Jôsuê 16 - Sơ̆p Hlabơar Nơ̆r 'Bok Kei-Dei

Klah asong char kơ Êphraim

¹ Teh asong kơ kon sâu Jôsep iŏk đơ̆ng đak Krong Jôrđăn jê̆ pơlei Jêrikô, iŏk đơ̆ng gah hơlĕch kơ glung đak pơlei Jêrikô 'moi rok tơ lăm thŭng dơnă tŏk truh tơ kơpal kông Bethel.

² Hơdral iŏk đơ̆ng Bethel noh Lus rok truh hlôi kơ kon pơlei Arkit păng Atarôt;

³ Jur tơ gah bơmơ̆t truh tơ pơlei Japhlet truh tơ char Bêt Hôrôn gah ala truh tơ char Geser, tôch tơ jih đak dơsĭ.

⁴ Lu kon sâu Jôsep, adrĕch Manase păng Êphraim iŏk teh jang sa lu sư tơ noh.

⁵ Âu jing char adrĕch Êphraim, kiơ̆ kơ adrĕch adrung lu sư: Hơdral teh lu sư jang sa tơ gah hơlĕch noh, iŏk đơ̆ng pơlei Atarôt Ađar truh tơ pơlei Bêt Hôrôn,

⁶ iŏk đơ̆ng noh truh tơ đak dơsĭ gah yă-nơ̆m kơ pơlei Mikmêtat; gah hơlĕch weh dăr tơklă tơ Thanat Silô rok hloh kơ tơ Janôa tơ gah hơlĕch.

⁷ Iŏk đơ̆ng Janôa hơdral jur truh tơklă pơlei Atarôt păng Nara, tơ'bưh kơ pơlei Jêrikô tôch đak Krong Jôrđăn.

⁸ Đơ̆ng pơlei Tapua hơdral rok gah bơmơ̆t kơ thong đak Kana Rawen, tôch tơ jih đak dơsĭ noh boih bri seh teh jang sa kơ lu adrĕch Êphraim, kiơ̆ kơ adrĕch adrung lu sư.

⁹ Kon sâu Êphraim kư̆m đei teh jang sa mir 'ba pơlei tih iĕ kơdih tŏk-bŏk lăm teh lu adrĕch Manase.

¹⁰ Mă-lei lu sư ưh kơ pơpuh tơweh lu kon pơlei Kanaan mă oei tơ Geser, na lu kon pơlei Kanaan oei hơdai hăm adrĕch Êphraim, mă truh dang ei, mă-lei pơgŏ athei jang trăp gleh.