Jôsuê 24 - Sơ̆p Hlabơar Nơ̆r 'Bok Kei-Dei

Tơ Sichem tơ'blŏk dơ̆ng tơdrong pơgơ̆p

¹ Jôsuê krao akŭm đĭ adrĕch adrung Isơrael tơ Sichem. Sư krao akŭm đĭ lu kră pơgơ̆r, lu kră sek tơlang păng lu yŏng pơgơ̆r linh; lu sư akŭm đĭ 'bơ̆t anăp Kră Yang 'Bok Kei-Dei.

² Jôsuê khan hăm đĭ-đăng kon pơlei: “Kră Yang 'Bok Kei-Dei Isơrael đei khan: ‘'Bok iĕm sơ̆ noh Tharê 'bă kơ Abraham păng Nakô, oei gah to Krong Tih păng bơ̆jang kơkuh kơ lu yang nai.

³ Mă-lei inh rơih iŏk Abraham 'bok lu iĕm lĕch đơ̆ng gah to Krong Tih păng chông ba sư năm jơ̆p-jang kơ dêh Kanaan, ăn kơ sư Isăk păng ăn kơ adrĕch adrung sư chek lar lơ.

⁴ Inh ăn Jakôp păng Êsâu kơ Isăk, ăn kông Sêir kơ Êsâu bơ̆jang sa mir 'ba, gah Jakôp hăm lu kon sư jur oei tơ char Êyiptơ.

⁵ Đơ̆ng noh, Inh wơh Môis hăm Arôn yua tơdrong mơsêh wă pơrăm tơ lăm char Êyiptơ; na Inh 'ba lu iĕm lĕch đơ̆ng noh.

⁶ Kơplah Inh chông ba tơlĕch lu 'bok yă lu iĕm đơ̆ng char Êyiptơ, lu sư năm truh tơ đak dơsĭ lu bơngai Êyiptơ druh 'moi 'bok yă lu iĕm hăm lu linh gre aseh, lu linh jơ̆ng hoh truh tơ đak Dơsĭ 'Brê.

⁷ Mă-lei, 'bok yă lu iĕm krao apinh Kră Yang dŏng, Kră Yang ăn đei măng mu lăm lu kon pơlei Êyiptơ hăm lu iĕm, Kră Yang ăn đak dơsĭ lơ̆p bơngai Êyiptơ păng măt lu iĕm 'bôh boih Inh pơm kơ lu bơngai Êyiptơ. Păng lu iĕm mă oei arih đunh tơ lăm char glă.

⁸ Inh chông lu iĕm mơ̆t lăm char kon pơlei Amôrit oei gah hơlĕch kơ đak Krong Jôrđăn; lu sư tơblah hăm lu iĕm mă-lei. Inh jao lu sư lăm tơpang ti lu iĕm inh pơlôch lu sư 'bơ̆t anăp lu iĕm na lu iĕm blah iŏk teh đak lu sư.

⁹ Kơplah Balak kon drŏ-nglo Sêpbô pơtao Môap iung tơblah hăm kon pơlei Isơrael, wơh Balaam, kon drŏ-nglo Bêôr, wă kơ hiap lu iĕm.

¹⁰ Mă-lei inh ưh kơ wă mơ̆ng Balaam; thoi noh sư jing tă tơ sơkat ăn pŭn hiôk kơ lu iĕm păng Inh dŏng pơklaih lu iĕm đơ̆ng tơpang ti Balak.

¹¹ Na lu iĕm tŏk kơ đak Krong Jôrđăn truh tơ pơlei Jêrikô, lu kon pơlei bơngai Jêrikô wă blah lu iĕm kư̆m thoi kon pơlei Amôrit, kon pơlei Pêrêsit kon pơlei Kanaan, kon pơlei Hêtit, kon pơlei Girgasit, kon pơlei Hêwit păng kon pơlei Jêbus, mă-lei Inh jao lu sư lăm tơpang ti lu iĕm.

¹² Inh wơh lu ong druh lu sư 'bơ̆t anăp lu iĕm, thoi druh 'bar 'nu pơtao kon pơlei Amôrit, thoi noh lu iĕm ưh pă kăl yua đao gưm hră đơ̆ng.

¹³ Inh ăn kơ lu iĕm teh đak mă lu iĕm ưh kơ ngĕ choh gleh hrat păng pơlei tih lu iĕm ưh kơ ngĕ kơ man pơjing păng lu iĕm iŏk oei tơ noh đĕch; lu pơgar hơmu hăm plei 'long ôliwơ lu iĕm yua pơm tơmam sa, lu iĕm kư̆m ưh kơ đei pơtăm.’

¹⁴ Thoi noh dang ei, athei chu yom bĕ kơ Kră Yang păng pơm kiơ̆ kơ Sư hăm đĭ jơhngơ̆m păng tơnăp, hŭt lê̆ bĕ lu yang mă 'bok lu iĕm kơkuh tơ gah hơlĕch kơ đak Krong Tih păng tơ lăm char Êyiptơ; athei chu yom bĕ kơ Kră Yang.

¹⁵ Tơdah lu iĕm ưh kơ wă chu yom ôh kơ Kră Yang, lei dang ei athei rơih iŏk bĕ kơdih lu iĕm wă kơkuh kơ bu, kơ lu yang mă lu 'bok yă lu iĕm kơkuh tơ gah hơlĕch kơ đak Krong Tih dah lu yang kon pơlei Amôrit lăm char lu sư; mă lu iĕm oei âu Mă-lei gah inh păng hnam inh gô chu yom păng pơm kiơ̆ kơ Kră Yang.”

¹⁶ Mă-lei kon pơlei tă kơ tơl: “Lu nhôn pơkă ưh kơ wă weh achăng Kră Yang păng kư̆m ưh kơ wă kơkuh kơ yang nai ôh.

¹⁷ Yua kơ Kră Yang jing 'Bok Kei-Dei lu nhôn; Sư boih chông ba lu nhôn păng 'bok yă lu nhôn lĕch klaih rơngei đơ̆ng char Êyiptơ, klaih rơngei đơ̆ng pơm đĭch; Sư đei pơm mơsêh hlĭch 'bơ̆t anăp lu nhôn păng tơgŭm lu nhôn, mă tơ rok trong nhôn yak, mă hăm lăm kon pơlei nai huay kơ đei pơrăm lu nhôn.

¹⁸ Kră Yang đei pơpuh tơweh boih 'bơ̆t anăp lu nhôn lu adrĕch adrung, kon pơlei Amôrit mă oei lăm char 'nâu lu nhôn wă chu yom kơ Kră Yang, yua kơ Sư boih Kră Yang 'Bok Kei-Dei lu nhôn.”

¹⁹ Jôsuê khan kơ kon pơlei: “Lu iĕm ưh kơ kĕ ôh wă chu yom kơ Kră Yang, yua kơ Sư Kră Yang 'Bok Kei-Dei 'lơ̆ng rơgoh, Kră Yang 'Bok Kei-Dei băt kơ gar. Sư ưh kơ lê̆ ôh tơdrong lu iĕm pơm kơnê̆ păng tơdrong yoch lu iĕm.

²⁰ Tơdah lu iĕm achăng lê̆ Kră Yang, na kơkuh kơ yang tơmoi, kơplah noh Sư gô wih pơlôch pơrăm pơgoh lu iĕm, đang kơ Sư pơm 'lơ̆ng boih kơ lu iĕm đei truh tơ năr 'nâu.”

²¹ Mă-lei kon pơlei oei khan kơ Jôsuê: Ưh ôh, lu nhôn gô chu yom kơ Kră Yang.

²² Kơplah noh, Jôsuê khan hăm kon pơlei: Lu iĕm pơm kơdranh kơdih lu iĕm khan lu iĕm hlôi rơih iŏk boih Kră Yang wă chu yom kơ Sư. Kon pơlei tơl: Ơ, Lu nhôn pơm kơdranh tơdrong noh.

²³ Jôsuê khan dơ̆ng: Thoi noh, dang ei, athei hŭt lê̆ bĕ yang tơmoi đơ̆ng lăm lu iĕm, athei đei jơhngơ̆m chu brŏk tơ Kră Yang 'Bok Kei-Dei Isơrael.

²⁴ Kon pơlei tơl Jôsuê: Lu nhôn gô chu yom kơ Kră Yang 'Bok Kei-Dei lu nhôn păng pơm kiơ̆ nơ̆r Sư.

²⁵ Lăm năr noh Jôsuê tơ'blŏk ăn tơdrong pơgơ̆p kơ kon pơlei păng tơbăt ăn kơ lu sư khôi juăt păng nơ̆r tơtă tơ pơlei Sichem.

²⁶ Jôsuê chih đĭ dôm nơ̆r noh lăm sơ̆p hla bơar khôi juăt 'Bok Kei-Dei. Đơ̆ng noh, sư iŏk minh pôm tơmo tih pơdơ̆ng 'bơ̆t ala tơm 'long kôih jê̆ anih rơgoh Kră Yang.

²⁷ Na Jôsuê pơma khan hăm đĭ-đăng kon pơlei: To, tơmo âu wă yua pơm kơdranh kơ lu bơ̆n; yua kơ sư đei kơtơ̆ng boih dôm nơ̆r Kră Yang đei khan kơ lu bơ̆n, sư gô pơm kơdranh plơ̆ ăn kơ lu iĕm, dah lu iĕm hơlĕnh ưh kơ chu Kră Yang 'Bok Kei-Dei lu iĕm.

²⁸ Jôsuê ăn kơ kon pơlei wih, bu bu kư̆m wih brŏk jang sa mir 'ba kơdih.

Jôsuê păng Êlêasar lôch

²⁹ Đơ̆ng rŏng kơ lu tơdrong noh, Jôsuê kon drŏ-nglo Nun, đĭch đam Kră Yang, lôch, sư arih đei minh-hrĕng mơjĭt sơnăm.

³⁰ Đe 'bŭ sư tơ teh đei hlang iŏk kơ sư kơdih tơ pơlei Timnat Sêra tơ tơring groi kông Êphraim, gah yă-nơ̆m kơ kông Gaas.

³¹ Lu kon pơlei Isơrael chu yom kơ Kră Yang đĭ lăm chăl arih Jôsuê păng đĭ lăm chăl lu kră arih sot hloh kơ Jôsuê, lu bơngai mă đei 'bôh păng băt tôm tơdrong Kră Yang đei pơm boih lăm lu kon pơlei Isơrael.

³² Kơting Jôsep mă kon pơlei Isơrael iŏk chĕp ba đơ̆ng char Êyiptơ, 'bŭ tơ pơlei Sichem, lăm teh mă Jakôp răt đơ̆ng kon drŏ-nglo Hamôr, 'bă kơ Pơlei Sichem, minh-hrĕng tơpei jên hu;a kon sâu Jôsep đei teh noh jing teh jang sa mir 'ba lu sư.

³³ Êlêasar, kon drŏ-nglo Arôn, kư̆m lôch, đe 'bŭ sư tơ Gibêah pơlei mă Phinêhas, kon drŏ-nglo sư, teh noh đe ăn kơ sư tơ tơring groi kông Êphraim.