Jôsuê 17 - Sơ̆p Hlabơar Nơ̆r 'Bok Kei-Dei

Teh asong kơ adrĕch Manase

¹ 'Nâu teh asong ăn kơ adrĕch Manase, sư jing kon kơdră Jôsep, teh kơ Makir, kon kơdră Manase păng Makir 'bă kơ Gileat, yua kơ lu sư jing linh tơblah nuih, noh na sư gơh đei char Gileat păng Basan.

² Đe kư̆m đei klah asong adrĕch Manase, kiơ̆ kơ adrĕch adrung lu sư; lu kon sâu Abiêse, kon sâu Hêlek, kon sâu Asriel, kon sâu Sichem, kon sâu Hêpher, kon sâu Sêmiđa. Noh kon drŏ-nglo Manase, Sâu Jôsep, kiơ̆ kơ adrĕch adrung lu sư.

³ Gah Sêlôpêhat, kon drŏ-nglo Hêpher, sâu Gileat sâu i Makir, sâu ach Manase, ưh kơ đei kon drŏ-nglo, đei kon drŏ-kăn đĕch, 'nâu anăn lu sư Mahla, Nôa, Hogla, Milka păng Tirsa.

⁴ Lu kon drŏ-kăn âu dơ̆ng 'bơ̆t anăp 'bok soi Êlêasar, 'bơ̆t anăp Jôsuê, kon drŏ-nglo Nun păng 'bơ̆t anăp lu kră pơgơ̆r pơlei, na khan: Kră Yang khan kơ Môis asong ăn kơ lu nhôn đei teh jang sa lăm lu 'nhŏng oh lu nhôn. Jôsuê chu kiơ̆ nơ̆r Kră Yang pơkă sư asong ăn teh jang sa kơ lu sư hơdai lăm lu 'nhŏng oh lu sư.

⁵ Thoi noh adrĕch Manase đei mơjĭt tŏ tơring dơ̆ng, 'nguaih kơ char Gileat păng char Basan tơ gah hơlĕch kơ đak Krong Jôrđăn;

⁶ Yua kơ lu kon drŏ-kăn Manase kư̆m đei teh jang sa, iŏk hơdai lăm lu kon drŏ-nglo sư, char Gileat noh char asong ăn kơ lu kon drŏ-nglo Manase nai dơ̆ng.

⁷ Teh jang sa lu adrĕch Manase iŏk đơ̆ng teh đak Aser truh tơ Mitmêtat gah hơlĕch kơ pơlei Sichem, đơ̆ng noh hơdral sư rok thŭng truh tơ lu kon pơlei oei 'bơ̆t pơlei Ên Tapua.

⁸ Char Tapua noh asong kơ lu adrĕch Manase; mă-lei pơlei Tapua noh tôch kơ hơdral hăm lu kon drŏ-nglo Êphraim.

⁹ Đơ̆ng noh hơdral lu sư rok iŏk đơ̆ng gơal kơ Chơkơi đak Kana Rawen; lu pơlei tih noh gah lu bơngai Êphraim oei tŏk-bŏk lăm pơlei tih Manase; mă-lei hơdral Manase rok tơ yă-nơ̆m kơ chơkơi đak păng tôch tơ đak dơsĭ.

¹⁰ Teh gah gơal kơ lu adrĕch Êphraim, gah yă-nơ̆m adrĕch Manase, na tơ'bưh kơ đak dơsĭ noh hơdral; hăm Aser tơ gah yă-nơ̆m păng adrĕch Isakar gah hơlĕch.

¹¹ Teh gah Isakar păng Aser kư̆m đei adrĕch Manase oei thoi pơlei Bêt Sêan. Pơlei Iblêam păng lu kon pơlei Đôr, kon pơlei Êndôr, kon pơlei Tanak, păng kon pơlei Mêgiđô, tơring mă pêng noh pơlei Naphot kiơ̆ kơ jô̆.

¹² Mă-lei lu kon sâu Manase ưh kơ kĕ pơpuh tơweh ôh lu pơlei ei, yua kơ kon pơlei Kanaan oei lăm char noh.

¹³ Mă-lei mưh kon pơlei Isơrael rai pran kơtang lu sư rôp lu kon pơlei Kanaan pơm đĭch, lei na ưh kơ kĕ pơpuh tơweh lu sư đĭ.

¹⁴ Lu kon sâu Jôsep khan kơ Jôsuê: “Lu nhôn jing kon pơlei kơdrâ̆m lơ, yua kơ kiơ ih asong lu nhôn teh jang sa lăp minh đĕch, minh dơnih teh jang sa? Yua kơ Kră Yang ăn pŭn hiôk lơ kơ lu nhôn.”

¹⁵ Jôsuê tơl lu sư: “Tơdah kon pơlei lu iĕm lơ kơdrâ̆m lei lu iĕm năm muih jang tơ bri kơdrơ̆ng tơ kông to, tơ anih noh iĕm choh iŏk jang sa lăm teh char bơngai Phêrêsit păng lu kon pơlei Raphait. Yua kơ tơring kơpal kông Êphraim iĕ hrăt-hrot kơ iĕm.”

¹⁶ Lu kon sâu Jôsep tơl khan: Tơ kông ưh kơmah kơ lu nhôn ôh; bĕ tơ lăm thŭng dơnă, đĭ-đăng kon pơlei Kanaan oei tơ noh, đei gre aseh mam păng lu kon pơlei Bêt Sêan hai, hăm lu pơlei, lu sư oei kư̆m thoi kon pơlei lăm thŭng Jêsreel.

¹⁷ Kơplah noh Jôsuê khan kơ adrĕch Jôsep, lu adrĕch adrung Êphraim păng lu adrĕch Manase, khan: Lu iĕm jing kon pơlei kơdrơ̆m lơ păng đei jơhngơ̆m pran kơtang, ưh kơ sĭ iŏk teh lăp minh đĕch ôh;

¹⁸ mă-lei char gah kông noh jing teh lu iĕm mă khan bri kơdrơ̆ng, lu iĕm chong muih jang truh tơ jơ̆p-jang mă să ataih, yua kơ lu iĕm gơh puh tơweh lu kon pơlei Kanaan, mă khan lu sư đei gre aseh mam pran kơtang ră.