Le 27 - Sơ̆p Hlabơar Nơ̆r 'Bok Kei-Dei

Chơnang soi 'buh

¹ Ih athei pơm minh pôm chơnang soi păng 'long keo, puăn pah tŏ ăi, pơđăm hlok gah tor, pơđăm hơgăt gah wơ̆l păng kơjung pêng hơgăt.

² 'Bơ̆t puăn pah mum chơnang soi ih pơm puăn tŏ ake hlôi tơ 'nguaih păng lom păng kong.

³ Ih athei pơm kơthŭng mong ngar gŏ bô̆i mong tơnuh, kơthao mong đak, gơ'bênh, chơkrơ. Kơthŭng mong ngar pơm hăm kong ngăl.

⁴ Păng tanh minh hlak grang păng hơdrao kong, na puăn pah mum grang 'noh pơm puăn tŏ khuen păng kong;

⁵ 'măn grang noh lăm chơnang soi tơnăp sư tơ lăm chơnang soi wă kơ grang kơjung, truh minh puăt akâu chơnang soi,

⁶ chơnang soi kư̆m athei pơm 'long tơnung wă tung chơnang soi păng 'long keo lom păng kong,

⁷ na sôr tơmơ̆t tơ lăm lu bơlôh khuen; 'bar pah chơnang mưh wă ting tung.

⁸ Chơnang soi pơm păng tơ̆r, pơm đei lăm tŏk-bŏk, pơm nhen thoi Inh bơtho tơ'bôh kơ ih tơ kơpal kông 'noh.

Cham Bơsŭn Anih Akŭm

⁹ Ih athei pơm Bơsŭn Anih Akŭm, gah gơal athei đei che pĕng tanh che 'bui brai se kơjung minh-hrĕng hơgăt.a

¹⁰ Đei 'bar-jĭt tŏ jrăng pơtăm kơpal 'bar-jĭt tŏ bơlôh rơnuh păng kong; gơwŏk pơm păng hu.

¹¹ Gah yă-nơ̆m kư̆m đei che mơ̆n; che pĕng 'noh tor sư kơjung minh-hrĕng hơgăt, 'bar-jĭt tŏ jrăng păng pơtăm 'bar-jĭt tŏ bơlôh rơnuh păng kong păng lu gơwŏk sư pơm păng hu.b

¹² Che pĕng cham gah bơmơ̆t tor sư kơjung pơđăm-jĭt hơgăt tơ'băk tơ mơjĭt tŏ jrăng păng pơtăm tơ mơjĭt tŏ bơlôh rơnuh.

¹³ Cham gah anăp, gah hơlĕch să, đei pơđăm-jĭt hơgăt;

¹⁴ Gah 'ma kơ 'măng dur đei mơjĭt-pơđăm hơgăt che pĕng, tơ'băk tơ pêng tŏ jrăng păng pơtăm tơ pêng tŏ bơlôh rơnuh;

¹⁵ gah 'ngiĕo kơ 'măng dur đei mơjĭt-pơđăm hơgăt che pĕng tơ'băk tơ pêng tŏ jrăng păng pơtăm tơ pêng tŏ bơlôh rơnuh.

¹⁶ 'Măng dur cham đei che pĕng să 'bar-jĭt hơgăt che 'bui brai jơk, 'brê, 'brê hơhĭm, 'brê gôh đei sĭt 'lơ̆ng, tơ'băk tơ puăn tŏ jrăng păng pơtăm tơ puăn tŏ bơlôh rơnuh.

¹⁷ Đĭ-đăng jrăng tăp dăr kơ cham tơ'bưh băl; hăm gơwŏk hu, pơtăm tơ bơlôh rơnuh păng kong.

¹⁸ Cham să kơjung đei minh-hrĕng hơgăt gah wơ̆l, minh pah pơđăm-jĭt hơgăt, atol che kơjung pơđăm hơgăt hăm che 'bui tanh brai se, dôm lu bơlôh rơnuh hăm kong.

¹⁹ Đĭ-đăng dôm tơmam yua lăm cham bơsŭn, anih akŭm lu jrăng hnam păng đĭ-đăng lu tơmam yua nai pơm păng kong ngăl.

Đak rơmă ŭnh kơđeng

²⁰ Ih athei tơtă khan ăn kơ lu bơngai Isơrael anhăk ba đak rơmă 'long ôliwơ ngăl ưh kơ hrâu. Wă tơ̆k ŭnh kơđeng wă kơ sư hơdah ling-lang.

²¹ Lăm tơdrong jang tơ 'nguaih kơ che pĕng găn 'bơ̆t anăp hom tah khôi juăt lăm Bơsŭn Anih Akŭm, 'bok Arôn hăm dôm lu kon drŏ-nglo sư gô wei hơmet ŭnh kơđeng, 'bơ̆t anăp Kră Yang wă kơ khơ̆ng ling-lang đơ̆ng măng truh 'năr hơdah, 'noh jing minh tơdrong juăt ling-lang ăn kơ adrĕch adrung Isơrael athei wei răk lăm đĭ-đăng jơhnơr.