Le 20 - Sơ̆p Hlabơar Nơ̆r 'Bok Kei-Dei

Mơjĭt khôi juăt

¹ Kră Yang 'Bok Kei-Dei pơma dôm nơ̆r 'nâu, khan:

² Inh Kră Yang 'Bok Kei-Dei iĕm, pơklaih boih iĕm đơ̆ng dêh Êyiptơ, đơ̆ng pơm đĭch đam.

³ Minh 'nu Inh đĕch, iĕm 'nĕ kơ đei lu yang nai.

⁴ Iĕm 'nĕ kơ pơm lu rup man kơdih, kư̆m 'nĕ pơm rup ayơ nhen thoi tơmam tơ kơpal plĕnh ti, dah tơ ala teh âu, dah tơ lăm ala đak sŭng.

⁵ Iĕm 'nĕ drap kơkuh 'bơ̆t anăp lu rup noh păng kư̆m 'nĕ kơ soi sơmah kơ lu sư, yua kơ Inh boih Kră Yang 'Bok Kei-Dei iĕm, Inh Kră Yang 'Bok Kei-Dei băt kơ gar, dah bơngai bu areh kơ Inh, Inh gô jô̆ yoch đơ̆ng sư na phak truh tơ kon sâu se sư pêng puăn jơhnơr,

⁶ păng gô 'mêm dôm rơbâu jơhnơr kơ bơngai bu 'mêm kơ Inh păng wei răk khôi juăt Inh tơtă.

⁷ Iĕm 'nĕ yua anăn Kră Yang 'Bok Kei-Dei iĕm wă pơma kư̆ kă, yua kơ Kră Yang ưh kơ achăng ôh bơngai bu yua anăn Kră Yang 'Bok Kei-Dei mă pơma kư̆ kă.

⁸ Athei 'blŏk kơ năr tơpơh wă pơm năr giĕng.

⁹ Iĕm athei pơm đĭ tơdrong jang kơdih lăm tơdrâu năr.

¹⁰ Mă-lei năr mă tơpơh wă khan năr pơdơh kơ Kră Yang 'Bok Kei-Dei iĕm: Lăm năr 'noh ih, kon drŏ-nglo, kon drŏ-kăn, đĭch đam sem dơrong ih, dah tơmoi oei lăm hnam ih, 'nĕ kơ jang minh tơdrong kiơ ôh;

¹¹ yua kơ lăm tơdrâu năr Kră Yang đei pơjing plĕnh, teh, đak dơsĭ păng đĭ-đăng tơmam tơ lăm noh, năr tơpơh sư pơdơh: Na Kră Yang sơkat ăn pŭn hiôk kơ năr tơpơh wă 'măn pơm năr giĕng 'lơ̆ng rơgoh.

¹² Athei chu yom kơ mĕ 'bă ih, wă kơ ih gơh arih sot tơ kơpal teh mă Kră Yang 'Bok Kei-Dei đei ăn.

¹³ 'Nĕ kơ pơlôch bơngai.

¹⁴ 'Nĕ plah klo kăn đe, 'nĕ pơm pơyô kư̆ kă.

¹⁵ 'Nĕ kơ tơtông klĕ.

¹⁶ 'Nĕ pơm kơdranh hơlĕnh kơ bôl buăl.

¹⁷ 'Nĕ 'nhĕng kơ hnam đe, kư̆m lê̆ kơ 'nhĕng akăn đe, dah đĭch đam drŏ-nglo, drŏ-kăn, rơmo, aseh, dah mŭk tơmam đe.

¹⁸ Kơplah đĭ-đăng kon pơlei kơtơ̆ng grơ̆m păng jơwa tơgiĕp, 'bôh chêr 'blêt kơmlat, kông lĕch 'nhui, lu sư hli tơtey dơ̆ng tơ ataih.

¹⁹ Kon pơlei khan kơ Môis: Apinh Ih jah pơma hăm lu nhôn na lu nhôn gô mơ̆ng 'nĕ ăn kơ Kră Yang 'Bok Kei-Dei pơma hăm lu nhôn, kơnh hli kơ lu nhôn lôch.

²⁰ Môis tơl khan: Lê̆ kơ hli, yua kơ Kră Yang 'Bok Kei-Dei jur wă pơlong lăng lu iĕm, wă kơ iĕm đei jơhngơ̆m hli yom kơ sư, na huay kơ pơm yoch hăm sư.

²¹ Na kon pơlei dơ̆ng đơ̆ng ataih, Môis năm jê̆ hơmơ̆l hơ'bơ̆l mă Kră Yang 'Bok Kei-Dei oei lăm noh.

Chơnang soi păng rup yang

²² Kră Yang khan Môis: Ih athei khan kơ kon pơlei Isơrael thoi âu: Lu iĕm 'bôh boih Inh đơ̆ng kơpal plĕnh pơma hăm lu iĕm;

²³ na, 'nĕ kơ man rup yang kơdih iĕm păng hu dah maih na pơting hăm Inh.

²⁴ Ih athei pơm kơ Inh minh pôm chơnang soi păng teh, kơpal noh athei pơyơ̆r tơmam soi 'buh hăm tơmam soi hiôk-hian triu dah rơmo, tơ rim anih ayơ mă Inh ăn athei 'blŏk hơdơ̆r kơ Anăn Inh, Inh gô năm tuh ăn tơdrong pŭn hiôk kơ ih tơ noh.

²⁵ Tơdah ih pơm kơ Inh minh pôm chơnang soi păng tơmo, 'nĕ kơ yua tơmo pơm păng ti, yua kơ đe blah tơmo păng ti, lei gô pơm kơ chơnang noh jing 'mê̆-'mach.

²⁶ Ih 'nĕ tŏk hăm kung dah wă năm tơ chơnang soi kơnh 'bôh tơdrong brao ih.