Jôsuê 15 - Sơ̆p Hlabơar Nơ̆r 'Bok Kei-Dei

Klah asong teh ăn kơ adrĕch Juđa

¹ Teh hlang lăng trŏ kơ adrĕch Juđa, kiơ̆ kơ adrĕch adrung lu sư, să truh tơ char Eđôm lăm char glă Yin tôch tơ gah gơal.

² Hơdral gah gơal iŏk đơ̆ng rong đak dơsĭ tơ gah gơal tôch kơ Dơsĭ 'Boh.

³ Hlôi tơ gah gơal kơ kuĕl Hơguăt tơpăt rok char glă Yin, tŏk dăr tơ gah gơal kơ Kades Barnêa, brih kơ Hêsrôn, tơklă Ađar, dăr truh tơklă Karka,

⁴ Rok kiơ̆ Asmôn, jur truh đak glung Êyiptơ, lĕch tôch tơ jih đak dơsĭ. 'Nâu jing hơdral gah gơal.

⁵ Hơdral gah hơlĕch noh đơ̆ng đak Dơsĭ 'Boh truh tơ tu đak Krong Jôrđăn. Hơdral gah yă-nơ̆m, đơ̆ng jih đak dơsĭ truh tơ tu đak Krong Jôrđăn,

⁶ tŏk tơ Bêt Hôgla, tơ gah yă-nơ̆m pơlei Bêt Araba, truh tơ Tơmo Bôhan, (anăn kon drŏ-nglo Rubên),

⁷ đơ̆ng âu hơdral tŏk tơ Đêbir, đơ̆ng thŭng Akôr năm tơpăt tơ gah yă-nơ̆m dăr tơklă Gilgal, tơklă kuĕl Ađumim gah gơal kơ thŭng rok cheng tu đak Ên Sêmes păng tơtil tu đak Ên Rôgel.

⁸ Đơ̆ng noh rok tŏk tơ thŭng Ben Hinôm, tơtil gah gơal kơ pơlei bơngai Jêbus noh Jêrusalem đơ̆ng noh tŏk rok truh kơpal kông jê̆ thŭng Hinôm gah bơmơ̆t, gah yă-nơ̆m tôch tơ thŭng Rêphaim.

⁹ Hơdral 'nâu đơ̆ng luĕl kông truh tơ đak glung Neptôa tơtil lu pơlei kơpal kông Êphrôn, jur tơ Baala, noh Kiriat Jêrim.

¹⁰ Hơdral đơ̆ng Baala dăr tơ gah bơmơ̆t truh tơ Kông Sêir, 'moi rok gah yă-nơ̆m kơ Kông Jêarim, noh Kêsalôn; pơtrơp jur rok tơpăt truh tơ Bêt Sêmes hlôi kơ Thimna.

¹¹ Hơdral sư kiơ̆ rok tơter kông gah yă-nơ̆m kơ Ekrôn, rok dăr truh tơ gah Sikêrôn, 'moi rok Kông Baala, truh tơ Japnêl, tôch tơ đak dơsĭ.

¹² Hơdral gah bơmơ̆t, noh rok tơter đak Dơsĭ Tih, noh boih hơdral tăp dăr puăn pah lu bơngai Juđa, kiơ̆ kơ adrĕch adrung lu sư.

¹³ Jôsuê ăn kơ Kalep, kon drŏ-nglo Jêphunê, minh pah teh đơ̆ng lăm lu bơngai Juđa, kiơ̆ thoi Kră Yang khan kơ Jôsuê; Kiriat Arba. Arba noh 'bă kơ Anak, noh đe krao pơlei Hêbrôn.

¹⁴ Đơ̆ng pơlei Hêbrôn Kalep puh tơweh pêng adrĕch Anak noh adrĕch Sêsai, Ahiman păng Thalmai noh adrĕch adrung Anak ngăl.

¹⁵ Đơ̆ng noh lu sư năm blah kon pơlei tih Đêbir, noh sơ̆ đe anăn pơlei Kiriat Sêpher.

¹⁶ Kalep khan: Inh gô ăn kon drŏ-kăn inh Aksa, pơm akăn bơngai bu kĕ blah iŏk đei pơlei Kiriat Sêpher.

¹⁷ Ôtniêl, kon drŏ-nglo Kêna oh Kalep đei blah iŏk pơlei noh; na Kalep ăn hloi Aksa kon drŏ-kăn sư pơm akăn Ôtniêl.

¹⁸ Aksa oei tơ hnam Ôtniêl, sư athei klo sư apinh 'bă sư mir chŭn, Aksa 'nao jur đơ̆ng aseh sư, Kalep jet, kon wă kơ kiơ?

¹⁹ Aksa tơl, apinh 'bă ăn tơmam pŭn hiôk kơ kon, yua kơ 'bă ăn boih kơ kon teh oei lăm tơring glă gah gơal, na apinh ăn hloi kơ kon teh đei tu đak na Kalep ăn kơ kon sư 'bar 'bôt tu đak tơ gah kơpơ̆ng hăm tơ gah ala.

²⁰ Noh jing teh adrĕch Juđa jang sa, kiơ̆ kơ adrĕch adrung lu sư.

²¹ Đĭ-đăng lu pơlei adrĕch Juđa lăm tơring gah gơal, gah bơmơ̆t kơ char Eđôm đei: Pơlei Kapsêel, Êder, Jagur,

²² Kina, Đimôna, Ađađa,

²³ Kêđes, Hasor, Itnan,

²⁴ Sip, Têlem, Bêalôt,

²⁵ Hasor Hađatha, Kêriôt, Hêsrôn, noh đe kư̆m krao pơlei Hasor,

²⁶ Amam, Sêma, Molađa,

²⁷ Hasar Gađa, Hêsmôn, Bêt Pêlêt,

²⁸ Hasar Sual, Bêrsêba, Bisôtia,

²⁹ Baala, Im, Esem,

³⁰ Êltôlat, Kêsil, Horma,

³¹ Siklak, Matmana, Sansana,

³² Lêbaôt, Silhim, Ain, hăm Rimôn; đĭ-đăng đei 'bar-jĭt tơsĭn tŏ pơlei tih hăm pơlei iĕ lu sư.

³³ Lăm tơring groi gah bơmơ̆t: Đei pơlei Êstaôl, Sôra, Asna,

³⁴ Sanôa, Ên Ganim, Thapua, Ênam,

³⁵ Jarmut, Ađulam, Sôkô, Asêka,

³⁶ Saraim, Ađitaim, Gêđêra, dah Gêđêrôtaim: Đĭ-đăng mơjĭt-puăn tŏ pơlei tih hăm lu pơlei iĕ lu sư.

³⁷ Đei pơlei Sênan, Hađasa, Mikđal Gat,

³⁸ Đilin, Mispa, Jôkthêel,

³⁹ Lakis, Boskat, Eglôn,

⁴⁰ Kapbôn, Lahmas, Kitlis,

⁴¹ Gêđêrôt, Bêt Dagôn, Nama păng Makkêđa; đĭ-đăng mơjĭt-tơdrâu tŏ pơlei tih hăm lu pơlei iĕ lu sư.

⁴² Pơlei Lipna, Ether Asan,

⁴³ Ipta, Asna, Nêsip,

⁴⁴ Keila, Aksip păng Marêsa; đĭ-đăng tơsĭn tŏ pơlei tih hăm lu pơlei iĕ lu sư.

⁴⁵ Ekrôn pơlei tih hăm lu pơlei tih iĕ lu sư.

⁴⁶ Gah bơmơ̆t kơ pơlei Ekrôn đĭ-đăng pơlei lăm tơring Asdôt hăm lu pơlei iĕ lu sư.

⁴⁷ Pơlei Asdôt hăm lu pơlei tih iĕ sư, pơlei Gasa hăm lu pơlei iĕ lu sư truh tơ glung Êyiptơ păng truh tôch tơ jih đak Dơsĭ Tih.

⁴⁸ Lăm tơring groi kông: Đei pơlei Samir, Jatir, Sôkô,

⁴⁹ Đana, Kiriat Sana, noh đe anăn pơlei Đêbir,

⁵⁰ Anap, Êthêmo, Anim,

⁵¹ Gôsen, Hôlôn, Gilô: Đĭ-đăng mơjĭt-mônh tŏ pơlei tih hăm lu pơlei iĕ lu sư.

⁵² Arap, Đuma, Êsan,

⁵³ Janim, Bêt Tapua, Aphêka,

⁵⁴ Humta, Kiriat Arba, noh đe anăn Hêbrôn păng Siôr: Đĭ-đăng tơsĭn tŏ pơlei hăm pơlei iĕ lu sư.

⁵⁵ Maôn, Karmel, Sip, Juta,

⁵⁶ Jesreel, Jôkđem, Sanôa,

⁵⁷ Kain, Gibêah păng Thimna; đĭ-đăng mơjĭt tŏ pơlei tih hăm pơlei iĕ lu sư.

⁵⁸ Halhul, Bêt Sur, Gêđôr,

⁵⁹ Maarat, Bêt Anot păng Êntêkôn: Đĭ-đăng đei tơdrâu tŏ pơlei tih hăm lu pơlei iĕ lu sư.

⁶⁰ Kariat Baal wă khan Kiriat Jearim păng Rapba; đĭ-đăng 'bar tŏ pơlei tih hăm pơlei iĕ lu sư.

⁶¹ Lăm char glă: Bêt Araba, Miđin, Secaca,

⁶² Nipsan, noh krao pơlei 'Boh păng Êngêđi, đĭ-đăng đei tơdrâu tŏ pơlei tih hăm pơlei iĕ lu sư.

⁶³ Mă-lei lu bơngai Juđa, ưh kơ gơh pơpuh lu kon pơlei Jêbus mă oei tơ Jêrusalem, kon pơlei Jêbus, oei hơdai hăm bơngai Juđa tơ Jêrusalem truh tơ dang ei.