Le 34 - Sơ̆p Hlabơar Nơ̆r 'Bok Kei-Dei

'Bar hlak gơ'bang tơmo plơ̆ng

¹ Kră Yang khan kơ Môis: Ih athei traih tơmo pơm 'bar hlak gơ'bang nhen thoi gơ'bang adrol ki, đơ̆ng noh Inh gô chih 'bơ̆t gơ'bang noh, nơ̆r pơma thoi 'bơ̆t gơ'bang mă ih hơtat pơchah lê̆ noh ki.

² Dơning athei năm bĕ tơ kông Sinai; đơ̆ng hrôih gô inh na gô tơ'bơ̆p Inh tơ kơpal kông.

³ 'Nĕ ăn bơngai bu năm tŏk kiơ̆ hơdai hăm ih, ưh kơ gơh ăn bơngai bu chă ngôi tăp dăr kơ kông. Kŭm ưh kơ ăn triu, rơmo sa 'nhĕt jê̆ tơ kông noh mơ̆n.

⁴ Thoi noh Môis traih hloi 'bar hlak gơ'bang păng tơmo thoi adrol ki. Sư iung đơ̆ng hrôih tŏk tơ kông Sinai, chĕp ba 'bar hlak gơ'bang noh kiơ̆ thoi nơ̆r Kră Yang đei tơtă kơ sư.

Kră Yang Pơdah kơ Môis

⁵ Kră Yang jur lăm hơmơ̆l, dơ̆ng hơdai hăm Môis tơ noh păng roi anăn sư.

⁶ Kră Yang năm brih 'bơ̆t anăp Môis păng khan: Inh bơih Kră Yang, Kră Yang 'Bok Kei-Dei 'bĕnh tơdrong 'mêm mơnat, iơ̆m dim 'mêm kơeng hiơ̆ kơ hil, pơm trŏ 'blep đêl Sư pơkă hăm tơdrong sĭt.

⁷ Răk tơdrong 'mêm kơeng kơ lơ rơbâu jơhnơr kon bơngai, mơnat ăn tơdrong pơm kơnê̆, pơm yoch kơ tơdrong juăt mă-lei Inh ưh kơ lê̆ ôh gô phak bơngai pơm yoch păng jô̆ tơdrong yoch đơ̆ng Mĕ 'Bă sư pơm, inh gô phak truh tơ kon sâu sư dĭng truh tơ pêng puăn jơhnơr.

⁸ Môis hăt hot kŭp kơ̆l tơ teh kơkuh pơyom.

⁹ Sư khan: Ơ Kră Yang! Dang ei mưh khan inh đei bơih tơdrong mơnat 'bơ̆t anăp Ih inh apinh Ih năm hơdai lu nhôn, mă khan lu sư jing kon pơlei pơla arăng kơ̆l, apinh Ih mơnat ăn tơdrong yoch kơnê̆ lu nhôn, na jô̆ nhôn jing tơmam Ih yua.

¹⁰ Kră Yang khan: Âu Inh pơm minh tơdrong pơgơ̆p. Inh gô pơm minh tơdrong, mơsêh hlĭch chrơp 'bơ̆t anăp kon pơlei pơla ih, tơdrong mă tam lah 'bôh tơ lăm minh adrĕch ayơ lăm teh đak âu. Na đĭ-đăng kon bơngai, gô 'bôh tơdrong jang Kră Yang; Inh gô pơm tơdrong hli krưp dêh.

¹¹ Kơchăng bĕ tơdrong Inh pơkă ăn kơ ih năr âu: Âu Inh gô puh tơweh bơngai Amôrit, Kanaan, Hêtit, Pêrisit, Hêwit, hăm bơngai Jêbus đơ̆ng anăp ih.

¹² Ih athei kơchăng kơdih, ih 'nĕ pơgơ̆p hơdai hăm lu bơngai lăm dêh char mă ih wă mơ̆t, tơdrong noh hli kơ lu sư jing thoi hơđong hơ'năk kơ ih.

¹³ Ih athei pơrăm lê̆ chơnang soi teh pơchah lê̆ gơ̆ng păng kăl tơpăk lê̆ rup yang Asêrim lu sư.

¹⁴ Iĕm 'nĕ kơ drap kơkuh kơ lu yang nai ôh. Yua kơ Inh boih Kră Yang jơ̆ 'Bok Kei-Dei tơ'ngla băt gar.

¹⁵ 'Nĕ kơ pơgơ̆p hơdai hăm lu bơngai tơ lăm char noh. Mưh lu sư pơm pơyô kư̆ kă kơplah lu sư pơm yang, sư pơtơm ih sa, đơ̆ng noh ih gô sa hloi tơmam sư pơm yang.

¹⁶ Na ih 'nĕ rôp akăn kơ lu kon drŏ-nglo ih, kon adruh lu sư gô pơm kư̆ kă hăm yang lu sư, đơ̆ng noh pơhlŭ kon tơdăm ih kư̆m pơm kư̆ kă kiơ̆ yang lu sư mơ̆n.

¹⁷ Ih 'nĕ kơ pơm lu rup yang.

¹⁸ Ih athei 'blŏk răk kơ năr giĕng sa 'bĕng ưh kơ đei hăm 'buih pông, iĕm athei sa 'bĕng ưh kơ đei hăm 'buih pông lăm tơpơh năr, thoi Inh đei pơkă ăn kơ ih boih yua kơ trŏ 'bơ̆t khei mônh 'noh iĕm lĕch đơ̆ng dêh Êyiptơ.

¹⁹ Đĭ-đăng kon drŏ-nglo kơdră jơ̆ gah Inh ngăl. Đĭ-đăng sem dơrong rơmo dah triu, tơno tuh blŭng-a kư̆m lei-lăi jơ̆ gah Inh mơ̆n,

²⁰ Mă-lei ih athei rôp minh pôm kon triu dah kon bơbe wă huai tơplih kơ kon aseh iĕ kơdră dah ưh kơ đei huai sư, ih athei gơ̆ lê̆ hơko aseh iĕ, na ih gơh huai iŏk lu kon drŏ-nglo kơdră ih. Ưh kơ gơh bơngai bu năm tơpang ti hoh 'bơ̆t anăp Inh.

²¹ Ih athei bơ̆jang lăm tơdrâu năr, mă-lei lăm năr tơpơh ih athei pơdơh, ih athei pơdơh năr Sa'bat mă khan bơyan choh dah bơyan kĕch kư̆m pơdơh lei-lăi mơ̆n.

²² Ih athei 'blŏk răk năr giĕng, bơyan blŭng-a ih kĕch phĕ, yuă 'ba mi, hăm bơyan ih phĕ kĕch yuă tuch-luch lăm sơnăm.

²³ Lăm minh sơnăm pêng wơ̆t, đĭ-đăng lu kon drŏ-nglo lu iĕm athei dơ̆ng tơ'bôh 'bơ̆t anăp Kră Yang 'Bok Kei-Dei Isơrael.

²⁴ Inh gô puh tơweh lê̆ lu adrĕch adrung nai đơ̆ng anăp ih, Inh gô pơih dêh char ih rai să, ưh kơ đei bơngai bu tơgar dêh char iĕm mơ̆n kơplah ih năm dơ̆ng tơ'bôh 'bơ̆t anăp Kră Yang 'Bok Kei-Dei ih, pêng wơ̆t lăm rim sơnăm.a

²⁵ Ih 'nĕ kơ pơyơ̆r pham tơmam soi hơdai hăm 'bĕng đei 'buih pông, 'nhĕm tơmam soi giĕng Năm Brih noh ưh kơ gơh mơmăn truh tơ pơgê dơning.

²⁶ Ih athei chĕp ba tơ hnam Kră Yang 'Bok Kei-Dei plei blŭng-a đơ̆ng mir ih. Ih 'nĕ kơ pai 'nhĕm bơbe kon lăm đak toh mĕ sư ôh.

²⁷ Kră Yang khan kơ Môis: Chih răk bĕ nơ̆r pơma âu, yua kơ trŏ kiơ̆ thoi lu nơ̆r âu na Inh pơgơ̆p pơkă hăm ih păng hăm lu bơngai Isơrael.

²⁸ Môis sư oei hơdai hăm Kră Yang tơ kông noh puăn-jĭt năr puăn-jĭt măng, sư ưh kơ đei sŏng sa kư̆m ưh kơ đei nhă đak, đơ̆ng noh Kră Yang chih tơ 'bar hlak gơ'bang tơmo dôm lu nơ̆r pơgơ̆p, wă khan mơjĭt khôi juăt.

Muh măt Môis rang mơnhal

²⁹ Kơplah Môis jur đơ̆ng kông Sinai ti sư chĕp ba 'bar hlak gơ'bang tơdrong pơgơ̆p, Môis ưh kơ băt ôh muh măt kơdih sư hơdah yua kơ đơ̆ng sư pơma dơnuh hăm Kră Yang.

³⁰ Mă-lei Arôn hăm đĭ-đăng kon pơlei pơla Isơrael lăng 'bôh Môis muh măt rang mơnhal lu sư hli ưh kơ pơ̆n năm jê̆.

³¹ Môis krao lu sư hloi. Arôn hăm lu kră pơgơ̆r năm jê̆, na Môis pơma dơnuh hăm lu sư.

³² Klaih kơ noh đĭ-đăng lu kon pơlei pơla Isơrael năm jê̆ sư, sư bơtho, pơkă dôm nơ̆r Kră Yang tơtă kơ sư đơ̆ng kơpal kông Sinai.

³³ Môis đang kơ pơma dơnuh hăm lu sư, na Môis iŏk che gom lê̆ muh măt sư.

³⁴ Kơplah Môis mơ̆t pơma dơnuh hăm Kră Yang sư pơih lê̆ che mă sư gom muh măt sư noh dĭng truh tơ sư lĕch. Păng roi ăn kơ kon pơlei pơla Isơrael dơ̆ng dôm nơ̆r mă Kră Yang đei pơkă khan boih kơ sư.

³⁵ Lu kon pơlei pơla Isơrael lăng 'bôh muh măt Môis hơdah rang mơnhal na Môis klơ̆p dơ̆ng muh măt sư dĭng truh tơ sư mơ̆t pơma dơnuh hăm Kră Yang dơ̆ng.