Le 1 - Sơ̆p Hlabơar Nơ̆r 'Bok Kei-Dei

Sơ̆p Hla Bơar mă 'bar Môis chih tơdrong đe pơmat adrĕch Isơrael

¹ 'Nâu anăn lu kon drŏ-nglo Isơrael rim 'nu kơ lu sư đei chông ba hnam dơnŏ kơdih kiơ̆ Jakôp tơ dêh Êyiptơ:

² Rubên, Simêôn, Lêwi păng Juđa;

³ Isakar, Sabulôn păng Bênjamin;

⁴ Đan, Neptali, Gat păng Aser.

⁵ Đĭ-đăng adrĕch Jakôp, đei tơpơh-jĭt 'nu; Jôsep sư đei oei tơ dêh Êyiptơ.

⁶ Jôsep lôch păng 'nhŏng oh sư hăm lu bơngai arih lăm jơhnơr 'noh lu sư kư̆m lôch đĭ-đăng.

⁷ Mă-lei kon sâu Isơrael pơjing rai lơ, rai kơdrâ̆m hlĭch chrơp tơpă, rai đunh jing mơdrŏng pran kơtang, oei 'bĕnh-'bang jơ̆p-jang kơ dêh 'noh.

Pơtao Pharaôn pơgŏ kon pơlei Isơrael

⁸ Tơ char Êyiptơ, đei minh 'nu pơtao 'nao pơgơ̆r, sư ưh kơ băt kơ Jôsep.

⁹ Pơtao khan kơ kon pơlei sư: Kon pơlei adrĕch Isơrael rai lơ kơdrâ̆m păng pran hloh kơ lu bơ̆n.

¹⁰ Na bơ̆n athei iŏk đon hlôh wao gơh hơgei wă pơm kơ lu sư, hli kơ lu sư rai lơ, tơ anăp kơnh tơdah đei tơdrong tơblah lu sư pơgơ̆p hăm lu ayăt kơ bơ̆n blah bơ̆n păng kơdâu jăk hloi đơ̆ng dêh 'nâu.

¹¹ Lei na pơtao ăn bơngai Êyiptơ wei-lăng tơdrong jang chă athei lu sư, wă rôp pơgŏ ăn tơdrong jang gleh trăp kơ kon pơlei Isơrael; lu sư man pơm pơlei Phithom păng Ramse wă pơm hnam tah mong tơmam kơ Pharaôn.

¹² Mă tơpă lu bơngai Êyiptơ rai wă rôp pơgŏ pơmat lu sư, kon pơlei Isơrael rai lơ rai jơ̆p-jang kơ dêh char, lăm jơhngơ̆m lu bơngai Êyiptơ hli kơ kon pơlei Isơrael.

¹³ Lei na bơngai Êyiptơ rôp pơgŏ bơngai Isơrael jang gleh hrat pơmat-tat tơpă.

¹⁴ Lu sư pơmat kon pơlei Isơrael hăm tơdrong jang hrat pơjuă teh pơm găch păng lơ tơdrong jang nai lăm mir chŭn. Dôm tơdrong jang lu bơngai Êyiptơ rôp pơgŏ kon pơlei Isơrael jang gleh pơmat-tat dêh.

Pharaôn chă đon wă pơtôch adrĕch Isơrael

¹⁵ Pơtao dêh Êyiptơ khan kơ lu yă kơ'mĭn bơngai Hêbrơ tơpŭ, minh 'nu anăn Sipra păng minh 'nu anăn Phuah.

¹⁶ Sư khan: Tơdah lu iĕm kơ'mĭna lu bơngai drŏ-kăn Hêbrơ tơpŭ, mưh tơpŭ kon drŏ-nglo, iĕm ket pơlôch lê̆ hŏ, mưh bơngai drŏ-kăn iĕm rong arih.

¹⁷ Mă-lei lu yă kơ'mĭn đe tơpŭ mă băt hli yom kơ Kră Yang 'Bok Kei-Dei ưh kơ đei pơm kiơ̆ nơ̆r pơtao Êyiptơ pơkă pơkăm, sư rong đĭ lu nge drŏ-nglo arih ngăl.

¹⁸ Pơtao dêh Êyiptơ krao lu yă kơ'mĭn ei khan: Liơ mă lu iĕm pơm thoi noh, rong lu kon drŏ-nglo arih ngăl?

¹⁹ Lu yă kơ'mĭn đe tơpŭ ei tơl: “'Noh yua kơ lu bơngai drŏ-kăn Hêbrơ ưh kơ thoi lu bơngai drŏ-kăn Êyiptơ ôh; lu sư đei jơhngơ̆m pran ngăl lu sư tơpŭ hlôi adrol kơ lu nhôn truh.”

²⁰ Kră Yang 'Bok Kei-Dei ăn tơdrong 'lơ̆ng kơ lu yă kơ'mĭn; kon pơlei rai tŏk păng jing rai lơ kơdrâ̆m.

²¹ Yua kơ lu yă kơ'mĭn đei jơhngơ̆m hli yom tơpă kơ Kră Yang 'Bok Kei-Dei, na Kră Yang 'Bok Kei-Dei ăn kơ hnam dơnŏ lu sư hiôk jơnap,

²² Pharaôn khan tơtă kơ đĭ-đăng kon pơlei sư kơdih thoi âu: Mưh iĕm 'bôh lu bơngai Hêbrơ 'nao tơpŭ kon drŏ-nglo iĕm klơ̆m lê̆ tơ đak krong Nil; kon drŏ-kăn iĕm rong sư arih.