Jôsuê 20 - Sơ̆p Hlabơar Nơ̆r 'Bok Kei-Dei

Lu pơlei ôn kơ'nơp

¹ Kră Yang khan kơ Jôsuê:

² Khan bĕ kơ kon pơlei Isơrael: Athei lu sư chă bĕ pơlei wă pơm pơlei ôn kơ'nơp, kiơ̆ thoi Inh khan boih kơ Môis sư kư̆m đei khan boih kơ ih,

³ wă kơ lu bơngai mă pơlôch đe glăi ưh kơ pơrơ̆ng kơdâu ôn tơ noh, lu pơlei noh wă yua pơm pơlei kơ lu bơngai kơdâu ôn kơ đe wă pơlôch 'mong pham.

⁴ Lu bơngai mă pơlôch đe gơh kơdâu ôn tơ minh lăm lu pơlei noh, dơ̆ng 'bơ̆t 'măng jang pơlei, roi kơ lu kră pơlei dôm tơdrong sư, na đe kră gơh sơng iŏk lu bơngai noh gơh mơ̆t lăm pơlei noh gơh ăn kơ sư anih oei, bơngai noh gơh oei hơdai hăm lu sư.

⁵ Tơdah lu bơngai mă wă pơlôch 'mong iung kơting druh 'moi sư, lu kră pơlei noh ưh kơ rôp jao bơngai mă pơlôch đe noh ôh, yua kơ bơngai noh pơlôch tơduă rông 'bôt sư, hăm tơdrong ưh kơ đei hơch 'bơm, ưh kơ đei chă tơhil klai areh băl adrol ôh,

⁶ lu sư oei lăm pơlei noh truh tơ lu sư năm dơ̆ng 'bơ̆t anăp đe tơpôl, akŭm sek tơlang, dĭng truh tơ 'bok soi tơm bơ̆jang kơplah noh lôch boih, kơplah noh lu bơngai mă pơlôch đe gơh wih brŏk tơ pơlei hnam sư kơdih,

⁷ Thoi noh kon pơlei Isơrael, rơih iŏk pơlei Kades lăm char Galilê, tơ kơpal kông char Naptali; Pơlei Sichem tơ kơpal kông Êphraim păng pơlei Kiriat Arba, noh đe krao pơlei Hêbrôn, oei tơ kơpal kông lăm char Juđa.

⁸ Gah hơlĕch kơ đak Krong Jôrđăn păng pơlei Jêrikô, lu sư rơih iŏk pơlei Bêser groi glă lăm teh adrĕch Rubên, Ramôt tơ char Gileat; lăm teh adrĕch Gat, pơlei Gôlan tơ char Basan lăm teh adrĕch Manase.

⁹ Noh boih lu pơlei lu sư rơih iŏk ăn kơ đĭ-đăng kon pơlei Isơrael păng lu bơngai tơmoi mă oei tơ noh; wă 'măn kơ bơngai bu mă pơlôch 'bơm đe ưh kơ pơrơ̆ng, gơh năm kơdâu ôn tơ noh, wă kơ sư huay kơ đei lôch kơ lu bơngai mă wă pơlôch 'mong pham, adrol kơ sư năm dơ̆ng 'bơ̆t anăp tơpôl khŭl akŭm. Sek tơlang.