôm tơdrong jang.

³² Wă kơ gơh tuh hling pơm tơmam, hăm maih, hu, klaih kơ noh hăm kong,

³³ Gơh chhơ̆ chrek tơmo gĭt păng, traih 'long klaih kơ noh pơm tôm tĕch tơdrong jang.

³⁴ Kră Yang ăn kơ sư đei đon hơgei gơh bơtho pơhrăm păng kư̆m ăn kơ Ôhôliap kon drŏ-nglo Ahisamak đơ̆ng adrĕch adrung Đan hai.

³⁵ Kră Yang sư ăn kơ 'bar 'nu bre noh 'bĕnh blai tơdrong gơh hơgei, jang tôm tơdrong gơh sĭt, gơh reng gơh tanh brai jơk, 'brê gôh, 'brê hơhĭm, che 'bui brai se; păng pơm lơ tơdrong chă đon hơgei dôm tơdrong jang.