Le 17 - Sơ̆p Hlabơar Nơ̆r 'Bok Kei-Dei

Đak đơ̆ng tơmo

¹ Đĭ-đăng bơngai Isơrael năm tơ âu, tơ to đơ̆ng char glă Sin, năm kiơ̆ thoi nơ̆r Kră Yang đei tơtă kơ lu sư, na lu sư oei pơdơh tơ Rêphiđim: Tơ noh ưh kơ đei đak nhă ôh kơ kon pơlei.

² Thoi noh kon pơlei tơhil hăm Môis khan: Ăn kơ lu nhôn đak nhă bĕ. Môis tơl khan: Liơ mă lu iĕm wă tơhil hăm inh? Liơ lu iĕm wă pơlong lăng Kră Yang lĕ?

³ Kon pơlei oei tơ noh ưh kơ đei đak, rơhing 'maih nhă, na hil jŏk kơ Môis khan: Liơ ih chông ba lu nhôn lĕch đơ̆ng dêh Êyiptơ, wă kơ lu nhôn, kon sâu nhôn păng sem dơrong lôch rơhing kơ đak?

⁴ Môis krao apinh Kră Yang khan: Inh wă pơm liơ hăm kon pơlei 'nâu? Lu sư 'maih wă klơ̆m inh păng tơmo!

⁵ Kră Yang tơl Môis: Năm bĕ 'bơ̆t anăp kon pơlei chĕp 'long jra mă ih teh tơ đak krong Nil sơ̆ păng, chông ba lu kră bơngai Isơrael, na năm hơdai ih.

⁶ Inh gô dơ̆ng 'bơ̆t anăp ih, kơpal tơmo tơ kông Hôrêp; ih athei teh tơmo noh, na đak gô lĕch đơ̆ng lăm tơmo noh wă ăn kơ kon pơlei nhă. Môis pơm hloi thoi noh 'bơ̆t anăp măt lu kră kon pơlei Isơrael.

⁷ Sư krao anăn anih noh Masaa păng Mêrib yua kơ kon pơlei Isơrael hil jŏk păng pơlong lăng Kră Yang, khan: Hăm đei Kră Yang oei hăm lu bơ̆n ưh?

Tơblah hăm kon pơlei Amalek

⁸ Kơplah noh, kon pơlei Amalek năm wă tơblah hăm kon pơlei Isơrael tơ Rêphiđim.

⁹ Môis khan kơ Jôsuê: Rơih iŏk bĕ lu bơngai nuih kơtang, năm tơblah hăm kon pơlei Amalek; năr dơning inh gô dơ̆ng tơ kơpal groi, chĕp 'long jra Kră Yang 'Bok Kei-Dei lăm ti.

¹⁰ Jôsuê pơm hloi thoi nơ̆r Môis khan kơ sư, tơblah hăm kon pơlei Amalek; na Môis, Arôn păng Hur tŏk tơ kơpal groi kơjung.

¹¹ Wă Môis yơ̆r ti tơ kơpal, lei jei kon pơlei Isơrael wă tơjruh ti sư jei kon pơlei Amalek.

¹² Ti Môis rơgah boih Arôn păng Hur iŏk tơmo dan kơ sư tơoei, na bre sư dơ̆ng 'bar pah chĕp tơiung ti Môis tơ kơpal; na ti sư oei yơ̆r dĭng truh tơ năr mơ̆t.

¹³ Jôsuê iŏk đao gưm blah tŭk lu linh păng kon pơlei Amalek.

¹⁴ Kră Yang khan kơ Môis: Athei chih tơdrong 'nâu lăm sơ̆p hla bơar akar wă 'blŏk hơdơ̆r păng tơbăt ăn kơ Jôsuê Inh gô sŭt pơgoh ưh pă đei bu 'blŏk kơ bơngai Amalek lăm teh âu dơ̆ng.

¹⁵ Môis pơdơ̆ng minh pôm chơnang soi, krao anăn Kră Yang Hla-kơ inh

¹⁶ Sư khan: Đei bơngai yơ̆r hla-kơ Kră Yang ling-lang, na Kră Yang tơblah hăm bơngai Amalek đơ̆ng jơhnơr 'nâu truh tơ jơhnơr nai.