Jôsuê 12 - Sơ̆p Hlabơar Nơ̆r 'Bok Kei-Dei

Chih răk anăn lu pơtao thuơ

¹ Âu lu anăn pơtao kơ dêh char, mă Isơrael đei blah iŏk dêh char teh đak lu sư gah to kơ đak Krong Jôrđăn, đơ̆ng glung Arnôn, truh tơ kông Hermôn đĭ kơ thŭng dơnă gah hơlĕch Araba.

² Sihôn pơtao đe Amôrit, oei tơ pơlei Hesbôn, sư pơgơ̆r wei-lăng đơ̆ng pơlei Arôe, pơlei cheng thong đak glung Arnôn, đơ̆ng minh puăt kơ thong glung, truh tơ thong glung Jabôk, tôch kơ hơdral char bơngai pơlei Ammôn, minh pah char Gileat.

³ Sư kư̆m pơgơ̆r wei-lăng đĭ tơ lăm thŭng truh tơ đak dơsĭ Kinêrot gah hơlĕch thŭng đak Dơsĭ 'Boh, tơ gah hơlĕch kơ Bêt Jêsamôt, sư kư̆m wei-lăng truh lăm thŭng gah gơal jê̆ jơ̆ng kông Pisga,

⁴ Ok pơtao Basan, minh 'nu bơngai oei arih hlot lăm kon pơlei Rêphaim oei tơ Astarôt păng Êdrei.

⁵ Sư pơgơ̆r wei-lăng đơ̆ng Kông Hermôn, gah tơring Salêka păng truh tơ char Basan, tôch truh tơ jih hơdral kon pơlei Gêsur, kon pơlei Makathit, minh puăt char Gileat, hơdral char Hesbôn pơtao Sihôn pơgơ̆r

⁶ Môis đĭch đam Kră Yang păng kon pơlei Isơrael blah iŏk đơ̆ng lu sư, Môis đĭch đam Kră Yang klah asong teh ăn kơ lu adrĕch Rubên, Gat, minh puăt kơ adrĕch Manase, choh jang sa mir 'ba.

⁷ 'Nâu anăn lu pơtao mă lăm lu dêh char Jôsuê hăm kon pơlei Isơrael đei blah iŏk gah bơmơ̆t kơ đak Krong Jôrđăn, đơ̆ng Baal Gat lăm thŭng Liban truh tơ Kông Halak tŏk tơ kơpơ̆ng tơklă gah Sêir, Jôsuê asong ăn kơ rim adrĕch Isơrael teh bơ̆jang sa mir 'ba kiơ̆ kơ adrĕch sư.

⁸ Gah groi kông, gah thŭng dơnă, jơ̆ng kông gah gơal, gah Araba, gah tơring kơpal kông, gah tơmăn bri păng gah gơal, noh wă khan tơring kon pơlei Hêtit, kon pơlei Amôrit kon pơlei Kanaan, kon pơlei Phêrêsit, kon pơlei Hêwit păng kon pơlei Jêbus.

⁹ Pơtao Jêrikô, pơtao Ahi oei jê̆ Bethel.

¹⁰ Pơtao Jêrusalem, pơtao Hêbrôn.

¹¹ Pơtao Jarmut, pơtao Lakis.

¹² Pơtao Eglôn, pơtao Geser.

¹³ Pơtao Đêbir, pơtao Geđer.

¹⁴ Pơtao Horma, pơtao Arat.

¹⁵ Pơtao Lipna, pơtao Ađulam.

¹⁶ Pơtao Makkêđa, pơtao Bethel.

¹⁷ Pơtao Tapua, pơtao Hêpher.

¹⁸ Pơtao Aphek, pơtao Lasarôn.

¹⁹ Pơtao Mađôn, pơtao Hasor.

²⁰ Pơtao Simrôm Mêrôn, pơtao Aksap.

²¹ Pơtao Tanak, pơtao Mêgiđô.

²² Pơtao Kêđes, pơtao Jôknêam, oei tơ kông Karmel.

²³ Pơtao Đôr oei tơ tơring kông groi kơjung Đôr, pơtao Gôim oei tơ Gilgal.

²⁴ Păng pơtao Tirsa. Đĭ-đăng đei pêng-jĭt mônh 'nu pơtao.