Le 24 - Sơ̆p Hlabơar Nơ̆r 'Bok Kei-Dei

Đei iŏk tơdrong pơgơ̆p

¹ Kră Yang khan kơ Môis thoi âu: Ih, Arôn, Nađap, Abihu păng tơpơh-jĭt 'nu lu kră wei-lăng bơngai Isơrael, iĕm athei tŏk tơ anih Kră Yang dơ̆ng tơ ataih na drap kơkuh.

² Hơdrô̆ Môis đĕch gơh năm jê̆ Kră Yang, mă-lei lu bơngai nai ưh kơ gơh năm jê̆ păng kon pơlei pơla kư̆m ưh kơ gơh tŏk hơdai ih.

³ Môis năm roi hloi kơ kon pơlei pơla dôm nơ̆r Kră Yang tơtă păng khôi juăt, na lu sư tơl thoi âu: Lu nhôn gô pơm kiơ̆ dôm nơ̆r Kră Yang bơtho akhan.

⁴ Môis chih iŏk đĭ dôm nơ̆r Kră Yang bơtho akhan pơgê đơ̆ng rŏng sư iung đơ̆ng hrôih, pơdơ̆ng minh pôm chơnang soi 'bơ̆t jơ̆ng kông păng pơtăm mơjĭt-'bar tŏ gơ̆ng pơtih kơ mơjĭt-'bar adrĕch adrung Isơrael.

⁵ Sư wơh lu tơdăm Isơrael năm pơyơ̆r tơmam soi 'buh păng tơmam soi 'blŏk bơnê kơ Kră Yang hăm rơmo dăm.

⁶ Môis iŏk minh puăt pham mong lăm kơthao păng minh puăt nai dơ̆ng tuh tơ kơpal chơnang soi,

⁷ klaih kơ noh sư iŏk minh Sơ̆p hla bơar tơdrong pơgơ̆p Kră Yang 'Bok Kei-Dei, đŏk ăn kơ kon pơlei pơla mơ̆ng, na kon pơlei pơla khan thoi âu, lu nhôn gô mơ̆ng păng pơm kiơ̆ nơ̆r Kră Yang bơtho tơ'bôh.

⁸ Na Môis iŏk pham săi tơ akâu kon pơlei pơla na khan: 'Nâu boih pham pơgơ̆p hăm Kră Yang pơsĭt boih hăm lu iĕm kiơ̆ thoi nơ̆r pơkă pơkăm.

⁹ Klaih kơ noh Môis Arôn, Nađap, Abihu hơdai păng tơpơh-jĭt 'nu kră wei-lăng bơngai Isơrael đĭ-đăng lu sư tŏk tơ kông.

¹⁰ Tơmang 'bôh Kră Yang 'Bok Kei-Dei Isơrael tơ ala jơ̆ng Sư đei minh pôm tơmam thoi trong lơ̆k tơmo gĭt rang, nhen thoi hơdah plĕnh.

¹¹ Kră Yang ưh kơ đei hiŏng ti pơrăm lu kră wei-lăng bơngai Isơrael; lu sư 'bôh ră mă-lei oei sŏng sa hiôk đĕch.

¹² Kră Yang khan kơ Môis: Tŏk bĕ tơ Inh tơ kơpal kông păng gô tơ noh; Inh gô ăn kơ ih tơmo lat, chih răk khôi juăt păng nơ̆r tơtă wă bơtho kon pơlei pơla,

¹³ Môis iung hơdai hăm Jôsuê, bơngai jang kơ sư, na Môis năm tŏk hloi tơ kơpal kông Kră Yang 'Bok Kei-Dei.

¹⁴ Na sư khan hloi kơ lu kră wei-lăng: Athei gô tơ âu dĭng truh nhôn hơlơ̆k tơ lu iĕm dơ̆ng. 'Nâu Arôn păng Hur oei hơdai hăm lu iĕm, bu đei tơdrong kiơ athei apinh bre sư 'noh.

¹⁵ Thoi noh, Môis tŏk tơ kơpal kông, hơmơ̆l gom lê̆ kông.

¹⁶ Tơdrong rang hơdah 'lơ̆ng Kră Yang tơ kơpal kông Sinai; lăm tơdrâu năr hơmơ̆l gom kông, truh năr mă tơpơh Kră Yang đơ̆ng lăm hơmơ̆l krao Môis.

¹⁷ Tơdrong rang hơdah 'lơ̆ng Kră Yang tơ kơpal wĕch kông 'bơ̆t anăp lu bơngai Isơrael, thoi hơdah ŭnh sa kơdrơ̆ng.

¹⁸ Môis mơ̆t tơ tŏk-bŏk hơmơ̆l, tŏk tơ kơpal kông, oei tơ noh lăm puăn-jĭt năr păng puăn-jĭt măng.