Le 19 - Sơ̆p Hlabơar Nơ̆r 'Bok Kei-Dei

Tơ kông Sinai

¹ Đơ̆ng rŏng kơ lu sư lĕch đơ̆ng dêh Êyiptơ, 'nao pêng khei kon pơlei Isơrael truh tơ char glă Sinai.

² Lĕch đơ̆ng Rêphiđim năm truh tơ char glă Sinai păng oei pơm bơsŭn pơdơh 'bơ̆t anăp kông.

³ Môis tŏk tơ kông năm tơ Kră Yang 'Bok Kei-Dei, Kră Yang krao sư đơ̆ng kơpal kông khan: Ih athei roi ăn kơ adrĕch Jakôp păng roi tơbăt dơ̆ng kơ kon pơlei Isơrael:

⁴ Lu iĕm 'bôh boih dôm tơdrong Inh pơm kơ bơngai Êyiptơ, Inh pôk glơng lu iĕm thoi kơpal pơnăr sem klang, wă chông lu iĕm tơ Inh.

⁵ Na, tơdah lu iĕm chu yom Inh păng wei răk dôm tơdrong Inh pơgơ̆p pơkă, lei lăm đĭ-đăng kơ dêh char, lu iĕm boih jing tơmam gĭt Inh. Mă khan đĭ-đăng teh đak jing tơmam Inh ngăl.

⁶ Gah lu iĕm jing teh đak 'bok soi păng adrĕch adrung kon pơlei 'lơ̆ng rơgoh Inh, noh boih nơ̆r ih gô pơma hăm kon pơlei Isơrael.

⁷ Môis wih krao akŭm lu kră, na roi ăn kơ lu sư dôm nơ̆r Kră Yang đei pơkă ăn athei sư pơma.

⁸ Đĭ-đăng kon pơlei minh jơhngơ̆m tơl khan: Lu nhôn gô pơm kiơ̆ dôm tơdrong Kră Yang pơkă, Môis roi hloi kơ Kră Yang kiơ̆ thoi nơ̆r kon pơlei pơma.

⁹ Kră Yang khan kơ Môis: Inh gô năm tơ ih lăm hơmơ̆l hơ'bơ̆l; wă kơplah Inh pơma dơnuh hăm ih, na kon pơlei Isơrael kơtơ̆ng wă kơ lu sư lui gơnang kơ ih ling-lang, Môis roi kơ Kră Yang nơ̆r kon pơlei Isơrael đei pơma.

¹⁰ Kră Yang khan kơ Môis: Ih năm bĕ tơ kon pơlei, Isơrael athei kon pơlei hơmet akâu kơdih mă 'lơ̆ng rơgoh năr 'nâu păng năr dơning, athei lu sư pih ao tai.

¹¹ Ăn kơ lu sư kơchăng lăm năr mă pêng, yua năr noh Kră Yang wă jur tơ kơpal kông Sinai 'bơ̆t anăp kon pơlei.

¹² Na ih athei war găn jum dăr kơ kông păng pơkă khan kơ lu sư: Athei kơchăng ưh kơ gơh tŏk tơ kơpal kông, dah hơtŭt 'bơm jơ̆ng kông, bơngai bu hơtŭt 'bơm kông đe gô pơlôch.

¹³ Gô klơ̆m pơlôch sư păng tơmo dah prah hăm hră; 'nĕ kơ ăn ti pel 'bơm bơngai noh, mă bơngai dah sem dơrong hơtŭt 'bơm kơ kông noh ưh kơ ăn arih ôh. Dĭng mưh kơtơ̆ng đe hlôm tơgiĕp na kon pơlei gơh năm tŏk tơ kông.

¹⁴ Môis jur đơ̆ng kông năm tơ kon pơlei, athei lu sư wei hơmet akâu mă 'lơ̆ng rơgoh păng pih ao tai lu sư.

¹⁵ Na sư khan kơ kon pơlei: Lăm năr mă pêng lu iĕm athei kơchăng, 'nĕ năm jê̆ bơngai drŏ-kăn ôh.

¹⁶ Pơgê năr mă pêng, đei grơ̆m glaih kơmlat, hơmơ̆l kok hơ'bơ̆l dêh gom tơ kơpal kông păng kơtơ̆ng đei jơwa hlôm tơgiĕp re dêh pơm kơ đĭ-đăng kon pơlei oei lăm bơsŭn hli tơrơ ngăl.

¹⁷ Môis chông kon pơlei lĕch đơ̆ng bơsŭn năm tơ'bơ̆p Kră Yang 'Bok Kei-Dei; na kon pơlei gô tơ jơ̆ng kông.

¹⁸ 'Nhui gom jơ̆p kơ kông Sinai, yua kơ Kră Yang jur tơ lăm ŭnh: 'Nhui ŭnh noh tŏk tơ kơpal kơjung nhen thoi đơ̆ng tơnuh ŭnh tih păng jơ̆p kơ kông pơpơ̆ dêh.

¹⁹ Păng Jơwa tơgiĕp re rai dêh; kơplah noh Môis pơma, na Kră Yang 'Bok Kei-Dei tơl sư jơwa thoi grơ̆m.

²⁰ Kră Yang jur kơpal kơ̆l kông Sinai, Krao Môis tŏk tơ kông Môis tŏk hloi.

²¹ Kră Yang khan kơ Môis, ih jur bĕ khă kon pơlei 'nĕ kơ năm tơkan tơ jê̆ wă lăng Kră Yang, kơnh hli kơ lơ bơngai gô lôch.

²² Mă lu 'bok soi hai mưh wă năm jê̆ Kră Yang athei hơmet akâu sư mă 'lơ̆ng rơgoh, tơdah ưh kơnh Kră Yang kư̆m pơrăm lu sư.

²³ Môis roi kơ Kră Yang: Kon pơlei ưh kơ gơh tŏk tơ kông Sinai ôh, yua kơ Ih đei tơtă kơ inh: Athei war găn jum dăr kơ kông păng wă 'măn anih kông noh 'lơ̆ng rơgoh.

²⁴ Kră Yang khan kơ Môis, ih jur bĕ na chông ba Arôn tŏk hăm ih, mă-lei dôm lu 'bok soi păng kon pơlei 'nĕ kơ năm hlôi kơ war găn na tŏk tơ Inh, kơnh Inh pơlôch pơrăm lu sư.

²⁵ Na, Môis jur đơ̆ng kông năm, roi ăn kơ kon pơlei băt tơdrong noh.