Jop 42 - Sơ̆p Hlabơar Nơ̆r 'Bok Kei-Dei

Tơiung Jop thoi đêl

¹ Jop tơl Kră Yang:

² Inh băt kơ Kră Yang gơh pơm tôm tơdrong, Ưh kơ đei bu gơh găn Ih tơdrong Ih wă pơm.

³ Kră Yang jet ih bu ưh kơ băt ưh kơ hlôh kiơ, liơ mă pơ̆n ưh kơ ngeh tơdrong Kră Yang wă pơm. Tơpă inh pơma bơih dôm lu tơdrong inh ưh kơ hlôh. Lu tơdrong hlĭch chrơp dêh inh ưh kơ kĕ kơ hlôh.

⁴ Kră Yang athei ih mơ̆ng nơ̆r Sư bơtho khan: Roi pơdah kơ Kră Yang dôm tơdrong Kră Yang gô jet ih.a

⁵ Adrol sơ̆ đon inh lăp kơtơ̆ng ang gah Kră Yang, Mă-lei dang ei, măt inh 'bôh Ih bơih.

⁶ Yua kơ thoi noh, inh mơlâu dêh kơ tơdrong inh pơma păng apinh tơbral lăm 'mui tơnuh.

Jop krao khan ăn kơ lu buăl sư

⁷ Đơ̆ng rŏng kơ Kră Yang bơtho Jop. Kră Yang khan kơ Êliphas bơngai Thêman. “Inh blĕk kơ ih păng 'bar 'nu buăl ih, yua kơ lu iĕm ưh kơ đei pơma tơpăt gah Inh thoi Jop, đĭch đam Inh pơma bơih.

⁸ Na dang ei, rôp bĕ tơpơh tŏ rơmo tơno păng tơpơh tŏ triu tơno năm truh tơ Jop, đĭch đam Inh, lu iĕm pơyơ̆r tơmam soi 'buh; na Jop đĭch đam Inh, gô krao khan ăn kơ lu iĕm; Inh gô tơl nơ̆r sư, na Inh huay kơ phak lu iĕm kiơ̆ kơ tơdrong kơtul kơmŭl lu iĕm, yua kơ lu iĕm ưh kơ đei pơma tơpăt gah Inh thoi Jop đĭch đam Inh mă pơma bơih.”

⁹ Na, Êliphas, bơngai Thêman, Bildat, bơngai Sua, Sôpha bơngai Naama, chu păng pơm kiơ̆ hloi thoi Kră Yang bơtho pơkă ăn; Kră Yang tơl tơwih nơ̆r Jop.

¹⁰ Đơ̆ng rŏng kơ Jop krao khan ăn kơ buăl sư đang bơih, Kră Yang ăn kơ Jop đei pŭn hiôk păng ăn kơ Jop đei 'bar 'bar lu mŭk tơmam đei 'bar 'bar hơgrop lu sem dơrong.

¹¹ Đĭ-đăng lu 'nhŏng, mŏ oh sư păng lu bơngai juăt băt kơ Jop đơ̆ng adrol sơ̆, năm ngôi hơpong păng sŏng sa hăm sư tơ lăm hnam sư. Lu sư ngôi hơpong păng pơlung sư gah lu tơdrong truh pơmat mă Kră Yang pơm kơ sư. Rim 'nu kơ lu sư ăn kơ Jop minh kơtuăl jên hub păng minh pôm tơkhiĕn maih.

¹² Thoi noh, Kră Yang tuh tơdrong pŭn hiôk ăn kơ Jop lăm sơnăm rai kră lơ hloh kơplah 'nao iung sơ̆: Sư đei mơjĭt-puăn rơbâu tŏ triu, tơdrâu-rơbâu tŏ aseh lăk-đa, minh-rơbâu hơgrop rơmo păng minh-rơbâu aseh iĕ akăn.

¹³ Sư kư̆m đei tơpơh 'nu kon drŏ-nglo păng pêng 'nu kon drŏ-kăn,

¹⁴ Sư krao anăn ăn kơ kon drŏ-kăn kơdră sư: Jêmimac kon drŏ-kăn mă 'bar Kêsia, kon drŏ-kăn mă pêng Keren Hapuch.

¹⁵ Lăm đĭ-đăng dêh char noh ưh kơ đei bơngai drŏ-kăn ayơ 'lơ̆ng guăng lei-lăi thoi pêng 'nu kon drŏ-kăn Jop, 'bă lu sư kư̆m asong ăn kơ lu sư mŭk tơmam lei-lăi thoi lu 'nhŏng oh drŏ-nglo lu sư.

¹⁶ Đơ̆ng rŏng kơ 'noh, Jop oei arih minh-hrĕng puăn-jĭt sơnăm dơ̆ng; sư 'bôh lu kon sâu i sâu ach, truh tơ puăn jơhnơr.

¹⁷ Đơ̆ng noh Jop lôch sơnăm đĭ sot akâu đĭ kră arih hrăp jơnap.