Jôsuê 21 - Sơ̆p Hlabơar Nơ̆r 'Bok Kei-Dei

Pơlei ăn kơ lu bơngai Lêwi

¹ Lu Yŏng kơdră lăm adrĕch bơngai Lêwi năm tơ 'bok soi Êlêasar, tơ Jôsuê kon drŏ-nglo Nun păng lu yŏng kơdră nai kư̆m lăm adrĕch bơngai Isơrael,

² khan kơ lu sư tơ pơlei Silô lăm char Kanaan, Kră Yang tơtă ăn boih kơ Môis wă ăn kơ lu nhôn teh pơlei wă oei, teh jum dăr kơ pơlei đei tơmăn 'nhĕt wă ăn kơ sem dơrong lu nhôn sa.

³ Thoi noh kiơ̆ Kră Yang đei tơtă, lei lu kon pơlei Isơrael asong ăn kơ adrĕch bơngai Lêwi pơlei tih păng teh tơmăn 'nhĕt jum dăr pơlei lu sư, đơ̆ng teh jang sa lu sư kơdih.

⁴ Đei hlang lăng mă mônh ăn kơ adrĕch Kôhat; kiơ̆ kơ lu adrĕch adrung lu sư. Lu kon sâu 'bok soi Arôn adrĕch Lêwi hlang iŏk trŏ đei mơjĭt-pêng tŏ pơlei đơ̆ng lăm adrĕch Juđa, adrĕch Simêôn păng adrĕch Bênjamin.

⁵ Lu kon sâu Kôhat nai, kiơ̆ kơ đei hlang iŏk đei mơjĭt tŏ pơlei đơ̆ng lăm adrĕch Êphraim, adrĕch Đan păng đơ̆ng minh puăt adrĕch Manase.

⁶ Gah kon sâu Gersôn, hlang trŏ đei mơjĭt-pêng tŏ pơlei đơ̆ng lăm adrĕch Isakar, adrĕch Aser, adrĕch Naptali păng minh puăt đơ̆ng adrĕch Manase tơ char Basan.

⁷ Kon sâu Marari kiơ̆ kơ adrĕch adrung lu sư, đei iŏk mơjĭt-'bar tŏ pơlei đơ̆ng lăm adrĕch Rubên, adrĕch Gat păng đơ̆ng adrĕch Sabulun.

⁸ Kon pơlei Isơrael đei hlang lăng ăn kơ bơngai Lêwi lu pơlei tih păng teh jum dăr pơlei, đei tơmăn 'nhĕt kiơ̆ kơ Kră Yang đei tơtă ăn kơ Môis.

⁹ Thoi noh kon pơlei Isơrael iŏk đơ̆ng adrĕch Juđa păng adrĕch Simêôn, lu pơlei đei hlang lăng trŏ kơ anăn na asong ăn,

¹⁰ Trŏ kơ kon sâu Arôn adrĕch adrung Kôhat, kon drŏ-nglo Lêwi, yua kơ đe hlang lăng trŏ kơ lu sư adrol.

¹¹ Đơ̆ng adrĕch Juđa đei ăn kơ lu sư pơlei Kiriat Arba, đe kư̆m krao pơlei Hêbrôn (Arba 'bă Anak), oei tơ tơring groi kông lăm char Juđa păng teh Jum dăr kơ pơlei, đei tơmăn 'nhĕt.

¹² Mă-lei mir păng lu pơlei iĕ tăp dăr kơ pơlei tih noh đe, ăn boih kơ Kalep kon drŏ-nglo Jêphunê jang sa.

¹³ Teh ăn kơ lu kon sâu Arôn 'bok soi tơm pơlei Hêbrôn, jing pơlei ôn kơ'nơp kơ lu bơngai mă pơlôch đe hơch 'bơm. Lipna;

¹⁴ Jatir păng pơlei Êthemôa.

¹⁵ Hôlôn păng Đêbir,

¹⁶ Ain Juta păng Bêt Sêmes păng teh jum dăr kơ pơlei, đei tơmăn 'nhĕt, đĭ-đăng tơsĭn tŏ pơlei đơ̆ng lăm 'bar adrĕch noh.

¹⁷ Iŏk dơ̆ng đơ̆ng adrĕch Bênjamin, đei pơlei, Gibeôn păng Gêba.

¹⁸ Anathôt păng Almôn; đei tơmăn 'nhĕt đĭ-đăng puăn tŏ pơlei,

¹⁹ Jô̆ akŭm đĭ-đăng lu pơlei kon sâu Arôn 'bok soi, mơjĭt-pêng tŏ pơlei păng teh jum dăr pơlei đei tơmăn 'nhĕt.

²⁰ Bĕ lu adrĕch Kôhat nai kon sâu bơngai Lêwi, đei hơdôm tŏ pơlei đe hlang lăng iŏk đơ̆ng lăm adrĕch Êphraim.

²¹ Lăm tơring groi kông Êphraim ăn lu sư pơlei Sichem, pơlei ôn kơ'nơp kơ lu bơngai pơlôch đe hơch 'bơm, Geser.

²² Kibsaim păng Bêt Hôrôn păng teh jum dăr pơlei, đei tơmăn 'nhĕt, đĭ-đăng puăn tŏ pơlei.

²³ Lu đe iŏk đơ̆ng adrĕch Đan, pơlei Êltêkê Gibêthôn,

²⁴ Aijalôn Gat Rimôn păng teh jum dăr kơ pơlei đei tơmăn 'nhĕt, đĭ-đăng puăn tŏ pơlei.

²⁵ Păng iŏk đơ̆ng minh puăt adrĕch Manase, pơlei Tanak păng pơlei Gat Rimmôn păng teh jum dăr kơ pơlei đei tơmăn 'nhĕt, đĭ-đăng 'bar tŏ pơlei.

²⁶ Akŭm đĭ-đăng pơlei păng teh jum dăr kơ pơlei 'măn kơ lu adrĕch adrung kon sâu Kôhat nai, đei mơjĭt tŏ pơlei.

²⁷ Ăn kơ kon sâu Gersôn lu adrĕch adrung Lêwi, iŏk đơ̆ng minh puăt lăm adrĕch Manase, pơlei Gôlan lăm char Basan, jing pơlei ôn kơ'nơp kơ lu bơngai mă pơlôch đe hơch 'bơm pơlei Bestêra păng teh jum dăr kơ pơlei đei tơmăn 'nhĕt, đĭ-đăng 'bar tŏ pơlei.

²⁸ Păng đei iŏk đơ̆ng adrĕch Isakar, pơlei Kisiôn păng Đabêrat

²⁹ Jarmut păng Ên Ganim păng teh jum dăr kơ pơlei, đei tơmăn 'nhĕt đĭ-đăng puăn tŏ pơlei.

³⁰ Iŏk dơ̆ng đơ̆ng adrĕch Aser, pơlei Misal păng Apđôn.

³¹ Hêlkat păng Rêhôp păng teh jum dăr kơ pơlei đei tơmăn 'nhĕt, đĭ-đăng puăn tŏ pơlei.

³² Păng kư̆m iŏk dơ̆ng đơ̆ng adrĕch Naptali, pơlei Kêđes lăm char Galilê, jing pơlei ôn kơ'nơp kơ bơngai bu mă pơlôch đe hơch 'bơm, pơlei Hamôt Đôr pơlei Kartan păng teh jum dăr kơ pơlei; đei tơmăn 'nhĕt, đĭ-đăng pêng tŏ pơlei.

³³ Jô̆ akŭm đĭ-đăng pơlei ăn kơ adrĕch Gersôn, kiơ̆ kơ adrĕch adrung đei mơjĭt-pêng tŏ pơlei păng teh jum dăr pơlei, đei tơmăn 'nhĕt.

³⁴ Kơ lu bơngai Lêwi mă oei đei, lu kon sâu adrĕch adrung Mêrani, đe ăn đơ̆ng adrĕch Sabulun, đei pơlei Jôknêam păng pơlei Karta.

³⁵ Đima păng Nahalal păng teh jum dăr kơ pơlei đei tơmăn 'nhĕt, đĭ-đăng puăn tŏ pơlei,

³⁶ Đơ̆ng lăm adrĕch Rubên, iŏk pơlei Bêser păng Jahas

³⁷ Kêđêmôt păng Mêphat păng teh jum dăr kơ pơlei; đei tơmăn 'nhĕt, đĭ-đăng puăn tŏ pơlei.

³⁸ Đei iŏk đơ̆ng adrĕch Gat, pơlei Ramôt lăm char Gileat, jing pơm pơlei ôn kơ'nơp kơ lu bơngai bu pơlôch đe hơch 'bơm, Mahanim

³⁹ Hesbôn păng đei tơmăn 'nhĕt; Jaser păng teh jum dăr kơ pơlei đei tơmăn 'nhĕt, đĭ-đăng puăn tŏ pơlei.

⁴⁰ Akŭm đĭ pơlei đei ăn kơ kon sâu Mêrari kiơ̆ kơ adrĕch adrung lu sư, noh lăm lu adrĕch adrung bơngai Lêwi mă oei đei, đei mơjĭt-'bar tŏ pơlei.

⁴¹ Akŭm đĭ-đăng lu pơlei adrĕch bơngai Lêwi teh jang sa oei tŏk-bŏk kon pơlei Isơrael đei puăn-jĭt tơhngam tŏ pơlei păng teh jum dăr kơ pơlei, đei tơmăn 'nhĕt.

⁴² Rim pơlei noh đei teh jum dăr pơlei; đei tơmăn 'nhĕt, đĭ-đăng pơlei tih thoi ei ngăl.

⁴³ Thoi noh boih Kră Yang ăn kơ adrĕch Isơrael đĭ char mă Kră Yang pơkă boih kơ adrĕch adrung lu 'bok sư. Kon pơlei Isơrael iŏk klah asong bơ̆jang sa mir 'ba păng oei tơ lăm char noh.

⁴⁴ Thoi noh Kră Yang ăn tơdrong pơdơh, hiôk-hian kiơ̆ thoi Kră Yang đei pơkă pơkăm hăm 'bok păng adrĕch adrung lu sư, ưh kơ đei lu ayăt ayơ mă gơh kĕ tơblah hăm lu sư. Kră Yang jao boih ăn đĭ-đăng lu ayăt lăm tơpang ti lu sư.

⁴⁵ Lăm dôm nơ̆r 'lơ̆ng mă Kră Yang đei hlôi khan boih kơ adrĕch bơngai Isơrael, ưh kơ đei minh nơ̆r pơkă pơkăm ayơ mă khan ưh kơ jing đĭ-đăng đei pơsĭt ngăl.