Le 18 - Sơ̆p Hlabơar Nơ̆r 'Bok Kei-Dei

Jêthrô năm ngôi tơ Môis

¹ Jêthrô, 'bok soi dêh Madian tơnei Môis, kơtơ̆ng dôm tơdrong Kră Yang 'Bok Kei-Dei đei pơm ăn kơ Môis hăm kon pơlei Isơrael păng Kră Yang chông ba kon pơlei Isơrael lĕch đơ̆ng dêh Êyiptơ thoi yơ.

² Sư chông ba hloi Sêpôra, akăn Môis, mă Môis ăn sư wih ngôi tơ hnam 'bă sư.

³ Hăm 'bar 'nu kon drŏ-nglo sư, minh 'nu anăn sư Gersôm,a yua kơ Môis khan boih inh chă năm oei pơdơh tơ char lu tơmoi,

⁴ păng minh 'nu anăn Êliêser,b yua kơ sư đei khan Kră Yang 'Bok Kei-Dei 'bă inh tơgŭm păng pơklaih inh đơ̆ng đao gưm Pharaôn.

⁵ Na, Jêthrô, tơnei Môis năm chông ba 'bar 'nu kon drŏ-nglo păng akăn Môis, năm ngôi apong tơ anih char glă, anih Môis oei pơdơh jê̆ kông Kră Yang 'Bok Kei-Dei.

⁶ Jêthrô athei đe năm khan kơ Môis băt: Inh Jêthrô tơnei ih năm ngôi apong tơ ih hơdai hăm akăn ih păng 'bar 'nu kon drŏ-nglo ih.

⁷ Môis năm sơng tơnei sư, drap tơ teh kơkuh păng chŭm sư, apinh jet gia dih băl hăm oei 'lơ̆ng akâu. Na mơ̆t lăm bơsŭn.

⁸ Môis ră roi ăn kơ tơnei sư băt tôm tơdrong Kră Yang pơm kơ Pharaôn păng bơngai Êyiptơ sư kư̆m roi gah lu bơngai Isơrael dôm tơdrong pơmat-tat truh kơ lu sư rok trong păng Kră Yang tơgŭm pơklaih lu sư liơ liơ.

⁹ Jêthrô lăm jơhngơ̆m sư hiôk chơt dêh kơ dôm tơdrong mơsêh mă Kră Yang pơm păng pơklaih kon pơlei Isơrael đơ̆ng ti lu bơngai Êyiptơ.

¹⁰ Na Jêthrô pơma khan: Trŏ bơnê ư-ang kơ Kră Yang tơpă! Tơ'ngla pơklaih boih lu iĕm lĕch hlôi đơ̆ng ti bơngai Êyiptơ păng đơ̆ng ti Pharaôn.

¹¹ Dang ei inh băt boih Kră Yang tih hloh kơ đĭ-đăng yang, yua kơ Sư pơklaih lu iĕm đơ̆ng ti lu bơngai Êyiptơ mă pơm kơ lu iĕm kơnê̆ dêh.

¹² Jêthrô, tơnei Môis, pơyơ̆r tơmam soi 'buh păng dôm tơmam pơyơ̆r nai ăn kơ Kră Yang 'Bok Kei-Dei; đơ̆ng noh Arôn păng lu kră bơngai Isơrael sŏng sa hơdai hăm tơnei Môis 'bơ̆t anăp Kră Yang 'Bok Kei-Dei.

¹³ Truh pơgê năr đơ̆ng rŏng, Môis hơ-oei sek tơlang kơ kon pơlei; kon pơlei dơ̆ng 'bơ̆t anăp sư đơ̆ng pơgê truh tơ kơsơ̆.

¹⁴ Tơnei Môis 'bôh dôm tơdrong Môis pơm kơ kon pơlei, na sư khan: Kon pơm kiơ kơ kon pơlei? Liơ ih hơ-oei na đĭ-đăng kon pơlei dơ̆ng tăp dăr kơ ih đơ̆ng pơgê hrôih truh tơ kơsơ̆ thoi noh?

¹⁵ Môis tơl: 'Noh yua kơ kon pơlei sư năm tơ inh wă kơ băt Kră Yang 'Bok Kei-Dei wă kơ lu sư pơm thoi yơ.

¹⁶ Tơdah lu sư đei tơdrong kiơ, lei lu sư năm tơ inh, wă kơ inh tơlang ăn kơ tơdrong lu sư păng bơtho tơblang ăn lu sư băt tơdrong juăt Kră Yang 'Bok Kei-Dei.

¹⁷ Mă-lei tơnei sư khan dơ̆ng: Dôm tơdrong ih pơm noh ưh kơ trŏ ôh.

¹⁸ Tơpă, ih hăm kon pơlei oei hơdai ih gô rơdu rơmơ̆n ưh kơ weh ôh, tơdrong noh trăp dêh kơ ih, minh 'nu ih pŭ ưh kơ kĕ ôh.

¹⁹ Na dang ei, athei mơ̆ng bĕ, inh bơtho tơ'bôh kơ ih, hơpơi apinh Kră Yang oei hơdai ih. Ăn kơ ih jing bơngai tang măt ăn kơ kon pơlei 'bơ̆t anăp Kră Yang 'Bok Kei-Dei păng roi dôm tơdrong lu sư 'bơ̆t anăp Kră Yang 'Bok Kei-Dei.

²⁰ Ih athei bơtho tơtă ăn tơdrong juăt Kră Yang, 'Bok Kei-Dei tơ'bôh ăn kơ lu sư oei arih sa thoi yơ păng tơdrong kiơ gơh pơm.

²¹ Lei na rơih iŏk bĕ lăm kon pơlei dôm bơngai drŏ-nglo gơh hơgei hlôh wao, băt hli yom kơ Kră Yang 'Bok Kei-Dei mă tơpă, areh kơ tơdrong ưh kơ trŏ, na pôk lu sư pơm bơngai wei-lăng minh-rơbâu 'nu, minh-hrĕng 'nu, kơ pơđăm-jĭt 'nu, kơ mơjĭt 'nu bơngai.

²² Wă kơ lu sư chă sek tơlang ăn kơ kon pơlei rim năr. Tơdah đei tơdrong truh tih, lu sư athei ba tơ ih; na mă dôm tơdrong iĕ, lu sư chă sek tơlang kơdih. Lei na tơdrong jang ih hơiơch 'biơ̆; lu sư gô wang pŭ tơdrong jang hơdai ih.

²³ Tơdah ih pơm thoi noh păng Kră Yang 'Bok Kei-Dei kư̆m ăn thoi noh mơ̆n, ih gô kĕ pơm keh đang đĭ dôm tơdrong jang păng đĭ-đăng kon pơlei kư̆m đei jơhngơ̆m hiôk hơđơ̆ng wih brŏk tơ hnam.

²⁴ Thoi noh Môis chu nơ̆r tơnei sư, pơm kiơ̆ dôm tơdrong tơnei sư bơtho boih.

²⁵ Na, Môis rơih hloi lu bơngai drŏ-nglo gơh hơgei đơ̆ng lăm kon pơlei Isơrael, pôk ăn pơm yŏng wei-lăng kon pơlei kơ minh-rơbâu 'nu, kơ minh-hrĕng 'nu, kơ pơđăm-jĭt 'nu, kơ mơjĭt 'nu bơngai;

²⁶ lu sư chă sek tơlang kơ kon pơlei ling-lang. Dôm tơdrong anat lu sư ba ăn tơ Môis sek mă-lei lu sư sek tơlang dôm lu tơdrong iĕ 'bônh.

²⁷ Đơ̆ng noh, Môis ba tơnei sư wih tơ dêh sư kơdih.