Jôsuê 18 - Sơ̆p Hlabơar Nơ̆r 'Bok Kei-Dei

Klah asong teh mă oei đei

¹ Đĭ-đăng kon pơlei Isơrael, đei akŭm tơ pơlei Silô, pơm pơdơ̆ng Bơsŭn anih akŭm blŭng-a tơ noh: Lu sư pơgơ̆r jơ̆p teh đak.

² Mă-lei oei đei pă tơpơh adrĕch Isơrael tam mă đei asong teh jang sa.

³ Na, Jôsuê khan hăm kon pơlei Isơrael: Iĕm wă gô dang yơ dơ̆ng năm mơ̆t blah iŏk char mă Kră Yang 'Bok Kei-Dei 'bok lu iĕm ăn bơih kơ iĕm?

⁴ Rơih lăm rim adrĕch pêng 'nu, inh wă wơh ăn kơ lu sư năm, lu sư âu gô năm lăng tơ jơ̆p kơ char, chih roi tơbăt teh gah yơ kơ adrĕch lu sư kơdih, đang boih na brŏk wih tơ inh.

⁵ Lu iĕm athei klah asong char noh kơ tơpơh adrĕch adrung; Juđa athei oei tơ gah gơal, adrĕch Jôsep oei tơ gah yă-nơ̆m.

⁶ Đang kơ lu iĕm chih roi kơ teh asong lăm tơpơh adrĕch noh, na ba hla bơar noh tơ inh; inh gô hlang lăng ăn kơ lu iĕm tơ âu 'bơ̆t anăp Kră Yang 'Bok Kei-Dei lu bơ̆n.

⁷ Mă-lei bơngai Lêwi ưh kơ đei asong ôh teh wă jang sa dơ̆ng lăm lu iĕm, yua kơ lu sư jing 'bok soi jang kơ Kră Yang noh jing tơdrong jang sa lu sư. Lu adrĕch Gat, Rubên păng minh puăt adrĕch Manase đei iŏk boih teh jang sa đơ̆ng Môis, đĭch đam Kră Yang, đei asong ăn kơ lu sư gah hơlĕch đak Krong Jôrđăn.

⁸ Kơplah lu sư iung yak năm; Jôsuê pơkă kơ lu sư. Lu iĕm athei năm jơ̆p kơ char noh chhơ̆ iŏk rup teh char noh, na wih brŏk tơ inh; inh gô hlang ăn kơ lu iĕm 'bơ̆t anăp Kră Yang tơ pơlei Silô.

⁹ Thoi noh lu sư năm jơ̆p kơ char, chhơ̆ rup teh đak lăm sơ̆p hla bơar hơkar ră roi kơ rim pơlei lăm char noh mă asong kơ tơpơh adrĕch, na lu sư wih brŏk tơ Jôsuê oei lăm anih tơ pơlei Silô.

¹⁰ Jôsuê hlang lăng kơ lu sư tơ pơlei Silô, 'bơ̆t anăp Kră Yang; tơ noh Jôsuê klah asong char ăn kơ kon pơlei Isơrael, kiơ̆ kơ adrĕch adrung lu sư.

Asong teh ăn kơ Bênjamin

¹¹ Hlang lăng iŏk trŏ kơ adrĕch Bênjamin, kiơ̆ kơ adrĕch adrung lu sư, teh mă klah asong lu sư, oei tŏk-bŏk sơlam lu adrĕch Juđa păng Jôsep.

¹² Hơdral kơ Bênjamin gah yă-nơ̆m iŏk đơ̆ng đak Krong Jôrđăn, rok tŏk tơ gah yă-nơ̆m tơter kông pơlei Jêrikô tơ gah bơmơ̆t tŏk truh tơ kông groi tơ'bưh tơ lăm thŭng Bêt Awen.

¹³ Đơ̆ng noh hơdral hlôi tơ gơal tơter kông pơlei Lus, wă khan pơlei Bethel, na jur truh tơ pơlei Atarôt Ađar. Tơ kơpơ̆ng kông gah gơal lăm thŭng ala kơ pơlei Bêt Hôrôn.

¹⁴ Đơ̆ng kơpal kông truh tơklă Bêt Hôrôn pah gơal; hơdral jur tơ gơal 'moi rok gah bơmơ̆t dĭng truh tơ'bưh kơ Kiriat Baal, wă khan Kiriat Jêrim pơlei bơngai Juđa, noh hơdral gah bơmơ̆t.

¹⁵ Hơdral gah gơal iŏk đơ̆ng 'nguaih kơ pơlei tih Kiriat Jêrim; rok gah bơmơ̆t, tơpăt tơ đak glung Neptôa;

¹⁶ hơdral jur tơ jơ̆ng kông rok thŭng, kon drŏ-nglo Ben Hinôm oei tơ gah yă-nơ̆m kơ thŭng Rêphaim, rok jur tơklă thŭng Hinôm dăr gah gơal kơ pơlei tih Jêbus, weh dăr jur truh tơ Ên Rôgel.

¹⁷ Weh dăr tơ gah yă-nơ̆m truh tơ Ên Sêmes; đơ̆ng noh tơpăt Geliôt tơklă kuĕl tơngơ̆ Ađumim, jur tơ tơmo Bôhan, anăn kon drŏ-nglo Rubên;

¹⁸ sư rok pơlei Bêt Araba gah yă-nơ̆m jur truh tơ thŭng Arba.

¹⁹ Hơdral dăr tơter kông gah yă-nơ̆m kơ pơlei Bêt Hôgla, tôch tơ'bưh kơ wong đak Dơsĭ 'Boh 'bơ̆t tu đak Krong Jôrđăn gah gơal noh boih hơdral gah gơal.

²⁰ Đak Krong Jôrđăn pơm hơdral gah hơlĕch, noh hơdral puăn pah anih teh jang sa lu kon sâu Bênjamin, kiơ̆ kơ adrĕch adrung lu sư.

²¹ Đĭ-đăng lu pơlei kơ adrĕch Bênjamin, kiơ̆ kơ lu adrĕch adrung lu sư, đei noh pơlei: Jêrikô, Bêt Hôgla, Êmek Kêsis,

²² Bêt Araba Sêmara, Bethel,

²³ Awim, Phara, Opra,

²⁴ Kêpha Ammônai, Ôpni, Gêba; đĭ-đăng mơjĭt-'bar tŏ pơlei tih păng pơlei iĕ lu sư.

²⁵ Gibeôn Rama, Bêrôt.

²⁶ Mispa, Kêphira, Mosa,

²⁷ Rêkem, Irpel, Tarala,

²⁸ Sêla, Halep, pơlei tih bơngai Jêbus, noh krao pơlei Jêrusalem, Gibêah, Kiriat, đĭ-đăng noh mơjĭt-puăn tŏ pơlei tih păng pơlei iĕ lu sư. Noh boih anih jang sa kơ lu kon sâu Bênjamin, kiơ̆ kơ adrĕch adrung lu sư.