Jop 8 - Sơ̆p Hlabơar Nơ̆r 'Bok Kei-Dei

Bildat chrih kơ Jop mă mônh

¹ Bildat bơngai adrĕch Sua tơl Jop:

² “Ih oei pơma thoi noh dĭng dang yơ? Nơ̆r pơma đơ̆ng lăm 'bơ̆r ih thoi kial hơbŭt.

³ Kră Yang 'Bok Kei-Dei hăm lah pơm pơđŏng lê̆ tơdrong tơpăt? Dah Tơ'ngla Mơsêh Mơyang Tih Hloh pơm pơglăi lê̆ tơdrong tơpăt?

⁴ Kon hơ'lơ̆p ih đei pơm yoch boih hăm Kră Yang 'Bok Kei-Dei, na Kră Yang ăn kơ lu đe noh pŭ iŏk pơmat, yua kơ tơdrong yoch lu sư.

⁵ Gah ih, tơdah ih chă Kră Yang 'Bok Kei-Dei, păng krao apinh Kră Yang Tih Hloh.

⁶ Tơdah ih rơgoh păng 'lơ̆ng tơpăt, sĭt tơpă Sư gô dŏng pơklaih ih, păng Sư gô tơiung dơ̆ng hnam dơnŏ, păng mŭk tơmam ih, wă apah kơ tơdrong ih tơpăt.

⁷ Dang ei ih oei iĕ, dôm tơmam ih đei sơ̆ oei tŏ sĕt, mă-lei ning-mônh ih gô mơdrŏng tih tơpă.

⁸ “Inh apinh ih hŏk iŏk lu bơngai jơhnơr adrol sơ̆, Chă lăng hơlen bĕ dôm tơdrong lu sư chă 'bôh sơ̆;

⁹ Yua kơ lu bơ̆n bơngai nge 'nao brei tam băt tơdrong kiơ. Păng chăl arih bơ̆n kơpal teh hloh hlôi kuăng thoi yơ̆p.

¹⁰ Mă-lei lu 'bok kră sơ̆ lu sư gô bơtho tơ'bôh kơ ih, mơ̆ng bĕ dôm tơdrong kiơ đêl lu sư băt hlôh,

¹¹ 'Nhĕt trang hăm gơh chăt tơ anih ưh kơ đei đak? 'Long pơm hla bơar hăm gơh chăt tơ anih ưh kơ đei trâp?

¹² Kơplah sư oei pơkao, đe ưh tam mă koh ôh, lu sư gô jô kro 'bônh hloh kơ lu 'nhĕt nai tơdah ưh kơ đei đak.

¹³ Noh bơih tơdrong truh kơ lu bơngai mă sơngah kơ Kră Yang 'Bok Kei-Dei; lu bơngai mă ưh kơ lui tơdrong hơmĕng lu sư hiong đĭ.

¹⁴ Tơdrong kiơ mă lu sư lui gơnang kơtĕch boih, nhen thoi lu sư gơnang kơ wai dŭng.

¹⁵ Sư gơnang kơ hnam sư mă-lei hnam ưh kơ kĕ kơ dơ̆ng ôh; lu sư rôp pơjăng kơ hnam, kư̆m ưh kơ kĕ kơ iung.

¹⁶ Lu sư nhen 'long chăt hơdrih ala măt 'năr. Bluh tơmơ̆ng chăt jơ̆p kơ pơgar.

¹⁷ Rơh sư chăt kuăr tăp kơ tơmo, chăt kơchâu lăm tơmo.

¹⁸ Mă-lei dah buch sư đơ̆ng anih sư chăt. Anih noh gô sơngah, khan, inh ưh tam layơ 'bôh sư.

¹⁹ To tơdrong arih chơt hiôk lu bơngai sơngah kơ Kră Yang 'Bok Kei-Dei sư jô kro tôch dang noh. Na 'nhĕt 'long nai gô chăt đêl anih sư.

²⁰ “Mă-lei Kră Yang 'Bok Kei-Dei ưh kơ achăng lê̆ ôh lu bơngai 'lơ̆ng tơpăt. Kŭm ưh kơ wă tơgŭm lu bơngai pơm kơnê̆.

²¹ Sư gô ăn kơ 'bơ̆r ih hiĕk chơt păng hơkŭng ih gô jreo chơt hiôk 'nă hal.

²² Lu bơngai areh kơ ih gô kơdơ̆ mơlâu. Bơsŭn lu bơngai pơm kơnê̆ gô răm đĭ.”