Le 32 - Sơ̆p Hlabơar Nơ̆r 'Bok Kei-Dei

Rup kon rơmo pơm păng maih

¹ Lu kon pơlei lăng Môis hiơ̆ kơ jur đơ̆ng kông, lu sư akŭm hloi tăp dăr kơ Arôn păng khan kơ sư: Pơm bĕ kơ bơ̆n lu rup yang năm adrol kơ bơ̆n; yua kơ Môis tơ'ngla mă tơlĕch bơ̆n đơ̆ng char Êyiptơ noh bơ̆n ưh kơ băt ôh tơdrong kiơ truh kơ sư bơih.

² Arôn khan kơ lu sư, toh bĕ le maih đơ̆ng đon akăn lu iĕm kon drŏ-nglo lu iĕm, hăm kon drŏ-kăn lu iĕm, klaih kơ noh ba kơ inh.

³ Thoi noh đĭ-đăng lu kon pơlei toh le maih đơ̆ng đon lu sư klaih kơ noh năm ăn kơ Arôn,

⁴ Arôn iŏk tơmam lu noh đơ̆ng ti lu sư, sư hling maih noh, klaih kơ noh, sư tuh hling rup kon rơmo, na lu sư khan: Ơ bơngai Isơrael, 'nâu yang lu iĕm, tơ'ngla mă tơlĕch chông iĕm đơ̆ng char Êyiptơ.

⁵ Arôn 'bôh tơdrong noh, sư pơm minh pôm chơnang soi 'bơ̆t anăp rup rơmo kon noh; păng ôr re khan. Pơgê dơning đei pơm giĕng kơkuh pơyom kơ Kră Yang.

⁶ Pơgê dơning lu sư iung đơ̆ng hrôih, klaih kơ noh lu sư pơyơ̆r tơmam soi 'buh, hăm tơmam soi 'blŏk bơnê, lu kon pơlei pơla hơ-oei, wă sa et, đơ̆ng noh lu sư iung hơnul pơchơt.

⁷ Kră Yang khan kơ Môis: Jah jur bĕ, yua kơ lu kon pơlei pơla ih, lu bơngai mă ih đei chông tơlĕch lu sư đơ̆ng char Êyiptơ, lu sư pơm glăi răm bơih,

⁸ lu sư đĭ hăt kơ tơklah boih đơ̆ng trong Inh đei tơtă ăn kơ lu sư. Lu sư man pơm rup kon rơmo kơdih lu sư bơih, lu sư kơkuh păng pơyơ̆r tơmam soi kơ rup noh, klaih kơ noh lu sư khan; Ơ bơngai Isơrael, 'nâu yang ih, tơ'ngla mă đei chông tơlĕch ih đơ̆ng char Êyiptơ!

⁹ Kră Yang khan kơ Môis: Inh 'bôh boih kon pơlei pơla âu jing kon pơlei pơla arăng kơ̆l tơpă.

¹⁰ Thoi noh dang ei, lê̆ Inh hil mĭl kơ lu sư, pơrăm pơtôch lê̆ lu sư; mă-lei Inh gô pơjing đơ̆ng ih minh adrĕch adrung tih tơpă.

¹¹ Mă-lei Môis krao apinh hloi Kră Yang 'Bok Kei-Dei sư khan, Ơ Kră Yang, liơ Ih ơh blĕk hil mĭl kơ kon pơlei pơla Ih, khŭl bơngai mă Ih đei chông tơlĕch bơih đơ̆ng char Êyiptơ hăm tơdrong mơsêh tih hăm ti pran kơtang Ih?

¹² Liơ Ih wă lê̆ lu bơngai Êyiptơ khan: ‘Kră Yang chông tơlĕch lu sư đơ̆ng char bơ̆n wă pơrăm lê̆, pơlôch lê̆ lu sư tơ lăm kông, hăm pơrăm pơtôch lê̆ lu sư đơ̆ng lăm teh đak âu?’ Lê̆ bĕ tơdrong Ih blĕk tơtŏ păng tơplih tơdrong tơchĕng Ih wă pơm kơnê̆ kơ kon pơlei pơla Ih.

¹³ Apinh Ih athei 'blŏk bĕ kơ Abraham, Isăk, hăm Isơrael, lu đĭch đam Ih mă Ih đei yua anăn Ih kơdih, na pơkă: Inh gô ăn kon sâu lu iĕm lơ thoi lu sơnglŏng kơpal plĕnh păng Inh gô ăn kơ kon sâu lu iĕm đĭ-đăng teh đak âu mă Inh đei pơkă boih kơ lu sư gô oei tơ noh jang sa ling-lang khŏm khŏm.

¹⁴ Đơ̆ng noh Kră Yang tơplih tơdrong Sư tơchĕng wă pơm kơnê̆ lu kon pơlei pơla Sư.

Môis klơ̆m pơchah gơ'bang khôi juăt

¹⁵ Môis jur brŏk đơ̆ng kông chĕp ba 'bar tŏ gơ'bang tơdrong pơgơ̆p, 'bar tŏ gơ'bang pơgơ̆p noh đei chih 'bar pah.

¹⁶ 'Bar tŏ gơ'bang noh đơ̆ng tơdrong jang Kră Yang 'Bok Kei-Dei pơm chư noh kư̆m đơ̆ng Kră Yang 'Bok Kei-Dei, chih răk 'bơ̆t tơmo.

¹⁷ Kơplah noh Jôsuê kơtơ̆ng kon pơlei pơla ôr, sư khan kơ Môis khan: “Đei jơwa tơdrong tơblah tơ lăm anih kon pơlei.”

¹⁸ Mă-lei Môis tơl khan: “Ưh kơ trŏ nơ̆r ôr gah tơdrong jei. Kŭm ưh kơ trŏ nơ̆r ôr lu sư thuơ ôh, Mă-lei inh kơtơ̆ng nơ̆r lu đe hơri.”

¹⁹ Lăp sư truh jê̆ anih kon pơlei, sư 'bôh kon rơmo, hăm lu bơngai oei yŭn suang. Môis 'blut ơh blĕk hloi, klaih kơ noh sư hơtat lê̆ gơ'bang pơgơ̆p noh đơ̆ng ti sư tơ jơ̆ng kông, gơ'bang noh pơchah hloi.

²⁰ Môis iŏk rup kon rơmo lu sư pơm soh hloi tơ lăm ŭnh, đơ̆ng noh sư peh pơhĕch jing gơnơ̆k păng iŏk gơnơ̆k noh tuh tơ lăm đak, klaih kơ noh ăn lu kon pơlei Isơrael nhă.

²¹ Môis khan kơ Arôn: Kon pơlei đei pơm kiơ kơ ih na dĭng ih mah pơm ăn kơ kon pơlei pơla pơm yoch tih krưp thoi noh.

²² Arôn khan: Apinh ih 'nĕ kơ blĕk kơ inh, ih băt kon pơlei pơla âu 'maih pơm tơdrong kơnê̆.

²³ Lu sư khan kơ inh; athei ih pơm bĕ kơ bơ̆n rup yang năm adrol kơ bơ̆n; yua kơ Môis tơ'ngla mă chông tơlĕch bơ̆n đơ̆ng char Êyiptơ noh, bơ̆n ưh kơ băt ôh tơdrong kiơ truh kơ sư bơih.

²⁴ Inh khan kơ lu sư: Bu đei maih athei lu sư plôh bĕ; na lu sư ăn maih noh tơ inh, inh klơ̆m 'buh maih noh lăm ŭnh, đơ̆ng noh na jing đei hĭ rup kon rơmo âu.

Môis phak kon pơlei pơla sư

²⁵ Môis 'bôh kon pơlei pơla đei tơdrong rơngei pơm kư̆ kă mơ̆ng kơ lu sư wă, ưh kơ đei bơngai wei-lăng lu sư, yua kơ Arôn lê̆ lu sư rơngei dĭng mah đei tơdrong lu ayăt pơjăm lu sư.

²⁶ Yua thoi noh Môis oei dơ̆ng 'bơ̆t 'măng jang anih kon pơlei păng khan: “Bu gah Kră Yang, năm bĕ tơ inh, đĭ-đăng lu kon drŏ-nglo bơngai Lêwi akŭm hăm sư.

²⁷ Sư khan kơ đe noh: Kră Yang 'Bok Kei-Dei Isơrael khan thoi âu. Rim 'nu lu iĕm athei kiĕo đao tơ kơiĕng lu iĕm, chă yơyak jơ̆p lăm anih kon pơlei đơ̆ng 'măng jang 'nâu, tơ 'măng jang to păng rim 'nu lu iĕm athei pơlôch 'nhŏng oh iĕm, buăl juăt iĕm hăm lu bơngai tăp dăr kơ lu iĕm.

²⁸ Lu kon drŏ-nglo bơngai Lêwi pơm kiơ̆ hloi thoi nơ̆r Môis pơkă noh; lăm năr noh lu sư pơlôch dang pêng-rơbâu 'nu bơngai.

²⁹ Na Môis khan: Năr âu rim 'nu lu iĕm pơyơ̆r boih lu iĕm kơ tơdrong jang Kră Yang, ưh pă rong minh 'nu kon drŏ-nglo, dah 'nhŏng oh kơdih, thoi noh Kră Yang ăn kơ iĕm pŭn hiôk năr âu.

Môis krao khan 'Bok Kei-Dei tơplih ăn Isơrael

³⁰ Năr dơning Môis khan kơ lu kon pơlei pơla lu iĕm pơm bơih minh tơdrong glăi tih. Mă-lei dang ei inh wă tŏk tơ kông năm tơ Kră Yang. Rŏ lăng inh kư̆m gơh apinh huai iŏk tơdrong yoch lu iĕm.

³¹ Thoi noh Môis wơ̆t dơ̆ng tơ Kră Yang păng khan: Ơ Kră Yang, lu kon pơlei pơla âu pơm bơih minh tơdrong glăi tih. Lu sư pơm rup yang hăm maih păng kơkuh.

³² Mă-lei, dang ei apinh Ih mơnat ăn tơdrong yoch lu sư. Dah ưh, apinh sŭt lê̆ bĕ anăn inh đơ̆ng lăm sơ̆p hla bơar Ih đei chih bơih noh;

³³ mă-lei Kră Yang khan kơ Môis: Bơngai bu pơm yoch bơih hăm Inh, Inh gô sŭt anăn sư đơ̆ng lăm sơ̆p hla bơar Inh.

³⁴ Dang ei năm bĕ chông lu kon pơlei pơla năm tơ anih mă Inh đei khan bơih kơ ih. Âu, linh jang 'lơ̆ng Inh gô năm adrol kơ ih. Mă-lei năr ayơ Inh tơiung kơting, lei Inh gô phak lu sư yua kơ tơdrong yoch lu sư pơm bơih.

³⁵ Kră Yang phak kon pơlei pơla hăm tơdrong jĭ apoh, yua kơ lu sư yoch pơm rup kon rơmo maih mă Arôn tuh hling.