Le 31 - Sơ̆p Hlabơar Nơ̆r 'Bok Kei-Dei

Bêsalel păng Ôhôliap

¹ Kră Yang khan kơ Môis.

² Âu inh krao bơih Bêsalel kon drŏ-nglo Uri, sâu Hur, đơ̆ng adrĕch adrung Juđa.

³ Inh ăn bơih kơ sư 'bĕnh kơ Yang Bơhngol 'Lơ̆ng 'Bok Kei-Dei, hăm tơdrong hơgei, hlôh wao băt đei đon tơchĕng, wă kơ jang tanh sĭt, hling maih.

⁴ Inh ăn kơ sư gơh chă đon pơm tôm tơdrong, pơm păng maih păng hu păng kong,

⁵ chraih kuer tơmo, chraih hơkôih 'long, chrek chhơ̆.

⁶ Inh kư̆m krao Ôhôliap kon drŏ-nglo Ahisamak, đơ̆ng adrĕch adrung Đan jing bơngai tơgŭm sư. Inh kư̆m ăn bơih đei đon tơchĕng wă kơ gơh hơgei jang lăm tôm tơdrong jang. Inh kư̆m krao bơngai plơ̆ng wă kơ lu sư gơh pơm đĭ-đăng tơdrong jang mă inh đei pơkă khan kơ ih.

⁷ Bơsŭn anih akŭm hom tơdrong pơgơ̆p, tơnglơ̆p mơnat tơdrong yoch păng dôm tơmam yua lăm Bơsŭn Anih Akŭm.

⁸ Gơ'bang păng tơmam yua lăm sư, jơ̆ng ŭnh kơđeng maih rơgoh păng đĭ-đăng tơmam yua lăm sư, chơnang soi tơmam 'bâu phu.

⁹ Chơnang soi pơyơ̆r tơmam soh 'buh hăm đĭ-đăng tơmam yua lăm sư, kơthŭng đak păng jơ̆ng kơthŭng.

¹⁰ Hơbĕn ao giĕng, ăn kơ Arôn 'bok soi tơm hăm hơbĕn ao kơ lu kon drŏ-nglo sư wă yua lăm tơdrong jang 'bok soi.

¹¹ Đak rơmă 'lơ̆ng rơgoh păng pơgang 'bâu phu 'lơ̆ng rơgoh 'măn lăm Anih Rơgoh. Lu sư gô pơm đĭ tôm tơdrong kiơ̆ thoi nơ̆r Inh đei pơkă ăn kơ ih.

Tơdrong juăt năr Sa'bat

¹² Kră Yang khan kơ Môis,

¹³ Khan bĕ kơ kon pơlei Isơrael, lu iĕm athei 'blŏk wei răk năr Sa'bat Inh, yua kơ tơdrong noh jơ̆ tơdrong tơdra tŏk-bŏk Inh hăm iĕm ling-lang đĭ jơhnơr, wă kơ iĕm băt Inh bơih Kră Yang, pơm ăn kơ iĕm jơ̆ rơgoh 'lơ̆ng.

¹⁴ Thoi noh, lu iĕm athei bơwei năr Sa'bat yua kơ năr noh jing năr 'lơ̆ng rơgoh ăn kơ lu iĕm. Bơngai bu pơm pơ'mê̆ kơ năr noh, đe gô pơlôch sư; hăm bơngai bu jang minh tơdrong kiơ lăm năr noh, đe gô pơpuh tơweh lê̆ sư.

¹⁵ Đe gô bơ̆jang lăm tơdrâu năr, mă-lei năr mă tơpơh jơ̆ năr Sa'bat, năr pơdơh, năr 'lơ̆ng rơgoh ăn kơ Kră Yang. Lăm năr Sa'bat, dah bơngai bu bơ̆jang minh tơdrong kiơ, đe gô pơpuh sư.

¹⁶ Thoi noh, lu kon pơlei Isơrael gô wei răk năr Sa'bat, pơyom kơ năr Sa'bat lăm rim jơhnơr lu sư, jing tơdrong pơgơ̆p pơkă ling-lang khŏm khŏm.

¹⁷ Tơdrong noh jing tơdrong tơdra Inh hăm kon pơlei Isơrael ling-lang khŏm khŏm, yua kơ Kră Yang pơjing kơ plĕnh teh păng tôm tơmam lăm tơdrâu năr. Truh năr tơpơh sư pơdơh.

¹⁸ Lăp Kră Yang khan kơ Môis tơ kơpal kông Sinai, đang bơih sư ăn hloi 'bar tŏ gơ'bang tơdrong pơgơ̆p pơm păng tơmo blat đơ̆ng hơnglâu ti Kră Yang 'Bok Kei-Dei chih.