Jôsuê 7 - Sơ̆p Hlabơar Nơ̆r 'Bok Kei-Dei

Akan pơm yoch

¹ Kon pơlei Isơrael đei pơm tơdrong yoch ưh kơ chu gah tơmam trŏ kơ pơyơ̆r; păng pơrăm Akan kon drŏ-nglo Karmi, sâu Sapđi, sâu i Sêra, đơ̆ng adrĕch Juđa, đei iŏk tơmam trŏ kơ soh pơrăm lê̆ păng trŏ kơ pơyơ̆r noh, lei Kră Yang, hil mĭl kơ kon pơlei Isơrael.

² Đơ̆ng Jêrikô Jôsuê wơh bơngai năm chop lăng pơlei Ahi, Jê̆ Bêt Awen, gah hơlĕch kơ Bethel na khan: Năm chop lăng bĕ tơring noh. Lei na lu sư năm chop lăng pơlei Ahi.

³ Lu sư wih brŏk tơ Jôsuê păng khan: Ưh kơ kăl kơ chông ba đĭ kon pơlei năm tơ noh ôh, tơdrong kơ đei, ih athei ăn dang 'bar dah pêng-rơbâu 'nu bơngai đĕch, năm tơblah pơlei Ahi, 'nĕ kơ ăn đĭ kon pơlei năm gleh lap tơ noh, yua kơ bơngai pơlei Ahi lăp tŏ sĕt đĕch.

⁴ Thoi noh, đei dang pêng-rơbâu 'nu bơngai tŏk năm tơblah tơ noh, mă-lei lu sư kơdâu tơklah tơklang kơ bơngai pơlei Ahi.

⁵ Bơngai pơlei Ahi pơlôch dang pêng-jĭt tơdrâu 'nu, druh lu linh Isơrael đơ̆ng 'măng dur pơlei truh tơ Sêbarim, blah lu sư kơplah lu sư jur tơ krang, jơhngơ̆m lu sư hli tơrơ thoi đak ro

⁶ Jôsuê hek ao sư kơdih, sư păng lu kră pơlei Isơrael, drap tơ teh kŭp kơ̆l 'bơ̆t anăp Hom Kră Yang truh tơ kơsơ̆ măng păng chup 'mui teh klă 'bĕnh kơ kơ̆l lu sư kơdih.

⁷ Jôsuê khan: Ô Kră Yang inh, liơ mă Kră Yang ăn kon pơlei âu tŏk hlôi kơ đak Krong Jôrđăn, wă jao ăn lu nhôn răm lăm ti lu bơngai Amôrit pơlôch đĭ. Ô kuă kơ kiơ lê̆ lăi lu nhôn hiôk oei gah to kơ đak Krong Jôrđăn!

⁸ Ơu! Ơ Kră Yang! Lei inh wă gơh pơma liơ dơ̆ng? Kon pơlei Isơrael đe đĭ druh blah.

⁹ Tơdah kon pơlei Kanaan păng đĭ-đăng kon pơlei oei lăm char âu, gô kơtơ̆ng tơdrong âu, lu sư gô wang nhôn păng sŭt lê̆ anăn lu nhôn đơ̆ng teh âu, lei Ih wă pơm thoi yơ, yua kơ Anăn Ih Tih hloh.

¹⁰ Kră Yang khan kơ Jôsuê, Iung bĕ, liơ kŭp muh măt tơ teh thoi noh?

¹¹ Bơngai Isơrael đei pơm tơdrong yoch boih, lu sư ưh kơ wă pơm kiơ̆ tơdrong pơgơ̆p mă Inh đei pơkă ăn kơ lu sư athei răk, lu sư iŏk bơih tơmam trŏ kơ pơyơ̆r păng pơrăm pơma hơlĕnh, lu sư tơtông iŏk tơmam noh tah lê̆ lăm kơdŭng lu sư kơdih,

¹² yua kơ thoi noh, kon pơlei Isơrael ưh kơ kĕ tơblah hăm lu bơngai ayăt kơ lu sư ôh, lu sư kơdŭn tơ rŏng kơdâu ôn, pơm kơdih pŭ iŏk tơdrong pơlôch pơrăm. Tơdah lu iĕm ưh kơ đei pơrăm lê̆ tơmam đe trŏ kơ pơyơ̆r pơrăm noh đơ̆ng lăm lu iĕm, lei Inh ưh pă đei oei hơdai lu iĕm boih.

¹³ Iung bĕ pơm kơ kon pơlei rơgoh păng khan: Hơmet bĕ lu iĕm kơdih mă rơgoh, kơ năr dơning, yua kơ 'nâu nơ̆r Kră Yang 'Bok Kei-Dei Isơrael đei khan: Ơ lu bơngai Isơrael, tơ lăm lu iĕm đei tơmam mă trŏ kơ pơyơ̆r păng pơrăm. Lu iĕm ưh kơ kĕ ôh tơblah hăm lu bơngai ayăt kơ iĕm, dĭng mă lu iĕm đei iŏk lê̆ tơmam noh đơ̆ng lăm lu iĕm.

¹⁴ Lei na dơning lu iĕm athei năm pơdah akâu kiơ̆ kơ adrĕch adrung lu iĕm, adrĕch adrung ayơ mă Kră Yang tơhlâu, năm hloi tơ hnam dơnŏ, hnam dơnŏ ayơ mă Kră Yang tơhlâu, năm hloi tơ rim 'nu.

¹⁵ Bơngai bu mă đei tơhlâu, bơngai noh boih đei iŏk tơmam pơyơ̆r, pơlôch bơngai noh lăm ŭnh hơdai hăm lu tơmam sư, yua kơ sư pơm glăi kơ nơ̆r pơgơ̆p Kră Yang pơm ăn kơ adrĕch Isơrael mơlâu.

¹⁶ Thoi noh Jôsuê iung đơ̆ng hrôih, chông ba lu bơngai Isơrael năm akŭm, kiơ̆ kơ adrĕch lu sư Kră Yang tơhlâu tơ'bôh lăm adrĕch Juđa.

¹⁷ Sư ăn adrĕch Juđa năm jê̆ Kră Yang tơhlâu kơ adrĕch Sêra, sư ăn adrĕch Sêra năm jê̆, kiơ̆ kơ hnam dơnŏ Kră Yang tơhlâu kơ hnam dơnŏ Sapđi đei iŏk.

¹⁸ Sư ăn kơ hnam dơnŏ Sapđi năm jê̆ minh 'nu minh 'nu, na Kră Yang tơhlâu Akan kon drŏ-nglo Karmi, sâu Sapđi, sâu i Sêra, đơ̆ng adrĕch adrung Juđa.

¹⁹ Jôsuê khan kơ Akan: Ô dăm! Athei băt kơkuh ư-ang kơ Kră Yang 'Bok Kei-Dei Isơrael păng bơnê kơ Sư; roi tơbăt bĕ, kơ inh dăm ih đei pơm tơdrong kiơ boih, 'nĕ ôn kơ inh tơdrong noh.

²⁰ Akan tơl Jôsuê: Trŏ tơpă, inh đei pơm tơdrong yoch hăm Kră Yang 'Bok Kei-Dei Isơrael. 'Nâu tơdrong inh đei pơm boih.

²¹ Inh đei 'bôh minh blah ao tai Sinêa 'lơ̆ng, lăm tơmam blah tơgar iŏk, 2 kĭ 30grama jên hu, minh tơpei maih, trăp 0 kĭ 600gram binh wă dêh tơmam noh, iŏk ôn lê̆ 'bŭ lăm teh, tŏk-bŏk anih bơsŭn inh, hu 'bŭ sư tơ ala.

²² Jôsuê wơh bơngai năm tơ bơsŭn, 'bôh ao tai tơ noh păng hu 'bŭ tơ ala.

²³ Sư kôch iŏk tơmam lăm tŏk-bŏk bơsŭn, chĕp ba ăn kơ Jôsuê păng tơ'bôh kơ đĭ-đăng kon pơlei Isơrael, dan 'bơ̆t anăp Kră Yang.

²⁴ Jôsuê păng đĭ-đăng kon pơlei Isơrael rôp Akan, sâu Sêra, iŏk Hu, ao tai, tơpei Maih, lu kon drŏ-nglo, drŏ-kăn sư, lu rơmo, aseh iĕ, triu păng hnam bơsŭn păng đĭ kơ dôm tơmam sư, chông chĕp ba sư tơ lăm thŭng pŭng-lŭng Akôr.

²⁵ Jôsuê khan: Yua kơ kiơ ih pơm tơdrong răm kơ lu bơ̆n? Kră Yang kư̆m pơrăm ih thoi noh mơ̆n năr 'nâu, đĭ-đăng kon pơlei Isơrael, klơ̆m tơmo tơ Akan. Đơ̆ng rŏng kơ klơ̆m tơmo đĭ-đăng hnam dơnŏ sư, đe iŏk ŭnh soh pơlôch đĭ lu sư.

²⁶ Lu sư dan lê̆ tơmo, tơ kơpal akâu Akan lôch, hơlôk dang ei oei đei, Kră Yang huay pă hil mĭl, đơ̆ng noh truh tơ dang ei, đe krao anih noh thŭng Akôr.c