Jop 40 - Sơ̆p Hlabơar Nơ̆r 'Bok Kei-Dei

Kră Yang 'Bok Kei-Dei athei Jop tơl

¹ Kră Yang khan kơ Jop:

² Lu bơngai hăm pơ̆n pơma pơjah hăm Kră Yang Tih Hloh? Bơngai bu pơ̆n pơjah hăm Kră Yang 'Bok Kei-Dei athei tơl nơ̆r noh bĕ!

³ Jop tơl Kră Yang:

⁴ Inh bơngai ưh kơ yua kiơ liơ inh gơh tơl Kră Yang? Inh iŏk ti đơ̆p 'bơ̆r ưh kơ pơ̆n pơma.

⁵ Inh hơch 'bơm pơma minh 'bar wơ̆t bơih, mă-lei ưh pă pơ̆n tơl dơ̆ng.

⁶ Đơ̆ng lăm kial hơbŭt, Kră Yang pơma hăm Jop:

⁷ Hơmet kơchăng bĕ thoi bơngai nuih kơtang. Inh gô jet na ih gô tơl tơwih kơ Inh.

⁸ Ih hăm pơ̆n sơngah hŭt lê̆ tơdrong Inh sek tơlang? Khan jô̆ Inh yoch wă pôk kơdih ih khan tơpăt hă?

⁹ Ih hăm đei kơkŏng ti pran kơtang thoi Kră Yang 'Bok Kei-Dei ưh? Ih hăm gơh tơlĕch nơ̆r grơ̆m re thoi Inh ưh?

¹⁰ Pơhrôp ih kơdih hăm tơdrong 'lơ̆ng rŏ pran kơtang. Hrŭk iŏk bĕ tơ akâu ih tơdrong ư-ang rang mơnhal.

¹¹ Săi bĕ tơdrong blĕk ih tơ jơ̆p-jang anih. Lăng bĕ 'bôh bơngai bu pơang tơjur lê̆ sư.

¹² Lăng bĕ tơ lu bơngai pơang păng teh tơhuŏng lê̆ sư; Kŭm teh pơjuă bĕ lu bơngai pơm kơnê̆ kơtă anih sư.

¹³ 'Bŭ bĕ lu sư hơdai băl lăm 'mui teh, gom klơ̆p lê̆ muh măt lu sư lăm bơsat.

¹⁴ Kơplah 'noh Inh gô pơư kơ ih, Ti 'ma ih kĕ jei gơh pơklaih ih kơdih.

¹⁵ Lăng bĕ kon sem brem tih krưp đak dơsĭ. Mă Inh đei pơjing sư bơih thoi Inh đei pơjing ih Sư sa 'nhĕt thoi rơmo.a

¹⁶ Lăng bĕ tơdrong pran kơtang lăm blu sư. Pran jăng sư tơ lăm sĕch klak sư.

¹⁷ Kiĕng sư arăng nhen thoi 'long hơngo, Huan blu sư tanh pơchuă pơchuang băl

¹⁸ Lu kơting sư arăng nhen thoi đing kong, Jơ̆ng sư thoi bơsei.

¹⁹ Sư bơih kon sem brem Kră Yang 'Bok Kei-Dei pơjing blŭng-a Lăp Tơ'ngla pơjing sư đĕch mă gơh pơlôch pơrăm sư.

²⁰ Lu kông groi đei 'nhĕt bluh ăn kơ sư sa, Anih mă lu sem bri chă hơnul chơt.

²¹ Sư 'bĭch tep tơ ala kơ bơmreh 'long jơla. Sư ôn pur akâu lăm trâp đei 'nhĕt trang.

²² Pơkao chêh-rêh klơ̆p pơm yơ̆p sư, 'Long hla prai cheng thong tăp dăr kơ sư.

²³ Sư ưh kơ hli mă krong ro jăng dêh thoi chơkơi. Sư oei hmă đĕch mă Krong Jôrđăn tŏk ro 'bĕnh tơ 'bơ̆r sư.

²⁴ Bu gơh đơ̆p lê̆ măt sư na rôp sư? Bu rôp sư hăm hơnhuăl, na tôt muh sư chô̆ tơlei dui?