Le 26 - Sơ̆p Hlabơar Nơ̆r 'Bok Kei-Dei

Bơsŭn Anih Akŭm

¹ Ih athei yua mơjĭt blah che 'bui se hơ'bơ̆l wă pơm Bơsŭn Anih Akŭm tanh păng brai jơk, 'brê gôh, 'brê hơhĭm, ih athei tanh rup chêrubim tanh mă đen 'lơ̆ng.

² Rim kơ che noh tor sư 'bar-jĭt tơhngam hơgăt, wơ̆l puăn hơgăt, rim blah athei tŏ ăi băl.

³ Athei sĭt pơtrơp pơđăm blah che pơm jing minh, pơđăm blah nai kư̆m sĭt pơtrơp lei-lăi mơ̆n.

⁴ Ih athei sĭt gơwŏk thoi gơwang hăm brai jơk sĭt rok tơnăp pơtrơp che mă minh đơ̆ng noh ih kư̆m athei sĭt thoi noh mơ̆n 'bơ̆t wă pơtrơp che mă 'bar.

⁵ Ih pơm pơđăm-jĭt tŏ gơwŏk brai, 'bơ̆t che mă mônh păng pơđăm-jĭt tŏ gơwŏk brai 'bơ̆t che mă 'bar, lu gơwŏk brai 'bar pah tơklă băl.

⁶ Kŭm athei pơm pơđăm-jĭt tŏ gơwŏk păng maih, na gơwŏk đơ̆ng che âu tơ che noh, wă kơ Bơsŭn Anih Akŭm tơ'bưh băl jing minh blah.

⁷ Ih kư̆m athei pơm mơjĭt-mônh blah che hơ'bơ̆l hăm sŏk bơbe, wă klơ̆p kơpal Bơsŭn Anih Akŭm.

⁸ Che hơ'bơ̆l âu, tor sư pêng-jĭt hơgăt wơ̆l sư puăn hơgăt, lăm mơjĭt-mônh blah noh tŏ ăi băl.

⁹ Ih athei sĭt pơtrơp pơđăm blah che sŏk bơbe âu lê̆ pha păng tơdrâu blah nai 'măn lê̆ pha mă-lei che hlak mă tơdrâu noh chơ̆p pơm 'bar, gah anăp Anih Akŭm.

¹⁰ Na tah pơđăm-jĭt tŏ gơwŏk brai rok tơnăp pơtrơp che mă minh păng tah pơđăm-jĭt tŏ gơwŏk brai tơnăp pơtrơp che mă 'bar.

¹¹ Ih kư̆m pơm pơđăm-jĭt tŏ gơwŏk păng kong, gơwŏk mơ̆t tơ lăm gơwŏk brai na dui akŭm tơmơ̆t sư, wă kơ lu sư jing minh.

¹² Mă oei rơkah, minh puăt che hơ'bơ̆l noh, noh gô atol tơ gah rŏng kơ Bơsŭn Anih Akŭm.

¹³ Gah tor sư che oei rơkah gah âu minh hơgăt gah to minh hơgăt, na gô tơjur wă klơ̆p 'bar pah Bơsŭn Anih Akŭm.

¹⁴ Ih athei pơm minh blah wă klơ̆p bơbŭng bơsŭn hăm akar triu tơno tong đak 'brê păng minh blah dơ̆ng hăm akar ka tih.

¹⁵ Ih kư̆m athei yua tơ̆r pơm 'long dơ̆ng tơnăr bơsŭn păng 'long keo, pơ̆ng pơdơ̆ng sư.

¹⁶ Minh blah kơjung mơjĭt hơgăt, să minh hơgăt minh puăt,

¹⁷ kao tŏk-bŏk jơ̆ng tơ̆r wă pơkăp băl, đĭ-đăng lu tơ̆r tơnăr bơsŭn ih athei pơm lei-lăi ngăl.

¹⁸ Gah gơal kơ bơsŭn ih athei pơm 'bar-jĭt hlak tơ̆r;

¹⁹ Ala 'bar-jĭt hlak tơ̆r athei pơm puăn-jĭt tŏ rơnuh păng hu kơ 'bar-jĭt hlak tơ̆r, minh pôm rơnuh bŏk minh bơlôh, wă tah minh pah jơ̆ng tơ̆r, minh pôm rơnuh bơlôh nai wă tah minh pah jơ̆ng tơ̆r tơ'bưh băl.

²⁰ Athei pơm 'bar-jĭt hlak tơ̆r gah yă-nơ̆m kơ bơsŭn.

²¹ Păng puăn-jĭt tŏ rơnuh păng hu 'bar tŏ bơlôh rơnuh kơ rim hlak tơ̆r.

²² Ih athei pơm tơdrâu hlak tơ̆r gah rŏng bơsŭn wă khan gah bơmơ̆t.

²³ 'Bar pah mum gah rŏng bơsŭn athei pơm 'bar hlak tơ̆r,

²⁴ pơkăp băl đơ̆ng ala truh tơ kơpal, 'bơ̆t 'bar pah mum 'nâu săp tơ'bưh băl hăm minh pôm khuen, pơđĭ kơ 'bar pah mum athei pơm thoi noh ngăl.

²⁵ Thoi noh na đei tơhngam hlak tơ̆r păng mơjĭt-tơdrâu tŏ rơnuh păng hu.

²⁶ Thoi noh ih athei pơm pơđăm tŏ 'long găn hơbăt păng 'long keo, pơđăm tŏ tơ gah âu.

²⁷ Pơđăm tŏ 'long hơbăt gah 'ngiĕo pah to bơsŭn păng pơđăm tŏ 'long plơ̆ng dơ̆ng gah rŏng bơsŭn wă khan gah bơmơ̆t.

²⁸ Roh 'long hơbăt tŏk-bŏk pơioi lăm tŏk-bŏk tơ̆r tơnăr kơjung, đơ̆ng kơ̆l 'nâu tơ'bưh tơ kơ̆l to.

²⁹ Kŭm athei iŏk maih lom pơklop lu tơ̆r hăm 'long hơbăt păng pơm gơwŏk păng maih, wă kơ gơh chô̆ rim 'long hơbăt.

³⁰ Ih athei pơm Bơsŭn Anih Akŭm nhen thoi Inh tơ'bôh ăn kơ ih tơ kơpal kông 'noh.

³¹ Ih athei pơm minh blah che 'bui tĕnh, brai jơk, 'brê hơhĭm, tanh mă tơnen 'lơ̆ng dônh tanh rup chêrubim,

³² Iŏk gơwŏk hăm maih na atol che 'noh tơ puăn tŏ jrăng 'long keo lom păng maih, pơdơ̆ng pơtăm tơ puăn tŏ bơlôh rơnuh păng hu.

³³ Gơwŏk mă dan hom tơdrong pơgơ̆p tơ gah lăm che; pĕng che 'nâu wă klah asong anih rơgoh păng anih tôch rơgoh.

³⁴ Klaih kơ noh iŏk tơnglơ̆p tơdrong 'mêm mơnat klơ̆p hom tah tơdrong pơgơ̆p, lăm anih rơgoh hloh,

³⁵ Gah 'nguaih kơ che pĕng găn 'noh ih 'măn gơ'bang; gah yă-nơ̆m păng jơ̆ng ŭnh kơđeng 'măn gah gơal tơklă băl.

³⁶ Ih athei pơm minh blah che pĕng găn 'măng Bơsŭna che jơk, 'brê hơhĭm, 'brê gôh che 'bui noh đei sĭt pơ'lơ̆ng boih;

³⁷ Pơm gơwŏk păng maih wă atol che găn 'nâu tơ pơđăm tŏ jrăng păng 'long keo lom păng maih; păng pơtăm tơ pơđăm tŏ bơlôh rơnuh păng kong.